Vamana Purana · Chapter 57

iti śrīvāmanapurāṇo ṣṭpañcāśo 'dhyāyaḥ
pulastya uvāca /
tasmiṃstīrthavare snātvā dṛṣṭvā devaṃ trilocanam /
pūjayitvā suvarṇākṣaṃ naimiṣaṃ prayayau tataḥ

tatra tīrthasahasrāṇi triṃśatpāpaharāṇi ca /
tomtyāḥ kāñcanākṣyāśca gurudāyāśca madhyataḥ

teṣu snātvārcya deveśaṃ pītavāsasamacyutam /
ṛṣīnapi ca saṃpūjya naimiṣāraṇyavāsinaḥ

devadevaṃ tatheśānaṃ saṃpūjya vidhinā tataḥ /
gayāyāṃ gopatiṃ draṣṭuṃ jagāma sa mahāsuraḥ

tatra brahmadhvaje snātvā kṛtvā cāsya pradakṣiṇām /
piṇḍanirvapaṇaṃ puṇyaṃ pidṛṇāṃ sa cakāra ha

udapāne tathā snātvā tatrābhyarcya pitṝn vaśī /
gadāpāṇiṃ samabhyarcya gopatiṃ cāpi śaṅkaram

indratīrthe tathā snātvā saṃtarpya pitṛdevatāḥ /
mahānadījale snātvā sarayūmājagāma saḥ

tasyāṃ snātvā samabhyarcya gopratāre kuśeśayam /
upoṣya rajanīmekāṃ virajāṃ nagarīṃ yayau

snātvā virajase tīrthe dattvā piṇḍaṃ pitṝṃs tathā /
darśanārtha yayau śrīmān ajitaṃ puruṣottamam

taṃ dṛṣṭvā puṇḍarīkākṣamakṣaraṃ paramaṃ śuciḥ /
ṣaḍrātramuṣya tatraiva mahendraṃ dakṣiṇaṃ yayau

tatra devavaraṃ śaṃbhumarddhanārīśvaraṃ haram /
dṛṣṭvārcya saṃpūjya pitṝn mahendraṃ cottaraṃ gataḥ

tatra devavaraṃ śaṃbhuṃ gopālaṃ somapāyinam. dṛṣṭvā snātvā somatīrthe sahyācalamupāgataḥ

tatra snātvā mahodakyāṃ vaikuṇṭhaṃ cārcyaṃ bhaktitaḥ /
surān pitṛn samabhyarcya pāriyātraṃ giriṃ gataḥ

tatra snātvā lāhgalinyāṃ pūjayitvāparājitam /
kaśerudeśaṃ cābhayetya viśvarūpaṃ dadarśa saḥ

yatra devavaraḥ śaṃbhurgaṇānāṃ tu supūjitam /
viśvarūpamathātmānaṃ darśayāmāsa yogavit

tatra maṅkuṇikātoye snātvābhyaryya maheśvaram /
jagāmādriṃ sa saugandhi prahlādo malāyācalam

mahāhrade tataḥ snātvā pūjayitvā ca śaṅkaram /
tato jagāma yogātmā draṣṭuṃ vindhye sadāśivam

tato vipāśāsalile snātvābhyarcya sadāśivam /
trirātraṃ samupoṣyātha avantīṃ nagarīṃ yayo

tatra śiprājale snātvā viṣṇuṃ saṃpūjya bhaktitataḥ /
śmaśānasthaṃ dadarśātha mahākālavapurdharam

tasmin hi sarvasattvānāṃ tena rūpeṇa śaṅkaraḥ /
tāmasaṃ rūpamāsthāya saṃhāraṃ kurute vaśī

tatrasthena sureśena śvetakirnāma bhūpatiḥ /
rakṣitastvantakaṃ dagdhvā sarvabūtāpahāriṇam

tatrātihṛṣṭo vasati nityaṃ śarvaḥ sahomayā /
vṛtaḥ pramathakoṭībhirbahubhistridaśārcitaḥ

taṃ dṛṣṭvātha mahākālaṃ kālakālāntakāntakam /
yamasaṃyamanaṃ mṛtyormṛtyuṃ citravicitrakam

