Vamana Purana · Chapter 67

iti śrīvāmanapurāṇe ṣaṭṣaṣṭitamo 'dhyāyaḥ
pulastya uvāca /
gatvā rasātalaṃ daityo mahārhamaṇicitritam /
śuddhasphaṭisopānaṃ kārayāmāsa vai puram

tatra madhye suvistīrmaḥ prāsādo vajravedikaḥ /
muktājālāntaradvāro nirmito viśvakarmaṇā

tatrāste vividhān bhogān bhuñjan divyān sa mānuṣān /
nāmnā vindhyāvalītyevaṃ bhāryāsya dayitābhavat /
67.3 yuvatīnāṃ sahasrasya pradhānā śīlamaṇḍitā /
tayā saha mahātejā reme vairocanirmune

bhogāsaktasya daityasya vasataḥ sutale tadā /
daityatejoharaḥ prāptaḥ capātāle vai sudarśanaḥ

cakre praviṣṭe pātālaṃ dānavānāṃ pure mahān /
babhai halahalāśabdaḥ kṣubhitārṇavasaṃnibhaḥ

taṃ ca śrutvā mahāśabdaṃ baliḥ khaṅgaṃ samādade /
āḥ kimetaditītthañca papracchāsurapuṅgavaḥ

tato vindhyāvalī prāha sāntvayantī nijaṃ patim /
kośe khaṅgaṃ samāveśya dharmapatnī śucivratā

etad bhagavataścakraṃ daityacakrakṣayaṅkaram /
saṃpūjanīyaṃ daityendra vāmanasya mahātmanaḥ /
ityevamuktvā cārvaṅgī sārghapātrā viniryayau

athābhyāgāt sahasrāraṃ viṣṇoścakraṃ sudarśanam /
tato 'surapatiḥ prahvaḥ kṛtāñjalipuṭo mune /
saṃpūjya vidhivaccakramidaṃ stotramudīrayat

baliruvāca /
namasyāmi hareścakraṃ daityacakravidāraṇam /
sahasrāṃśuṃ sahasrābhaṃ sahasrāraṃ sunirmalam

namasyāmi hareścakraṃ yasya nābhyāṃ pitāmahaḥ /
tuṇḍe triśūladhṛk śarva ārāmūle mahādrayaḥ

areṣu saṃsthitā devāḥ sendrāḥ sārkāḥ sapāvakāḥ /
jave yasya sthito vāyurāpogniḥ pṛthivī nabhaḥ

āraprānteṣu jīmūtāḥ saudāminyṛkṣatārakāḥ /
bāhmato munayo yasya bālakhilyādayastathā

tamāyudhavaraṃ vande vāsudevasya bhaktitaḥ /
yanme pāpaṃ śarīrotthaṃ vāgjaṃ mānasameva ca

tanme dahasva dīptāṃśo viṣṇoścakra sudarśana /
yanme kulodbhavaṃ pāpaṃ paitṛkaṃ mātṛkaṃ tathā

tanme harasva tarasā namaste acyutāyudha /
ādhayo mama naśyantu vyādhayo yāntu saṃkṣayam /
tvannāmakīrtanāc cakra duritaṃ yātu saṃkṣayam

ityevamuktvā matimān samabhyarcyātha bhaktitaḥ //
saṃsmaran puṇḍarīkākṣaṃ sarvapāpapraṇāsanam

pūjitaṃ balinā cakraṃ kṛtvā nistejaso 'surān /
niścakrāmātha pātālād viṣuve dakṣime mune

sudarśane nirgate tu balirviklavatāṃ gataḥ /
paramāmāpadaṃ prāpya sasmāra svapitāmaham

sa cāpi saṃsmṛtaḥ prāptaḥ sutalaṃ dānaveśvaraḥ /
dṛṣṭvā tasthau mahātejāḥ sārghapātro balistadā

tamarcya vidhinā brahman pituḥ pitaramīśvaram /
kṛtāñjalipuṭo bhūtvā idaṃ vacanamabravīt /
67.22 saṃsmṛto 'si mayā tāta suviṣaṇṇena cetasā tanme hitaṃ ca pathyaṃ ca śreyogryaṃ vada tāta me /
67.23 kiṃ kāryaṃ tāta saṃsāre vasatā puruṣoṇa hi /
kṛtena yena vai nāsya bandhaḥ samupajāyate /
67.24 saṃsārārṇavamagnānāṃ narāṇāmalpacetasām /
taraṇe yo bhavet potastanme vyākhyātumarhasi

pulastya uvāca /
etadvacanamākarṇya tatpautrād dānaveśvaraḥ /
vicintya prāha vacanaṃ saṃsāre yadvitaṃ param // 67.26 //
prahlāda uvāca /
sādhu dānavaśārdūla yatte jātā matistviyam /
pravakṣyāmi hitaṃ te 'dya tathāneyeṣāṃ hitaṃ bale

