Vāmanapurāṇa, Saromāhātmya · Chapter 24

iti śrīvāmanapurāṇe saromāhātmye trayoviṃśo 'dhyāyaḥ
sanatkumāra uvāca
athovāca mahādevo devān brahmapurogamān /
ṛṣīṇāṃ caiva praityakṣaṃ tīrthamāhātmyamuttamam

etat sāṃnihitaṃ proktaṃ saraḥ puṇyatamaṃ mahat /
mayopasevitaṃ yasmāt tasmānmuktipradāyakam

iha ye puruṣāḥ kecid brāhmaṇāḥ kṣatriyā viśaḥ /
liṅgasya darśanādeva paśyanti paramaṃ padam

ahanyahani tīrthāni āsamudrasarāṃsi ca /
sthāṇutīrthaṃ sameṣyanti madhyaṃ prāpte divākare

stotreṇānena ca naro yo māṃ stoṣyati bhaktitaḥ /
tasyāhaṃ sulabho nityaṃ bhaviṣyāmi na saṃśayaḥ

ityuktvā bhagavān rudro hyantardhānaṃ gataḥ prabhuḥ /
devāśca ṛṣayaḥ sarve svāni sthānāni bhehire

tato nirantaraṃ svargaṃ mānuṣairmiśritaṃ kṛtam /
sthāṇuliṅgasya māhātmya darśanātsvargamāpnuyāt

tato devāḥ sarva eva brahmāṇaṃ śaraṇaṃ yayuḥ /
tānuvāca tadā brahmā kimarthamiha cāgatāḥ

tato devāḥ sarva eva idaṃ vacanamabruvan /
mānuṣebhyo bhayaṃ tīvraṃ rakṣāsmākaṃ pitāmaha

tānuvāca tadā brahmā surāṃstridaśanāyakaḥ /
pāṃśunā pūryatāṃ śīghraṃ saraḥ śakre hitaṃ kuru

tato vavarṣa bhagavān pāṃśunā pākaśāsanaḥ /
saptāhaṃ pūrayāmāsa saro devaistadā vṛtaḥ

taṃ dṛṣṭvā pāṃśuvarṣaṃ ca devadevo maheśvaraḥ /
kareṇa dhārayāmāsa liṅgaṃ tīrthavaṭaṃ tadā

tasmāt puṇyatamaṃ tīrthamādyaṃ yatrodakaṃ sthitam /
tasmin snātaḥ sarvatīrthaiḥ snāto bhavati mānavaḥ

yastatra kurute śrāddhaṃ vaṭaliṅgasya cāntare /
tasya prītāśca pitaro dāsyanti bhuvi durlabham

pūritaṃ ta caco dṛṣṭvā ṛṣayaḥ sarva eva te /
pāṃśunā sarvagātrāṇi spṛśanti śraddhayā yutāḥ

te 'pi nirdhūtapāpāste pāṃśunā munayo gatāḥ /
pūjyamānāḥ suragaṇaiḥ prayātā brahmaṇaḥ padam

ye tu siddhā mahātmānaste liṅgaṃ pūjayanti ca /
vrajanti paramāṃ siddhiṃ punarāvṛttidurlabhām

evaṃ jñātvā tadā brahmā liṅgaṃ śailamayaṃ tadā /
ādyaliṅgaṃ tadā sthāpya tasyopari dadhāra tat

tataḥ kālena mahatā tejasā tasya rañjitam /
tasyāpi sparśanāt siddhaḥ paraṃ padamavāpnuyāt

tato devaiḥ punarbrahmā vijñapto dvijasattama /
ete yānti parāṃ siddhiṃ liṅgasya darśanānnarāḥ

tacchrutvā bhagavān brahmā devānāṃ hitakāmyayā /
uparyupari liṅgāni sapta tatra cakāra ha

tato ye miktikāmāśca siddhāḥ śamaparāyaṇāḥ /
sevya pāṃśuṃ prayatnena prayātāḥ paramaṃ padam

pāṃśavo 'pi kurukṣetre vāyunā samudīritāḥ /
mahāduṣkṛtakarmāṇaṃ prayānti paramaṃ padam

ajñānājjñānato vāpi striyo vā puruṣasya vā /
naśyate duṣkṛtaṃ sarvaṃ sthāṇutīrthaprabhāvataḥ

liṅgasya darśanānmuktiḥ sparśanācca vaṭasya ca /
tatsaṃnidhau jale snātvā prāpnotyabhimataṃ phalam

pitṛṇāṃ tarpaṇaṃ yastu jale tasmin kariṣyati /
bindo bindau tu toyasya anantaphalabhāgbhavet

yastu kṛṣṇatilaiḥ sārddha liṅgasya paścime sthitaḥ /
tarpayecchraddhayā yuktaḥ sa prīṇāti yugatrayam

yāvanmanvantaraṃ proktaṃ yāvalliṅgasya saṃsthitiḥ /
tāpatprītāśca pitaraḥ pibanti jalamuttamam

kṛte yuge sānnihatyaṃ tretāyāṃ vāyusaṃjñitam /
kalidvāparayormadhye kūpaṃ rudrahradaṃ smṛtam

caitrasya kṛṣṇapakṣe ca caturdaśyāṃ narottamaḥ /
snātvā rudrahrade tīrthe paraṃ padamavāpnuyāt

yastu vaṭe sthito rātriṃ dhyāyate parameśvaram /
sthāṇorvaṭaprasādena manasā cintitaṃ phalam