śmasānanilayaṃ śaṃbhuṃ bhūtanāthaṃ jagatpatim /
pūjayitvā śūladharaṃ jagāma niṣadhān prati

tatrāmareśvaraṃ devaṃ dṛṣṭvā saṃpūjya bhaktitaḥ /
mahodayaṃ samabhyetya hayagrīvaṃ dadarśa saḥ

aśvatīrthe tataḥ snātvā dṛṣṭvā ca turagānanam /
śrīdharaṃ caiva saṃpūjya pañcālaviṣayaṃ yayau

tatreśvaraguṇairyuktaṃ putramarthapateratha /
pāñcālikaṃ vaśī dṛṣṭvā prayāgaṃ parato yayau

snātvā sannihite tīrthe yāmune lokaviśrute /
dṛṣṭvā vaṭeśvaraṃ rudraṃ mādhavaṃ yogaśāyinam

dvāveva bhaktitaḥ pūjyau pūjayitvā mahāsuraḥ /
māghamāsamathopoṣya tato vārāṇasīṃ gataḥ

tato 'syāṃ varaṇāyaṃ ca tīrtheṣu ca pṛthak pṛthak /
sarvapāpaharādyeṣu snātvār'cya pitṛdevatāḥ

pradakṣimīkṛtya purīṃ pūjyāvimuktakeśavau /
lolaṃ divākaraṃ dṛṣṭvā tato madhuvanaṃ yayau

tatra svayaṃbhuvaṃ devaṃ dadarśāsurasattamaḥ /
tamabhyarcya mahātejāḥ puṣkarāraṇyamāgamat

teṣu triṣvapi tīrtheṣu snātvār'cya pitṛdevatāḥ /
puṣkarākṣamayogandhi brahmāṇaṃ cāpyapūjayat

tato bhūyaḥ sarasvatyāstīrthe trailokyaviśrute /
koṭitīrthe rudrakoṭiṃ dadarśa vṛṣabhadhvajam

naimiṣeyā dvijavarā māgadheyāḥ sasaindhavāḥ /
dharmāraṇyāḥ pauṣkareyā daṇḍakāraṇyakāstathā

cāmpeyā bhārukaccheyā devikātīragāśca ye /
te tatra śaṅkaraṃ draṣṭuṃ samāyātā dvijātayaḥ

koṭisaṃkhyāstapaḥ siddhā haradarśalālasāḥ /
ahaṃ pūrvamahaṃ pūrvamityevaṃ vādino mun

tān saṃkṣubdhān haro dṛṣṭvā maharṣīn dagdhakilbiṣān /
teṣāmevānukampārthaṃ koṭimūrttirabhūd bhavaḥ

tataste munayaḥ prītāḥ sarva eva maheśvaram /
saṃpūjayantastasthurvai tīrthaṃ kṛtvā pṛthak pṛthak /
ityevaṃ rudrakoṭīti nāmnā śaṃbhurajāyata

taṃ dadarśa mahātejāḥ prahlādo bhaktimān vaśī /
koṭitīrthe tataḥ snātvā tarpayitvā vasun pitṝn /
rudrakoṭiṃ samabhyarcya jagāma kurujāṅgalam

ta6 devavaraṃ sthāṇuṃ śaṅkaraṃ pārvatīpriyam /
sarasvatījale magnaṃ dadarśa surapūjitam

sārasvate 'mbhasi snātvā sthāṇuṃ saṃpūjya bhaktitaḥ /
snātvā dasāśvamedhe ca saṃpūjya ca surān pitṛn

sahasraliṅgaṃ saṃpūjya snātvā kanyāhrade śuciḥ /
abhivādya guruṃ śukraṃ somatīrthaṃ jagāma ha

tatra snātvār'cya ca pitṛn somaṃ saṃpūjya bhaktitataḥ /
kṣīrikāvāsamabhyetya snānaṃ cakre mahāyaśāḥ

pradakṣiṇīkṛtya taruṃ varuṇaṃ cārcya buddhimān /
bhūyaḥ kurudhvajaṃ dṛṣṭvā padmākhyāṃ nagarī gataḥ

tatrārcya mitrāvaruṇau bhāskarau lokapūjitau /
kumāradhārāmabhyetya dadarśa svāminaṃ vaśī

snātvā kapiladhārāyāṃ saṃtarpyārcya pitṛn surān /
dṛṣṭvā skandaṃ samabhyarcya narmadāyāṃ jagāma ha

tasyāṃ snātvā samabhyarcya vāsudevaṃ śriyaḥ patim /
jagāma bhūdharaṃ draṣṭuṃ vārāhaṃ cakradhāriṇam

snātvā kokāmuke tīrthe saṃpūjya dharaṇīdharam /
trisauvarṇaṃ mahādevamarbudeśaṃ jagāma ha

