Vāmanapurāṇa, Saromāhātmya · Chapter 12

iti śrīvāmanapurāṇe saromāhātmye ekādaśo 'dhyāyaḥ
lomaharṣaṇa uvāca /
ityuṣervacanaṃ śrutvā mārkaṇḍeyasya dhīmataḥ /
nadī pravāhasaṃyuktā kurukṣetraṃ viveśa ha

tatra sā rantukaṃ prāpya puṇyatoyā sarasvatī /
kurakṣetraṃ samāplāvya prayātā paścimāṃ diśam

tatra tīrthasahasrāṇi ṛṣibhiḥ sevitāni ca/ tānyahaṃ kīrtayiṣyāmi prasādāt parameṣṭhinaḥ

tīrthānāṃ smaraṇaṃ puṇyaṃ darśanaṃ pāpanāśanam /
snānaṃ muktikaraṃ proktamapi duṣṭṛtakarmaṇaḥ

ye smaranti ca tīrthāni devatāḥ prīṇayanti ca /
snānti ca śraddadhānāśca te yānti paramāṃ gatim

apavitraḥ pavitro vā sarvāvasthāṃ gato 'pi vā /
yaḥ smaret kurukṣetraṃ sa bāhyābhyantaraḥ śuciḥ

kurukṣatraṃ gamiṣyāmi kurukṣetre vasāmyaham /
ityevaṃ vācamutsṛjya sarvapāṣaiḥ pramucyate

brahmajñānaṃ gayāśrāddhaṃ gograhe maraṇaṃ tathā /
vāsaḥ puṃsāṃ kurukṣetre muktiruktā caturvidhā

sarasvatīdṛṣadvatyordevanadyoryadantaram /
taṃ devanirmitaṃ deśaṃ brahmavartaṃ pracakṣate

dūrastho 'pi kurukṣetre gacchāmi ca vasāmyaham /
evaṃ yaḥ satataṃ brūyāt so 'pi pāṣaiḥ pramucyate

tatra caiva saraḥsnāyī sarasvatyāstaṭe sthitaḥ /
tasya jñānaṃ brahmamayamutpatsyati na saṃśayaḥ

devatā ṛṣayaḥ siddhāḥ sevante kurujāṅgalam /
tasya saṃsevanānnityaṃ brahma cātmani paśyati

cañcalaṃ hi manuṣyatvaṃ prāpya ye mokṣakāṅkiṇaḥ /
sevanti niyatātmāno api duṣkṛtakāriṇaḥ

te vimuktāśca kaluṣairanekajanmasaṃbhavaiḥ /
paśyanti nirmalaṃ devaṃ hṛdayasthaṃ sanātanam

brahmavediḥ kurukṣetraṃ puṇyaṃ sānnihitaṃ saraḥ

grahanakṣatratārāṇāṃ kālena patanād bhayam /
kurukṣetre mṛtānāṃ ca patanaṃ naiva vidyate

yatra brahmādayo devā ṛṣayaḥ siddhacāraṇāḥ /
gandharvāpsaraso yakṣāḥ sevanti sthānakāṅkṣiṇaḥ

gatvā tu śraddhāyā yuktaḥ snātvā sthāṇumahāhvade /
manasā cintitaṃ kāmaṃ labhate nātra saṃśayaḥ

niyamaṃ ta tataḥ kṛtvā gatvā saraḥ pradakṣiṇam /
rantukaṃ ca samāsādya kṣamayitvā punaḥ punaḥ

sarasvatyāṃ naraḥ snātvā yakṣaṃ dṛṣṭvā praṇamya ca /
puṣpaṃ dhūpaṃ ca naivaidyaṃ datvā vācamudīrayet

tava prasādād yakṣendra vānāni saritaśca yāḥ /
bhramiṣyāmi ca tīrthāni avighneṃ kuru me sadā