વામનપુરાણ, સરોમાહાત્મ્ય · અધ્યાય 27

ઇતિ શ્રીવામનપુરાણે સરોમાહાત્મ્યે ષડ્વિંશો ઽધ્યાયઃ
સનત્કુમાર ઉવચા ।
અથૈનમબ્રવીદ્ દેવસ્ત્રૈલોક્યાધિપતિર્ભવઃ ।
આશ્વાસનકરં ચાસ્ય વાક્યવિદ્ વાક્યમુત્તમમ્

અહો તુષ્ટો ઽસ્મિ તે રાજન્ સ્તવેનાનેન સુવ્રત ।
બહુનાત્ર કિમુક્તેન મત્સમીપે વસિષ્યસિ

ઉષિત્વા સુચિરં કાલં મમ ગાત્રોદ્ભવઃ પુનઃ ।
અસુરો હ્યન્ધકો નામ ભવિષ્યસિ સુરાન્તકૃત્

હિરણ્યાક્ષગૃહે જન્મ પ્રાપ્ય વૃદ્ધિં ગમિષ્યસિ ।
પૂર્વાધર્મેણ ઘોરેણ વેદનિન્દાકૃતેન ચ

સાભિલાષો જગન્માતુર્ભવિષ્યસિ યદા તદા ।
દેહં શુલેન હત્વાહં પાવયિષ્યામિ સમાર્બુદમ્

તત્રાપ્યકલ્મષો ભૂત્વા સ્તુત્વા માં ભક્તિતઃ પુનઃ ।
ખ્યાતોગણાધિપો ભૂત્વા નામ્ના ભૃઙ્ગિરિટિઃ સ્મૃતઃ

મત્સન્નિધાને સ્થિત્વા ત્વં તતઃ સિદ્ધિં ગમિષ્યસિ ।
વેનપ્રોક્તં સ્તવમિમં કીર્તયેદ્ યઃ શૃણોતિ ચ

નાશુભં પ્રાપ્નુયાત્ કિઞ્ચિદ્ દીર્ઘમાયુરવાપ્નુયાત્ ।
યથા સર્વેષુ દેવેષુ વિશિષ્ટો ભગવાઞ્શિવઃ

તથા સ્તવો વરિષ્ઠો ઽયં સ્તવાનાં વેનનિર્મિતઃ ।
યશોરાજ્યસુખૈશ્વર્યધનમાનાય કીર્તિતઃ

શ્રોતવ્યો ભક્તિમાસ્થાય વિદ્યાકામૈશ્ચ યત્નતઃ ।
વ્યાધિતો દુઃખિતો દીનશ્ચૌરરાજભયાન્વિતઃ

રાજકાર્યવિમુક્તો વા મુચ્યતે મહતો ભયાત્ ।
અનેનૈવ તુ દેહેન ગણાનાં શ્રેષ્ઠતાં વ્રજેત્

તેજસા યશસા ચૈવ યુક્તો ભવતિ નિર્મલઃ ।
ન રાક્ષસાઃ પિશાચા વા ન ભૂતા ન વિનાયકાઃ

વિઘ્નં કુર્યુર્ગૃહે તત્ર યત્રાયં પઠ્યતે સ્તવઃ ।
શ્રુણુયાદ્ યા સ્તવં નારી અનુજ્ઞાં પ્રાપ્ય ભર્તૃતઃ

માતૃપક્ષે પિતુઃ પક્ષે પૂજ્યા ભવતિ દેવવત્ ।
શ્રુણુયાદ્ યઃ સ્તવં દિવ્યં કીર્તયેદ્ વા સમાહિતઃ

તસ્ય સર્વાણિ કાર્યાણ સિદ્ધિં ગચ્છન્તિ નિત્યશઃ ।
મનસા ચિન્તિતં યચ્ચ યચ્ચ વાચાનુકીર્તિતમ્

સર્વં સંપદ્યતે તસ્ય સ્તવનસ્યાનુકીર્તનાત્ ।
મનસા કર્મણા વાચા કૃતમેનો વિનશ્યતિ ।
વરં વરય ભદ્રં તે યત્ત્વયા મનસેપ્સિતમ્

વેન ઉવાચ
અસ્ય લિઙ્ગસ્ય માહાત્મ્યાત્ તથા લિઙ્ગસ્ય દર્શનાત્ ।
મુક્તો ઽહં પાતકૈઃ સર્વૈસ્તવ દર્શનતઃ કિલ