tatra nārīhrade snātvā pūjayitvā ca śaṅkaram /
kāliñjaraṃ samabhyetya nīlakaṇṭhaṃ dadarśa saḥ

nīlatīrthajale snātvā pūjayitvā tataḥ śivam /
jagāma sāgarānūpe prabhāse draṣṭumīśvaram

snātvā ca saṃgame nadyāḥ sarasvatyārṇaṃvasya ca /
someśvaraṃ lokapatiṃ dadarśa sa kapardinam

yo dakṣaśāpanirdagdhaḥ kṣayī tārādhipaḥ śaśī /
āpyāyitaḥ śaṅkareṇa viṣṇunā sakapardinā

tāvarcya devapravarau prajagāma mahālayam /
tatra rudraṃ samabhyarcya prajagāmottarān kurūn

padmanābhaṃ sa tatrarcya saptagodāvaraṃ yayau /
tatra snātvār'cya viśveśaṃ bhīmaṃ trailokyavanditam

gatvā dāruvane śrīmān liṅgaṃ sa dadarśa ha /
tamarcya brāhmaṇīṃ gatvā snātvār'cya tridaśeśvaram

plakṣāvataraṇaṃ gatvā śrīnivāsamapūjayat /
tataśca kuṇḍinaṃ gatvā saṃpūjya prāmatṛptidam

śūrpārake caturbāhuṃ pūjayitvā vidhānataḥ /
māgadhāraṇyamāsādya dadarśa vasudhādhipam

tamarcayitvā viśveśaṃ sa jagāma prajāmukham /
mahātīrthe tataḥ snātvā vāsudevaṃ praṇamya ca

śoṇaṃ śaṃprāpya saṃpūjya skamavarmāṇamīśvaram /
mahākośyāṃ mahādevaṃ haṃsākhyaṃ bhaktimānatha

pūjayitvā jagāmātha saindhavāraṇyamuttamam /
tatreśvaraṃ sunetrākhyaṃ śaṅkhaśūladharaṃ gurum /
pūjayitvā mahābāhuḥ prajāgāma triviṣṭapam

tatra devaṃ maheśānaṃ jaṭādharamiti śrutam /
taṃ dṛṣṭvār'cya hariṃ cāsau tīrthaṃ kanakhalaṃ yayau

tatrārcya bhadrakālīśaṃ vīrabhadraṃ ca dānavaḥ /
dhanādhipaṃ ca meghaṅkaṃ yayāvatha girivrajam

tatra devaṃ paśupatiṃ lokanāthaṃ maheśvaram /
saṃpūjayitvā pidhivatkāmarūpaṃ jagāma ha

śaśiprabhaṃ devavaraṃ trinetraṃ saṃpūjayitvā saha vai mṛḍānyā /
jagāma tīrthapravaraṃ mahākhyaṃ tasmin mahādevamapūjayat

tatastrikūṭaṃ girimatriputraṃ jagāma draṣṭuṃ sa hi cakrapāṇinam /
tamīḍya bhaktyā tu gajendrasokṣaṇaṃ jajāpa japyaṃ paramaṃ pavitram

tatroṣya daityeśvarasūnurādarānmāsatrayaṃ mūlaphalāmbubhakṣī /
nivedya viprapravareṣu kāñcanaṃ jagāma ghoraṃ sa hi daṇḍakaṃ vanam

tatra divyaṃ mahāśākhaṃ vanaspativapurdharam /
dadarśa puṇḍarīkākṣaṃ mahāśvāpadavāraṇam

tasyādhasthāt trirātraṃ sa mahābhāgavato 'suraḥ /
sthitaḥ sthiṇḍilaśāyī tu paṭhan sārasvataṃ stavam

tasmāt tīrthavaraṃ vidvān sarvapāpapramocanam /
jagāma dānavo draṣṭuṃ sarvapāpaharaṃ harim

tasyāgrato jajāpāsau stavau pāpapraṇāśanau /
yau purā bhagavān prāha kroḍarūpī janārdanaḥ

tasmādathāgād daityendraḥ śālagrāmaṃ mahāphalam /
yatra saṃnihito viṣṇuścareṣu sthāvareṣu ca / /
57.72 tatra sarvagataṃ viṣṇuṃ matvā cakre ratiṃ balī /
pūjayan bhagavatpādau mahābhāgavato mune

iyaṃ tavoktā munisaṃghajuṣṭā prahlādatīrthānugatiḥ supuṇyā /
yatkīrttanācchravaṇāt sparśanācca vimuktapāpā manujā bhavanti