Vāmanapurāṇa, Saromāhātmya · Chapter 23

iti śrīvāmanapurāṇe saromāhātmye dvāviśo 'dhyāyaḥ
sanatkumāra uvāca /
brahmaṇo vacanaṃ śrutvā ṛṣayaḥ sarva eva te /
punareva ca papracchurjagataḥ śreyakāraṇam

brahmovāca/
gacchāmaḥ śaraṇaṃ devaṃ śūlapāṇiṃ trilocanam /
prasādād devadevasya bhaviṣyatha yathā purā

ityuktā brahmaṇā sārddha kailāsaṃ girimuttamam /
dadṛśuste samāsīnamumayā sahitaṃ haram

tataḥ stotuṃ samārabdho brahma lokapitāmahaḥ /
devādhidevaṃ varadaṃ trailokyasya prabhuṃ śivam

brahmovāca/
anantāya namastubhyaṃ varadāya pinākine /
mahādevāya devāya sthaṇave paramātmane

namo 'stu bhuvaneśāya tubhyaṃ tāraka sarvadā /
jñānānaṃ dāyako devastvamekaḥ puruṣottamaḥ

namaste padmagarbhāya padmeśāya namo namaḥ /
ghoraśāntisvarūpāya caṇḍakrodha namo 'stu te

namaste deva viśveśa namaste suranāyaka /
śūlapāṇe namaste 'stu namaste viśvabhāvana

evaṃ stuto mahādevo brahmaṇā ṛṣibhistadā /
uvāca mā bhairvrajata liṅgaṃ vo bhavitā punaḥ

kriyatāṃ madvayaḥ śīghraṃ yena me prītiruttamā /
bhaviṣyati pratiṣṭhāyāṃ liṅgasyātra na saṃśayaḥ

ye liṅgaṃ pūjayiṣyanti māmakaṃ bhaktimāśritāḥ /
na teṣāṃ durlabhaṃ kicid bhaviṣyati kadācana

sarveṣāmeva pāpānāṃ kṛtānāmapi jānatā /
śuddhyate liṅgapūjāyāṃ nātra kāryā vicāraṇā

yuṣmābhiḥ pātitaṃ liṅgaṃ sārayitvā mahātsaraḥ /
sāṃnihatyaṃ tu vikhyātaṃ tasmiñśīghraṃ pratiṣṭhitam

yathābhilaṣitaṃ kāmaṃ tataḥ prapsyatha brāhmaṇāḥ /
sthāṇurnāmnā hi lokeṣu pūjanīyo divaukasām

sthāṇvīsvare sthito yasmātstāṇvīśvarastataḥ smṛtaḥ /
ye smaranti sadā sthāṇuṃ te muktāḥ sarvakilbiṣaiḥ

bhaviṣyanti śuddhadehā darśanānmokṣagāminaḥ /
ityevamuktā devena ṛṣayo brahmaṇā saha

tasmād dāruvanālliṅgaṃ netuṃ samupacakramuḥ /
na taṃ cālayituṃ śaktāste devā ṛṣibhiḥ saha

śrameṇa mahatā yuktā brahmāṇaṃ śaraṇaṃ yayuḥ /
teṣāṃ śramābhitaptānāmidaṃ brahmābravīd vacaḥ

kiṃ vā śrameṇa mahatā na yūyaṃ vahanakṣamāḥ /
svecchayā pātitaṃ liṅgaṃ devadevena śūlinā

tasmāt tameva śaraṇaṃ yāsyāmaḥ sahitāḥ surāḥ /
prasannaśca mahādevaḥ svayameva nayiṣyati

ityevamuktā ṛṣayo devāśca brahmaṇā saha /
kailāsaṃ girimāsedū rudradarśanakāṅkṣiṇaḥ

na ca paśyanti taṃ devaṃ tataścintāsamanvitāḥ /
brahmāṇamūcurmunayaḥ kva sa devo maheśvaraḥ

tato brahma ciraṃ dhyātvā jñātvā devaṃ maheśvaram /
hastirupeṇa tiṣṭhantaṃ munibhirmānasaiḥ stutam

atha te ṛṣayaḥ sarve devāśca brahmaṇā saha /
gatā mahatsaraḥ puṇyaṃ yatra devaḥ svayaṃ sthitaḥ

na ca paśyanti taṃ devamanviṣyantastatastataḥ /
tataścintānvitā devā brahmaṇā sahitā sthitāḥ

pasyanti devīṃ suprītāṃ kamaṇḍaluvibhūṣitām /
prīyamāṇā tadā devī idaṃ vacanamabravīt