યદિ તુષ્ટો ઽસિ મે દેવ યદિ દેયો વરો મમ ।
દેવસ્વભક્ષણાઞ્જાતં શ્વયોનૌ તવ સેવકમ્

એતસ્યાપિ પ્રસાદં ત્વં કર્તુમર્હસિ શઙ્કર ।
એતસ્યાપિ ભયાન્મધ્યે સરસો ઽહં નિમઞ્જિતઃ

દેવૈર્નિવારિતઃ પૂર્વં તીર્થે ઽસ્મિન્ સ્નાનકારણાત્ ।
અયં કૃતોપકારશ્ચ એતદર્થે વૃણોમ્યહમ્

તસ્યૈતદ્ વચનં શ્રુત્વા તુષ્ટઃ પ્રોવાચ શઙ્કરઃ ।
એષો ઽપિ પાપિનિર્મુક્તો ભવિષ્યતિ ન સંશયઃ

પ્રસાદાન્મે મહાબાહો શિવલોકં ગમિષ્યતિ ।
તથા સ્તવમિમં શ્રુત્વા મુચ્યતે સર્વપાતકૈઃ

કુરુક્ષેત્રસ્ય માહાત્મ્યં સરસો ઽસ્ય મહીપતે ।
મમ લિઙ્ગસ્ય ચોત્પત્તિં શ્રુત્વા પાપૈઃ પ્રમુચ્યતે

સનત્કુમાર ઉવાચ
ઇત્યેવમુક્ત્વા ભગવાન્ સર્વલોકનમસ્કૃતઃ ।
પશ્યતાં સર્વલોકાનાં તત્રૈવાન્તરધીયત

સ ચ શ્વા તત્ક્ષણાદેવ સ્મૃત્વા જન્મ પુરાતનમ્ ।
દિવ્યમૂર્તિધરો ભૂત્વા તં રાજાનમુપસ્થિતઃ

કૃત્વા સ્નાનં તતો વૈન્યઃ પિતૃદર્શનલાલસઃ ।
સ્થાણતીર્થે કુટીં શૂન્યાં દૃષ્ટ્વા શોકસમન્વિતઃ

દૃષ્ટ્વા વેનો ઽબ્રવીદ્ વાક્યં હર્ષેણ મહતાન્વિતઃ ।
સત્પુત્રેણ ત્વયા વત્સ ત્રાતો ઽહં નરકાર્મવાત્

ત્વયાભિષિઞ્ચિતો નિત્યં તીર્થસ્થપુલિને સ્થિતઃ ।
અસ્ય સાધોઃ પ્રસાદેન સ્થાણોર્દેવસ્ય દર્શનાત્

મુક્તાપાપશ્ચ સ્વર્લોકં યાસ્યે યત્ર શિવઃ સ્થિતઃ ।
ઇત્યેવમુક્ત્વા રાજાનં પ્રતિષ્ઠાપ્ય મહેશ્વરમ્

સ્થાણુતીર્થે યયૌ સિદ્ધિં તેન પુત્રેણ તારિતઃ ।
સ ચ શ્વા પરમાં સિદ્ધિં સ્થાણુતીર્થપ્રભાવતઃ

વિમુક્તઃ કલુષૈઃ સર્વૈર્જગામ ભવમન્દિરમ્ ।
રાજા પિતૃઋણૈર્મુક્તઃ પરિપાલ્ય વસુન્ધરામ્

પુત્રાનુત્પાદ્ય ધર્મેણ કૃત્વા યજ્ઞં નિરર્ગલમ્ ।
દત્ત્વાકામાંશ્ચવિપ્રેભ્યો ભુક્ત્વા ભોગાન્ પૃથગ્વિધાન્

સુહૃદો ઽથ ઋણૈર્મુક્ત્વા કામૈઃ સંતર્પ્ય ચ સ્ત્રિયઃ ।
અભિષિચ્ય સુતં રાજ્યે કુરુક્ષેત્રં યયૌ નૃપઃ

તત્ર તપ્ત્વા તપો ઘોરં પૂજયિત્વા ચ શઙ્કરમ્ ।
આત્મેચ્છયા તનું ત્યક્ત્વા પ્રયાતઃ પરમં પદમ્

એતત્પ્રભાવં તીર્થસ્ય સ્થાણોર્યઃ શૃણુયાન્નરઃ ।
સર્વપાપવિનિર્મુક્તઃ પ્રયાતિ પરમાં ગતિમ્