વરાહ પુરાણ · અધ્યાય 106

અથ દધિધેનુદાન માહાત્મ્યમ્ ॥
હોતોવાચ ॥
દધિધેનોર્મહારાજ વિધાનં શૃણુ સાંપ્રતમ્ ॥
અનુલિપ્તે મહીભાગે ગોમયેન નરાધિપઃ

ગોચર્મમાત્રં તુ પુનઃ પુષ્પપ્રકરશોભિતે ॥
કુશૈરાસ્તીર્ય વસુધાં કૃષ્ણાજિનકુશોત્તરીમ્

દધિકુમ્ભં તુ સંસ્થાપ્ય સપ્તધાન્યચયોપરિ ॥
ચતુર્થાંશેન વત્સં તુ સૌવર્ણં મુખમણ્ડિતમ્

આચ્છાદ્ય વસ્ત્રયુગ્મેન પુષ્પગન્ધૈસ્તુ પૂજિતામ્ ॥
બ્રાહ્મણાય કુલીનાય સાધુવૃત્તાય ધીમતે

ક્ષમાદિગુણયુક્તાય દદ્યાત્તાં દધિધેનુકામ્ ॥
પુચ્છદેશોપવિષ્ટસ્તુ મુદ્રિકાકર્ણભૂષણૈઃ

પાદુકોપાનહૌ છત્રં દત્ત્વા મંત્રમિમં પઠેત્ ॥
દધિક્રાવ્ણેતિ મંત્રેણ દદ્યાદ્ધેનું સુપૂજિતામ્

એવં દધિમયીં ધેનું દત્ત્વા રાજર્ષિસત્તમ ॥
એકાહારી દિનં તિષ્ઠેદ્દધ્ના ચ નૃપનન્દન

યજમાનો વસેદ્રાજંસ્ત્રિરાત્રં ચ દ્વિજોત્તમઃ ॥
દીયમાનાં પ્રપશ્યન્તિ તે યાન્તિ પરમં પદમ્

ય ઇદં શૃણુયાદ્ભક્ત્યા શ્રાવયેદ્વાપિ માનવઃ ॥
સોઽશ્વમેધફલં પ્રાપ્ય વિષ્ણુલોકં ચ ગચ્છતિ

ઇતિ શ્રીવરાહપુરાણે શ્વેતવિનીતાશ્વાપોખ્યાને દધિધેનુદાનમાહાત્મ્યંનામ ષડધિકશતતમોઽધ્યાયઃ