Vamana Purana · Chapter 69

iti śrīvāmanapurāṇe aṣṭaṣaṣṭitamo 'dhyāyaḥ
pulastya uvāca /
etanmayā puṇyatamaṃ purāṇaṃ tubhyaṃ tathā nārada kīrtitaṃ vai /
śrutvā ca kīrtyā parayā sameto bhaktyā ca viṣṇoḥ padamabhyupaiti

yathā pāpāni pūyante gaṅgāvārivigāhanāt /
tathā purāṇaśravaṇād duritānāṃ vināśanam

na tasya rogā jāyante na viṣaṃ cābhicārikam /
śarīre ca kule brahman yaḥ śruṇoti ca vāmanam

śraṇoti nityaṃ vidhivacca bhaktyā saṃpūjayan yaḥ praṇataśca viṣṇum /
sa cāśvamedhasya sadakṣiṇasya phalaṃ samagraṃ parihinapāpaḥ

prāpnoti dattasya suvarṇabhūmeraśvasya gonāgarathasya caiva nārī naraścāpi ca pādamekaṃ śṛṇvan śuciḥ puṇyatamaḥ pṛthivyām /
69.5 snāne kṛte tīrthavare supuṇye gaṅgājale naimiṣapuṣkare vā /
kokāmukhe yat pravadanti viprāḥ prayāgamāsādya ca māghamāse

sa tatphalaṃ prāpya ca vāmanasya saṃkīrtayan nānyamanāḥ padaṃ hi /
gacchenmayā nārada te 'dya coktaṃ yad rājasūyasya phalaṃ prayacchet

yad bhūmiloke suralokalabhye mahatsukhaṃ prāpya naraḥ samagram /
prāpanoti cāsya śravaṇānmaharṣe sautrāmaṇernāsti ca saṃśayo me

ratnasya dānasya ca yatphalaṃ bhaved yatsūryasya cendorgrahaṇe ca rāhoḥ /
annasya dānena phalaṃ yathoktaṃ bubhukṣite vipravare ca sāgnike

durbhikṣasaṃpīḍitaputrabhārye yāmī sadā poṣaṇatatpare ca /
devāgniviprarṣirate ca pitroḥ śuśruṣake bhrātari jyeṣṭhasāmne /
yattatphalaṃ saṃpravadanti devāḥ sa tat phalaṃ labhate cāsya pāṭhāt

caturdaśaṃ vāmanamāhuragryaṃ śrute ca yasyāghacayāśca nāśam /
prayānti nāstyatra ca saṃśayo me mahānti pāpānyapi nāradāśu

pāṭhāt saṃśravaṇād vipra śrāvaṇādapi kasyacit /
sarvapāpāni naśyanti vāmanasya sadā mude

idaṃ rahasyaṃ paramaṃ tavoktaṃ na vācyametaddharibhaktivarjite /
dvijasya nindāratihinadakṣiṇe sahetuvākyāvṛtapāpasattve

namo namaḥ kāraṇa vāmanāya nityaṃ yo vadenniyataṃ dvijaḥ /
tasya viṣṇuḥ padaṃ mokṣaṃ dadāti surapūjitaḥ

vācakāya pradātavya gobhūsvarṇavibhūṣaṇam /
vittaśāṭhyaṃ na kartavyaṃ kurvan śravaṇanāśakam

trisaṃdhyaṃ ca paṭhan śṛṇvan sarvapāpapraṇāśanam /
asūyārahitaṃ vipra sarvasampatpradāyakam