વરાહ પુરાણ · અધ્યાય 101

અથ રસ ધેનુદાનમાહાત્મ્યમ્ ॥
હોતોવાચ ॥
રસધેનુવિધાનં તે કથયામિ સમાસતઃ ॥
અનુલિપ્તે મહીપૃષ્ઠે કૃષ્ણાજિનકુશાસ્તરે

રસસ્ય તુ ઘટં રાજન્ સમ્પૂર્ણં ત્વૈક્ષવસ્ય તુ ॥
તદ્વત્સઙ્કલ્પયેત્પ્રાજ્ઞશ્ચતુર્થાંશેન વત્સકમ્

તુરીયાંશેન વત્સં તુ તત્પાર્શ્વે સ્થાપયેત્સુધીઃ ॥
ઇક્ષુદણ્ડમયાઃ પાદા રજતસ્ય ખુરૈર્યુતાઃ

એવં કાર્યા રસૈર્ધેનુરિક્ષુપાદસમન્વિતા

સુવર્ણશૃંગાભરણા વસ્ત્રપુચ્છા ઘૃતસ્તની ॥
પુષ્પકમ્બલસંયુક્તા શર્કરામુખજિહ્વકા

દન્તાઃ ફલમયાસ્તસ્યાઃ પૃષ્ઠં તામ્રમયં શુભમ્ ॥
પુષ્પરોમાં તુ રાજેન્દ્ર મુક્તાફલકૃતેક્ષણામ્

સપ્તવ્રીહિસમાયુક્તાં ચતુર્દિક્ષુ ચ દીપિતામ્ ॥
સર્વોપસ્કરસંયુક્તાં સર્વગન્ધાદિવાસિતામ્

ચત્વારિ તિલપાત્રાણિ ચતુર્દિક્ષુ નિવેશયેત્ ॥
સર્વલક્ષણયુક્તાય શ્રોત્રિયાય કુટુમ્બિને

રસધેનુઃ પ્રદાતવ્યા સ્વર્ગકામેન નિત્યદા ॥
દાતા સ્વર્ગમવાપ્નોતિ સર્વપાપવિવર્જિતઃ

દાતા ચ ગ્રાહકશ્ચૈવ એકકાલમભોજનઃ ॥
સોમપાનફલં તસ્ય સર્વત્ર તુ ફલં ભવેત્

દીયમાનાં તુ પશ્યન્તિ તે ચ યાન્તિ પરાં ગતિમ્ ॥
ધેનું ચ પૂજયિત્વાગ્રે ગન્ધધૂપસ્રગાદિભિઃ

પૂર્વોક્તૈરેવ મન્ત્રૈસ્તુ તતસ્તાં પ્રાર્થયેત્સુધીઃ ॥
પ્રાર્થનાપૂર્વકં ભક્ત્યા દ્વિજાગ્ર્યાય નિવેદયેત્

દશપૂર્વાન્પરાંશ્ચૈવ આત્માનં ચૈકવિંશકમ્ ॥
પ્રાપયેત્પરમં સ્થાનં સ્વર્ગાન્નાવર્ત્તતે પુનઃ

એષા તે કથિતા રાજન્રસધેનુરનુત્તમા ॥
દદસ્વ ચ મહારાજ પરં સ્થાનમવાપ્નુહિ

ય ઇદં પઠતે નિત્યં શૃણુયાદથ ભક્તિતઃ ॥
સર્વપાપવિનિર્મુક્તો વિષ્ણુલોકે મહીયતે

ઇતિ શ્રીવરાહપુરાણે શ્વેતવિનીતાશ્વોપાખ્યાને રસધેનુદાનમાહાત્મ્યં નામ એકાધિકશતતમોઽધ્યાયઃ