bhavajaladhigatānāṃ dvāndvavātāhatānāṃ sutaduhitṛkalatratrāṇabhārārditānām /
viṣamaviṣayatoye majjatāmaplāvānāṃ bhavati śaraṇameko viṣṇupoto narāṇām

ye saṃśritā harimanantamanādimadhyaṃ nārāyaṇaṃ suraguruṃ śubhadaṃ vareṇyam /
śuddhaṃ khagendragamanaṃ kamalālayeśaṃ te dharmarājakaraṇaṃ na viśanti dhīrāḥ /
67.29 svapuruṣamabhivīkṣya pāśahastaṃ vadati yamaḥ kila tasya karṇamūle /
parihara madhusūdanaprannān prabhurahamanyanṛṇāṃ na vaiṣṇavānām

tathānyaduktaṃ narasattamena ikṣvākuṇā bhaktiyutena nūnam /
ye viṣṇubhaktāḥ puruṣāḥ pṛthivyāṃ yamasya te nirviṣayā bhavanti

sā jihvā yā hariṃ stauti taccittaṃ yattadarpitam /
tāveva kevalaṃ śalāghyau yau tatpūjākarau karau

nūnaṃ na tau karau proktau vṛkṣaśākhāgrapallavau /
na yau pūjituṃ śaktau haripādāmbujadvayam

nūnaṃ tatkaṇṭhaśālūkamathavā pratijihvakā /
rogovānyo na sā jihvā yā na vakti harerguṇān

śocanīyaḥ sa bandhūnāṃ jīvannapi mṛto naraḥ /
yaḥ pādapaṅkajaṃ viṣṇorna pūjayati bhaktitaḥ

ye narā vāsudevasya satataṃ pūjane ratāḥ /
mṛtā api na śocyāste satyaṃ satyaṃ mayoditam

śārīraṃ mānasaṃ vāgjaṃ mūrtāmūrtaṃ carācaram /
dṛśyaṃ spṛsyamadṛśyañca tatsarvaṃ keśavātmakam

yenārcito hi bhagavān caturdhā vai trivikramaḥ /
tenārcitā na saṃdeho lokāḥ sāmaradānavāḥ

yatā ratnāni jaladherasaṃkhyeyāni putraka /
tathā guṇā hi devasya tvasaṃkhyātāstu cakriṇaḥ

ye śaṅkhacakrābjakaraṃ saśārṅgiṇaṃ khagendraketuṃ varadaṃ śriyaḥ patim /
samāśrayante bhavabhītināśanaṃ saṃsāragarte na patanti te punaḥ

yeṣāṃ manasi govindo nivāsī satataṃ bale /
na te paribhavaṃ yānti na mṛtyorudvijanti ca

devaṃ sārṅgadharaṃ viṣṇuṃ ye prapannāḥ parāyaṇam /
na teṣāṃ yamasālokyaṃ na ca te narakaukasaḥ

na tāṃ gatiṃ prāpnuvanti śrutiśāstraviśāradāḥ /
viprā dānavaśārdūla viṣṇubhaktā vrajanti yām

yā gatirdaityaśārdūla hatānāṃ tu mahāhave /
tato 'dikāṃ gatiṃ yānti viṣṇubhaktā narottamāḥ

yā gatirdharmaśīlānāṃ sāttvikānāṃ mahātmanām /
sā gatirgaditā daitya bhagavatsevināmapi

sarvāvāsaṃ vāsudevaṃ sūkṣmamavyaktavigraham /
praviśanti mahātmānaṃ tadbhaktā nānyacetasaḥ

ananyamanaso bhaktyā ye namasyanti keśavam /
śucayaste mahātmānastīrthabhūtā bhavanti te

gacchan tiṣṭhan svapan jāgrat pibannaścannabhīkṣṇaśaḥ /
dhyāyan nārāyaṇaṃ yastu na tato 'nyo 'sti puṇyabhāk /
vaikuṇṭhaṃ khaḍgaparaśuṃ bhavabandhasamucchidam

praṇipatya yathānyāyaṃ saṃsāre na punarbhavet /
kṣetreṣu vasate nityaṃ krīḍannāste 'mitadyutiḥ

