Vamana Purana · Chapter 66

iti śrīvāmanapurāṇe pañcaṣaṣṭitamo 'dhyaḥ
nārada uvāca /
śrutaṃ yathā bhagavatā balirbaddho mahātmanā /
kiṃ tvastayanyattu praṣṭavyaṃ tacchrutvā kathayādya me

bhagavān devarājāya dattvā viṣṇustriviṣṭapam /
antardhānaṃ gataḥ kvāsau sarvātmā tāta kathyatām

sutalasthaśca daityendraḥ kimakārṣīt tathā vada /
kā ceṣṭā tasya viprarṣe tanme vyākhyātumarhasi

pulastya uvāca /
antardhāya surāvāsaṃ vāmano 'bhūdavāmanaḥ /
jagāma brahmasadanamadhiruhyoragāśanam

vāsudevaṃ samāyāntaṃ jñātvā brahmāvyayātmakaḥ /
samutthāyāyatha sauhārdāt sasvaje kamalāsanaḥ

pariṣvajyārcya vidhinā vedhāḥ pūjādinā harim /
papraccha kiṃ cireṇeha bhavatāgamanaṃ kṛtam /
66.6 athovāca jagatsvāmī mayā kāryaṃ mahatkṛtam /
surāṇāṃ kratubhāgārthaṃ svayaṃbho balibandhanam

pitāmahastad vacanaṃ śrutvā muditamānasaḥ /
kathaṃ kathamiti prāha tvaṃ māṃ darśitumarhasi

ityevamukte vacane bhagavān garuḍadhvajaḥ /
darśayāmāsa tadrūpaṃ sarvadevamayaṃ laghu

taṃ dṛṣṭvā puṇḍarīkākṣaṃ yojanāyutavistṛtam /
tāvānevordhvāmānena tato 'jaḥ praṇato 'bhavat

tataḥ praṇamya suciraṃ sādhu sādhvityudīrya ca /
bhaktitamro mahādevaṃ padmajaḥ stotramīrayat

