Vamana Purana · Chapter 60

iti śrīvāmanapurāṇe ekonaṣaṣṭitamo 'dhyāyaḥ
pulastya uvāca /
namaste 'stu jagannātha devadevaṃ namo 'stu te /
vāsudeva namaste 'stu bahurūpa namo 'stu te

ekaśṛṅga namastubhyaṃ namastubhyaṃ vṛṣākape /
śrīnivāsa namaste 'stu namaste bhūtabhāvana

viṣvaksena namastubhyaṃ nārāyaṇa namo 'stu te /
dhruvadhvaja namasto 'stu satyadhvaja namo 'stu te

yajñadhvaja namastubhyaṃ dharmadhvaja namo 'stu te /
tāladhvaja namaste 'stu namaste garuhadhvaja

vareṇya viṣṇo vaikuṇṭha namaste puruṣottama /
namo jayanta vijaya jayānanta parājita

kṛtāvartada mahāvarta mahādeva namo 'stu te /
anādyādyanta madhyānta namaste padmajapriya

purañjaya namastubhyaṃ śatruñjaya namo 'stu te /
śubhañjaya namaste 'stu namaste 'stu dhanañjaya

sṛṣṭigarbha namastubhyaṃ śuciśravaḥ vṛthuśravaḥ /
namo hiraṇyagarbhāya padmagarbhāya te namaḥ

namaḥ kamalanetrāya kālanetrāya te namaḥ /
kālanābha namastubhyaṃ mahānābha namo namaḥ

vṛṣṭimūla mahāmūla mūlāvāsa namo 'stu te /
dharmāvāsa jalāvāsa śrīnivāsa namo 'stu te

dharmādhyakṣa prajādhyakṣa lokādhyakṣa namo namaḥ /
senādhyakṣa namastubhyaṃ kālādhyakṣa namo namaḥ

gadādhara śrutidhara cakradhārin śriyo dhara /
vanamālādhara hare namaste dharaṇīdhara

ārciṣeṇa mahāsena namaste 'stu puruṣṭuta /
vahukalpa mahākalpa namaste kalpanāmukha

sarvātman sarvaga vibho viriñce śveta keśava /
nīla rakta mahānīla aniruddha namo 'stu te

dvādaśātmaka kālātman sāmātman paramātmaka /
vyomakātmaka subrahman bhūtātmaka namo 'stu te

harikeśa mahākeśa guḍākeśa namo 'stu te /
muñjakeśa hṛṣīkeśa sarvanātha mano 'stu te

sukṣma sthūla mahāsthūla mahāsūkṣma śubhaṅkara /
śvetapītāmbaradhara nīlavāsa namo 'stu te

kuśeśaya namaste 'stu sīradhvaja najārdhana /
govinda prītikartā ca haṃsa pītāmbarapriya

adhokṣaja namastubhyaṃ sīradhvaja janārdana /
vāmanāya namaste 'stu namaste madhusūdana

sahasraśīrṣāya namo brahmaśīrṣāya te namaḥ /
namaḥ sahasranetrāya somasūryānalekṣama /

namaścātharvaśirase mahāśīrṣāya te namaḥ /
namaste dharmanetrāya mahānetrāya te namaḥ

namaḥ sahasrapādāya sahasrabhujamanyave /
namo yajñavarāhāya mahārūpāya te namaḥ

namaste viśvadevāya viśvātman viśvasaṃbhava /
viśvarūpa namaste 'stu tvatto viśvamabhūdidam

nyagrodhastavaṃ mahāśākhastvaṃ mūlakusumārcitaḥ /
skandhapatrāṅkuralatāpallavāya namo 'stu te

mūlaṃ te brāhmaṇā brahman skandhaste kṣatriyordiśaḥ /
nābhyā hyabhūdantarikṣaṃ śaśāṅko manasastava

brāhmaṇāḥ sāgnayo vaktrāḥ derdaṇḍāḥ sāyudhā nṛpāḥ /
pārśvād viśaśceruyugājjātāḥ śūdrāśca pādataḥ

netrād bhānurabhūt tubhyaṃ padbhyāṃ bhūḥ śrotrayordiśaḥ /
nābhyā hyabhūdantarikṣaṃ śaśāṅko manasastava