āsīnaḥ sarvadeheṣu karmabhirna sa badhyate /
yeṣāṃ viṣṇuḥ priyontyante viṣṇoḥ satataṃ priyāḥ

na te punaḥ sambhavanti tadbhaktāstatparāyaṇāḥ /
dhyāyed dāmodaraṃ yastu bhaktinamror'cayeta vā

na sa saṃsārapaṅke 'smin majjate dānaveśvara /
kalyamutthāya ye bhaktyā smaranti madhusūdanam /
stuvantyapyabhiśṛṇvanti durgaṇyatitaranti te

harivākyāmṛtaṃ pītvā vimalaiḥ śrotrabhājanaiḥ /
prahṛṣyati mano yeṣāṃ durgāṇyatitaranti te

yeṣāṃ cakragadāpāṇau bhaktiravyabhicāriṇī /
te yānti niyataṃ sthānaṃ yatra yogeśvaro hariḥ

viṣṇukarmaprasaktānāṃ bhaktānāṃ yā parā gatiḥ /
sā tu janmasahasreṇa na tapobhiravāpyate

kiṃ japyaistasya mantrairvā kiṃ tapobhiḥ kimāśramaiḥ /
yasya nāsti parā bhaktiḥ satataṃ madhusūdane

vṛthā yajñā vṛtā vedā vṛthā dānaṃ vṛthā śrutam /
vṛthā tapaśca kīrtiśca yo dveṣṭi madhusūdanam

kiṃ tasya bahurbharmantrairbhaktiryasya janārdane /
namo nārāyaṇāyeti mantraḥ sarvārthasādhakaḥ

viṣṇureva gatiryoṣāṃ kutasteṣāṃ parājayaḥ /
yeṣāmindīvaraśyāmo hṛdayastho janārdanaḥ

sarvamaṅgalamāṅgalyaṃ vareṇyaṃ varadaṃ prabhum /
nārāyaṇaṃ namaskṛtya sarvakarmāṇi kārayet

viṣṭayo vyatipātāśca ye 'nye durnītisambhavāḥ /
te nāma smaraṇādviṣṇornāsaṃ yānti mahāsura

tīrthakoṭisahasrāṇi tīrthakoṭiśatāni ca /
nārāyaṇapraṇāmasya kalāṃ nārhanti ṣoḍaśīm

pṛthivyāṃ yāni tīrthāni puṇyānyāyatanāni ca /
tāni sarvāṇyavāpnoti viṣṇornāmānukīrtanāt

prāpnuvanti na tāṃllokān vratino vā tapasvinaḥ /
prāpyante ye tu kṛṣṇasya namaskāraparairna raiḥ

yo 'pyanyadevatābhakto mithyārcayati keśavam /
so/'pi gacchati sādhūnāṃ sthānaṃ puṇyakṛtāṃ mahat

sātatyena hṛṣīkeśaṃ pūjayitvā tu yatphalam /
sucīrṇatapasāṃ nṝṇāṃ tatā phalaṃ na kadācana

trisandhyaṃ padmānābhaṃ tu ye smaranti sumedhasaḥ /
te labhantyupavāsasya phalaṃ nāsatyatra saṃśayaḥ

satataṃ śāstradṛṣṭena karmaṇā harimarcaya /
tatprasādāt parāṃ siddhiṃ bale prāpsyasi śāśvatīm

tanmanā bhava tadbhaktastadyājī taṃ namaskuru /
tamevāśritya deveśaṃ sukhaṃ prāpyasi putraka

ādyaṃ hyanantamajaraṃ harimavyayaṃ ca ye vai smarantyaharaharnṛvarā bhuvisthāḥ /
sarvatragaṃ śubhadaṃ brahmamayaṃ purāṇam te yānti vaiṣṇavapadaṃ dhruvamakṣayañca

ye mānavā vigatarāgaparāparajñā nārāyaṇaṃ suraguruṃ satataṃ smaranti /
te dhautapāṇḍurapuṭā iva rājahaṃsāḥ saṃsārasāgarajalasya taranti pāram

dhyāyanti ye satatamacyutamīśitāraṃ niṣkalmaṣaṃ pravarapadmadalāyatākṣam /
dhyānena tena hatakilbaṣavedanāste mātuḥ payodhararasaṃ na punaḥ pibanti

ye kīrtayanti varadaṃ varapadmanābhaṃ śaṅkhābjacakravaracāpagadāsihastam /
padmālayāvadanapaṅkajaṣaṭpadākhyaṃ nūnaṃ prayānti sadanaṃ madhughātinaste

śṛṇvanti ye bhaktiparā manuṣyāḥ saṃkīrtyamānaṃ bhagavantamādyam /
te muktapāpāḥ sukhino bhavanti yathāmṛtaprāśanatarpitāstu

tasmād dhyānaṃ smaraṇaṃ kīrtanaṃ vā nāmnāṃ śravaṇaṃ paṭhatāṃ sajjanānām /
kāryaṃ viṣṇoḥ śraddadhānairmanuṣyaiḥ pūjātulyaṃ tat praśaṃsanti devā

bāhyaistathāntaḥkaraṇairaviklavairyo nārcayet keśavamīśitaram /
puṣpaiśca patrairjalapallavādibhirnūnaṃ sa muṣṭo vidhitaskareṇa