śrameṇa mahatā yuktā anviṣyanto maheśvaram /
pīyatāmamṛtaṃ devāstato jñāsyatha śaṅkaram /
etacchratvā tu vacanaṃ bhavānyā samudāhṛtam

sukhopaviṣṭāste devāḥ papustadamṛtaṃ śuci /
anantaraṃ sukhāsīnāḥ papracchuḥ parameśvarīm

kva sa deva ihāyāto hastirūpadharaḥ sthitaḥ /
darśitaśca tadā devyā saromadhye vyavasthitaḥ

dṛṣṭvā devaṃ harṣayuktāḥ sarve devāḥ saharṣibhiḥ /
brahmaṇamagrataḥ kṛtvā idaṃ vacanamabruvan

tvayā tyaktaṃ mahādeva liṅgaṃ trailokyavanditam /
tasya cānayane nānyaḥ samarthaḥ syānmaheśvara

ityevamukto bhagavān devo brahmādibhirharaḥ /
jagāma ṛṣibhiḥ sārddha devadāruvanāśramam

tatra gatvā mahādevo hastirūpadharo haraḥ /
kareṇa jagrāha tato līlayā parameśvaraḥ

tamādāya mahādevaḥ stūyamāno maharṣibhiḥ /
niveśayāmāsa tadā saraḥpārśve tu paścime

tato devāḥ sarva eva ṛṣayaśca tapodhanāḥ /
ātmānaṃ saphalaṃ daṣṭvā stavaṃ cakrurmaheśvare

namaste paramātman anantayone lokasākṣin parameṣṭhin bhagavan mahāviriñca mahāvibhūte mahākṣetrajña mahāpuruṣa sarvabhūtāvāsa manonivāsa ādideva mahādeva sadāśiva (5) īśāna durvijñeya durārādhya mahābhūteścara parameśvara mahāyogeśvara tryambaka mahāyogin parabrahman paramajyotiḥ brahmaviduttama oṅkāra vaṣaṭkāra svāhākāra svadhākāra paramakāraṇa sarvagata sarvadarśin sarvaśakte sarvadeva aja (10) sahasrārciḥ pṛṣārciḥ sudhāman haradhāma anantadhāma saṃvarta saṃkarṣaṇa vaḍavānala agnīṣomātmaka pavitra mahāpavitra mahāmegha mahāmāyādhara mahākāma kāmahan haṃsa paramahaṃsa mahārājika maheśvara mahākāmuka mahāhaṃsa bhavakṣayakara surasiddhārcita (15) hiraṇyavāha hiraṇyaretaḥ hiraṇyanābha hiraṇyāgrakeśa
muñjakeśin sarvalokavaraprada sarvānugrahakara kamaleśaya kuśeśaya hṛdayeśaya jñānodadhe śaṃbho vibho mahāyajña mahāyājñi ka sarvayajñamaya sarvaya5hṛdaya sarvayajñasaṃstuta nirāśraya (20) samudreśaya atrisaṃbhava bhaktānukampin abhagnayoga yogadhara vāsukimahāmaṇi- vidyotitavigraha haritanayana trilocana jaṭādhara nīlakaṇṭha candrārdhadhara umāśarīrārdhahara gajacarmadhara dustarasaṃsāramahāsaṃhārakara(25) prasīda bhaktajanavatsala evaṃ stuto devagaṇaiḥ subhaktyā sabrahāmukhyaiśca pitāmahena /
tyaktvā tadā hastirūpaṃ mahātmā liṅge tadā saṃnidhānaṃ cakāra