oṃ namaste devādhideva vāsudeva ekaśṛṅga bahurūpa vṛṣākape bhūtabhāvatana surāsuravṛṣa surāsuramathana pītavāsaḥ śrīnivāsa asuranirmitānta amitanirmita kapila mahākapila viṣvaksena nārāyaṇa (5) dhruvadhvaja satyadhvaja khaṅgadhvaja tāladhvaja vaikuṇṭhaṃ puruṣottama vareṇya viṣṇo aparājita jaya jayanta vijaya kṛtāvarta mahādeva anāde ananta ādyāntamadhyanidhana purañjaya dhanañjaya śuciśrava pṛśnigarbha (10) kamalagarbha kamalāyatākṣa śrīpate viṣṇumūla mūlādhivāsa dharmādhivāsa dharmavāsa dharmādhyakṣa prajādhyakṣa gadādhara śrīdhara śrutidhara vanamālādhara lakṣmīdhara dharaṇīdhara padbhanāma (15) viriñje ārṣṭiṣeṇa mahāsena senādhyakṣa puruṣṭuta bahukalpa mahākalpa kalpanāmukha aniruddha sarvaga sarvātman dvādaśātmaka sūryātmaka somātmaka kālātmaka vyomātmaka bhūtātmaka (20) rasātmaka paramātman sanātana muñjakeśa harikeśa guḍākeśa keśava nīla sūkṣma sthūla pīta rakta śveta śvetādhivāsa raktāmbarapriya prītikara prītivāsa haṃsa nīlavāsa sīradhvaja sarvalokādhivāsa (25) kuśeśaya adhokṣaja govinda janārdana madhusūdana vāmana namaste /
sahasraśīrṣo 'si sahasradṛgasi sahasrapādo 'si tvaṃ kamalo 'si mahāpuruṣo 'si sahasrabāhurasi sahasramūrtirasi tvaṃ devāḥ prāhuḥ sahasravadanaṃ (30) tenamasta /
oṃ namaste viśvadeveśa viśvabhūḥ viśvātmaka viśvarūpa viśvasaṃbhava tvatto viśvāmidamabhavad brāhmaṇāstvanmukhebhyo 'bhavan kṣatriyā doḥsaṃbhūtāḥ ūruyugmād viso 'bhavan śūdrāścaraṇakamalebhyaḥ (35) nābhyā bhavato 'ntarikṣamajāyata indrāgnīvaktrato netrād bhānurabhūnmanasaḥ śaśāṅkaḥ ahaṃ prasādajastava krodhāt tryambakaḥ prāṇājjāto bhavato mātariśvā śiraso dyaurajāyata śrotrād diśo bhūriyaṃ caraṇādabhūtśrotrodbhavādiśobhavataḥ svayaṃbhonakṣatrāstejodbhavāḥ (40) mūrttayaścāmūrtayaśca sarve tvattaḥ samudbhūtāḥ /
ato viśvātmako 'si oṃ nāste puṣpahāso 'si mahāhāso 'si paramo 'si oṃ kāro 'si vaṣaṭkāro 'si svarāhākāro 'si vauṣaṭkāro 'si svadhākāro 'si vedamayo 'si tīrthamayo 'si yajamānamayo 'si (45) yajñamayo 'si sarvadhātāsi yajñabhoktāsi śukradhātāsi bhūrda bhuvarda svarda svarṇada goda amṛtado 'sīti /
oṃ brahmādirasi brahmayo 'si yajño 'si vedakāmo 'si vedyo 'si yajñadhāro 'si mahāmīno 'si mahāseno 'si mahāśirā asi /
(50) nṛkesaryasi hotāsi homyo 'si havyo 'si hūyamāno 'si hayamedho 'si potāsi pāvayitāsi pūto 'si pūjyo 'si dātāsi hanyamāno 'si hriyamāṇo 'si harttāsīti oṃ /
nītirasi netāsi agryo 'si viśvadhāmāsi śubhāṇḍo 'si dhruvo 'si āraṇeyo 'si (55) dhyāno 'si dhyeyo 'si jñeyo 'si jñāno 'si jñāno 'si yaṣṭāsi dāno 'si bhūmāsi īkṣyo 'si brahmāsi hotāsi udgātāsi gatimatāṃ gatirasi jñānināṃ jñānamasi yogināṃ yogo 'si mokṣagāmināṃ mokṣo 'si śrīmatāṃ śrīrasi gṛhyo 'si pātāsi paramasi (60) somo 'si sūryo 'si dīkṣāsi dakṣiṇāsi naro 'si trinayano 'si mahānayano 'si ādityaprabhavo 'si surottamo 'si śucirasi śukro 'si nabhosi nabhasyo 'si iṣo 'si ūrjo 'si saho 'si sahasyo 'si tapo 'si tapasyo 'si madhurasi (65) mādhavo 'si kālo 'si saṃkramo 'si vikramo 'si parākramo 'si aśvagrīvo 'si mahāmedho 'si śaṅkaro 'si hariśvoro 'si śaṃbhurasi brahmeśo 'si sūryo 'si mitrāvaruṇo 'si prāgvaṃśakāyo 'si bhṛtādirasi mahābhūto 'si ūrdhvakarmāsi karttāsi (70) sarvapāpavimocano 'si trivikramo 'si oṃ namas te
pulastya uvāca /
itthaṃ stutaḥ padmavena viṣṇustapasvibhiścādbhutakārmakārī /
provāca devaṃ prapitāmahaṃ tu varaṃ vṛṇīṣvāmalasattvavṛtte

tamabravīt prītiyutaḥ pitāmaho varaṃ mamehādya vibho prayaccha /
rūpeṇa puṇyena vibo hyanena saṃsthīyatāṃ madbhavane murāre

itthaṃ vṛte devavareṇa prādāt prabhustathāstviti tamavyayātmā /
tasthau hi rūpeṇa hi vāmanena saṃpūjyamānaḥ sadane svayaṃbhoḥ

nṛtyanti tatrāpsarasāṃ samūhya gāyanti gītāni surendragāyanāḥ /
vidyādharāstūryarāṃśca vādayan stuvanti devāsurasiddhasaṅghāḥ

tataḥ samārādhya vibhuṃ surādhipaḥ pitāmaho dhautamalaḥ sa śuddhaḥ /
svarge viriñciḥ sadanāt supuṣpāṇyānīya pūjāṃ pracakāra viṣṇoḥ

svarge sahasraṃ sa tu yojanānāṃ viṣṇoḥ pramāṇena hi vāmano 'bhūt tatrāsya śakraḥ pracakāra pūjāṃ svayaṃbhuvastulyaguṇāṃ maharṣe

etat tavoktaṃ bhagavāṃstrivikramaścakāra yad devahitaṃ mahātmā /
rasātalastho ditijaścakāra yattacchṛṇuṣvādya vadāmi vipra