વામન પુરાણ · અધ્યાય 69

ઇતિ શ્રીવામનપુરાણે અષ્ટષષ્ટિતમો ઽધ્યાયઃ
પુલસ્ત્ય ઉવાચ ।
એતન્મયા પુણ્યતમં પુરાણં તુભ્યં તથા નારદ કીર્તિતં વૈ ।
શ્રુત્વા ચ કીર્ત્યા પરયા સમેતો ભક્ત્યા ચ વિષ્ણોઃ પદમભ્યુપૈતિ

યથા પાપાનિ પૂયન્તે ગઙ્ગાવારિવિગાહનાત્ ।
તથા પુરાણશ્રવણાદ્ દુરિતાનાં વિનાશનમ્

ન તસ્ય રોગા જાયન્તે ન વિષં ચાભિચારિકમ્ ।
શરીરે ચ કુલે બ્રહ્મન્ યઃ શ્રુણોતિ ચ વામનમ્

શ્રણોતિ નિત્યં વિધિવચ્ચ ભક્ત્યા સંપૂજયન્ યઃ પ્રણતશ્ચ વિષ્ણુમ્ ।
સ ચાશ્વમેધસ્ય સદક્ષિણસ્ય ફલં સમગ્રં પરિહિનપાપઃ

પ્રાપ્નોતિ દત્તસ્ય સુવર્ણભૂમેરશ્વસ્ય ગોનાગરથસ્ય ચૈવ નારી નરશ્ચાપિ ચ પાદમેકં શૃણ્વન્ શુચિઃ પુણ્યતમઃ પૃથિવ્યામ્ ।
69.5 સ્નાને કૃતે તીર્થવરે સુપુણ્યે ગઙ્ગાજલે નૈમિષપુષ્કરે વા ।
કોકામુખે યત્ પ્રવદન્તિ વિપ્રાઃ પ્રયાગમાસાદ્ય ચ માઘમાસે

સ તત્ફલં પ્રાપ્ય ચ વામનસ્ય સંકીર્તયન્ નાન્યમનાઃ પદં હિ ।
ગચ્છેન્મયા નારદ તે ઽદ્ય ચોક્તં યદ્ રાજસૂયસ્ય ફલં પ્રયચ્છેત્

યદ્ ભૂમિલોકે સુરલોકલભ્યે મહત્સુખં પ્રાપ્ય નરઃ સમગ્રમ્ ।
પ્રાપનોતિ ચાસ્ય શ્રવણાન્મહર્ષે સૌત્રામણેર્નાસ્તિ ચ સંશયો મે

રત્નસ્ય દાનસ્ય ચ યત્ફલં ભવેદ્ યત્સૂર્યસ્ય ચેન્દોર્ગ્રહણે ચ રાહોઃ ।
અન્નસ્ય દાનેન ફલં યથોક્તં બુભુક્ષિતે વિપ્રવરે ચ સાગ્નિકે

દુર્ભિક્ષસંપીડિતપુત્રભાર્યે યામી સદા પોષણતત્પરે ચ ।
દેવાગ્નિવિપ્રર્ષિરતે ચ પિત્રોઃ શુશ્રુષકે ભ્રાતરિ જ્યેષ્ઠસામ્ને ।
યત્તત્ફલં સંપ્રવદન્તિ દેવાઃ સ તત્ ફલં લભતે ચાસ્ય પાઠાત્

ચતુર્દશં વામનમાહુરગ્ર્યં શ્રુતે ચ યસ્યાઘચયાશ્ચ નાશમ્ ।
પ્રયાન્તિ નાસ્ત્યત્ર ચ સંશયો મે મહાન્તિ પાપાન્યપિ નારદાશુ

પાઠાત્ સંશ્રવણાદ્ વિપ્ર શ્રાવણાદપિ કસ્યચિત્ ।
સર્વપાપાનિ નશ્યન્તિ વામનસ્ય સદા મુદે

ઇદં રહસ્યં પરમં તવોક્તં ન વાચ્યમેતદ્ધરિભક્તિવર્જિતે ।
દ્વિજસ્ય નિન્દારતિહિનદક્ષિણે સહેતુવાક્યાવૃતપાપસત્ત્વે

નમો નમઃ કારણ વામનાય નિત્યં યો વદેન્નિયતં દ્વિજઃ ।
તસ્ય વિષ્ણુઃ પદં મોક્ષં દદાતિ સુરપૂજિતઃ

વાચકાય પ્રદાતવ્ય ગોભૂસ્વર્ણવિભૂષણમ્ ।
વિત્તશાઠ્યં ન કર્તવ્યં કુર્વન્ શ્રવણનાશકમ્

ત્રિસંધ્યં ચ પઠન્ શૃણ્વન્ સર્વપાપપ્રણાશનમ્ ।
અસૂયારહિતં વિપ્ર સર્વસમ્પત્પ્રદાયકમ્