prāṇād vāyuḥ samabhavat kāmād brahmā pitāmahaḥ /
krodhāt trinayano rudraḥ śīrṣṇoḥ dyauḥ samavartata

indrāgnī vadanāt tubhyaṃ paśavo malasaṃbhavāḥ /
oṣadhyo romasaṃbhūtā virājastvaṃ namo 'stu te

puṣpahāsa namaste 'stu mahāhāsa namo 'stu te /
oṅkārastvaṃ vaṣaṭkāro vauṣaṭ tvaṃ ca svadhā sudhā

svāhākāra namastubhyaṃ hantakāra namo 'stu te /
sarvākāra nirākāra vedākāra namo 'stu te

tvaṃ hi vedamayo devaḥ sarvadevamayastathā /
sarvatīrthamayaścaiva sarvayajñamayastathā

namaste yajñapuruṣa yajñabhāgabhuje namaḥ /
namaḥ sahasradhārāya śatadhārāya te namaḥ

bhīrbhuvaḥsvaḥsvarūpāya godāyāmṛtadāyine /
suvarṇabrahmadātre ca sarvadātre ca te namaḥ

brahmeśāya namastubhyaṃ brahmāde brahmarūpadhṛk /
parabrahma namaste 'stu śabdabrahma namo 'stu te

vidyāstvaṃ vedyarūpastvaṃ vedanīyastvameva ca /
buddhistvamapi bodhyaśca bodhastvaṃ ca namo 'stu te

hotā homaśca havyaṃ ca hūyamānaścahavyāvāṭ /
pātā potā ca putaśca pāvanīyaśca oṃ namaḥ

hantā ca hanyamānaś ca hrimāṇastvameva ca /
harttā netā ca nītiśca pūjyo 'gryo viśvadhāryasi

sruksruvau paradhāmāsi kapālolūkhalo 'raṇiḥ /
yajñapātrāṇeyastvamekadhā bahudhā tridhā

yajñastvaṃ yajamānastvamīḍyastvamasi yājakaḥ /
jñātā jñeyastathā jñānaṃ dhyeyo dhyātāsi ceśvara

dhyānayogaśca yogī ca gatirmokṣo dhṛtiḥ sukham /
yogāṅgāni tvamīśānaḥ sarvagastvaṃ namo 'stu te

brahma hotā tathodgātā sāma yūpo 'ta dakṣiṇā /
dīkṣā tvaṃ tvaṃ puroḍāśastvaṃ paśuḥ paśuvāhyasi

guhyo dhātā ca paramaḥ śivo nārāyaṇastathā /
mahājano nirayanaḥ sahasrārkendurūpavān

dvādaśāro 'tha ṣaṇṇābhistrivyūho dviyugastathā /
kālacakro bhavānīśo namaste puruṣottamaḥ

parākramo vikramastvaṃ hayagrīvo harīśvaraḥ /
nareśvaro 'tha brahmeśaḥ sūryeśastvaṃ namo 'stu te

aśvavaktro mahāmedhāḥ śaṃbhuḥ śakraḥ prabhañjanaḥ /
mitrāvaruṇamūrtistvamamūrtiranaghaḥ paraḥ

prāgvaṃśakāyo bhūtādirmahābhūto 'cyuto dvijaḥ /
tvamūrdhvakarttā ūrdhvaś ca ūrdhvaretā namo 'stu te

mahāpātakahā tvaṃ ca upapātakahā tathā /
anīśaḥ sarvapāpebhyastvāmahaṃ śaraṇaṃ gataḥ

ityetat paramaṃ stotraṃ sarvapāpapramocanam /
maheśvareṇa kathitaṃ vārāṇasyāṃ purā mune

keśavasyāgrato gatvā snātvā tīrthe sitodake /
upaśāntastathā jāto rudraḥ pāpavaśāt tataḥ

etat pavitraṃ tripuradhnabhāṣitaṃ paṭhan naro viṣṇuparo maharṣe /
vimuktapāpo hyupaśāntamūrti saṃpūjyate devavaraiḥ prasiddhaiḥ