Vamana Purana · Chapter 55

iti śrīvāmanapurāṇe catuṣpañcāśo 'dhyāyaḥ
pulastya uvāca /
irāvatīmanuprāpya puṇyāṃ tāmṛṣikanyakām /
strātvā saṃpūjayāmāsa caitrāṣṭamyāṃ janārdanam

nakṣatrapuruṣaṃ cīrtvā vrataṃ puṇyapradaṃ śuciḥ /
jagāma sa kurukṣetraṃ prahlādo dānaveśvaraḥ

airāvatena mantreṇa cakratīrthaṃ sudarśanam /
upāmantrya tataḥ sasnau vedoktavidhinā mune

upoṣya kṣaṇadāṃ bhaktyā pūjiyatvā kurudhvajam /
kṛtaśaucau jagāmātha draṣṭuṃ puruṣakesarim

snātvā tu devikāyāṃ ca nṛsiṃhaṃ pratipūjya ca /
tatreṣya rajanomekāṃ gokarṇaṃ dānavo yayau

tasmin snātvā tathā prācīṃ pūjyeśaṃ viśvakarmiṇam /
prācīne cāpare daityo draṣṭuṃ kāmeśvaraṃ yayau

tatra snātvā ca dṛṣṭvā ca pūjayitvā ca śaṅkaram /
draṣṭuṃ yayau ca prahlādaḥ puṇḍarīkaṃ mahāmbhasi

tatra snātvā ca dṛṣṭvā ca saṃtarpya pitṛdevatāḥ /
puṇḍarīkaṃ ca saṃpūjya uvāsa divasatrayam

viśākhayūpe tadanu dṛṣṭvā devaṃ tathājitam /
snātvā tathā kṛṣṇatīrthe trirātraṃ nyavasacchuciḥ

tato haṃsapade haṃsaṃ dṛṣṭvā saṃpūjya ceśvaram /
jagāmāsau payoṣṇāyāmakhaṇḍaṃ draṣṭumīśvaram

snātvā payoṣṇyāḥ salile pūjyākhaṇḍaṃ jagatpatim /
draṣṭuṃ jagāma matimān vitastāyāṃ kumārilam

tatra snātvār'cya deveśaṃ bālakhilyairmarīciṣaiḥ /
ārādhyāmānaṃ yadyatra kṛtaṃ pāpapraṇāśanam

yatra sā surabhirdevī svasutāṃ kapilāṃ śubhām /
devapriyārthamasṛjaddhitārthaṃ jagatastathā

tatra devahrade snātvā śaṃbhuṃ saṃpūjya bhaktitaḥ /
vidhivaddadhi ca prāśya maṇimantaṃ tato yayau

tatra tīrthavare snātvā prājāpatye mahāmatiḥ' dadarśa śaṃbhu brahmāṇaṃ deveśaṃ ca prajāpatim

vidhānatastu tān devān pūjayitvā tapodhana /
ṣaḍrātraṃ tatra ca sthitvā jagāma madhunandinīm

madhumatsalile snātvā devaṃ cakradharaṃ haram /
śūlabāhuṃ ca govindaṃ dadarśa danupuṅgavaḥ

nārada uvāca/ /
kimarthaṃ bhagavān śambhurdadhārātha sudarśanam /
śūlaṃ tathā vāsudevo mamaitad brūhi pṛcchataḥ

pulastya uvāca /
śrūyatāṃ kathayiṣyāmi kathāmetāṃ purātanīm /
kathayāmāsa yāṃ viṣṇurbhaviṣyamanave purā

jalodbhavo nāma mahāsurendro ghoraṃ sa taptvā tapa ugravīryaḥ /
ārādhayāmāsa virañcimārāt sa tasya tuṣṭo varado babhūva

devāsurāṇāmajayo mahāhave nijaiśca śastrairamarairavadhyaḥ /
brahmarṣiśāpaiśca nirīpsitārtho jale ca vahnau svaguṇopaharttā

evaṃprabhāvo danupuṅgavo 'sau devān maharṣīn nṛpatīn samagrān /
ābādhamāno vicacāra bhūmyāṃ sarvāḥ kriyā nāśayadugramūrtiḥ

tato 'marā bhūmibhavāḥ sabhūpāḥ jagmuḥ śaraṇyaṃ harimīśitāram /
taiścāpi sārddha bhagavāñjagāma himālayaṃ yatra harastrinetraḥ

saṃmantrya devarṣihitaṃ ca kāryaṃ matiṃ ca kṛtvā nidhanāya śatroḥ /
nijāyudhānāṃ ca viparyayaṃ tau devādhipau cakraturugrakarmiṇau

tataś cāsau dānavo viṣṇuśarvau samāyātau tajjighāṃsū sureśau /
matvājeyau śatrubhirghorarupau bhayāstoye nimnagāyāṃ viveśa

jñātvā pranaṣṭaṃ tridivendraśatruṃ nadīṃ viśālāṃ madhumatsupuṇyām /
dvayoḥ saśastrau taṭayorharīśau pracchannamūrtī sahasā babhūvatuḥ

jalodbhavaścāpi jalaṃ vimucya jñātvā gatau śaṅkaravāsudevau /
diśassamīkṣya bhayakātarākṣo durgaṃ himādriṃ ca tadāruroha

mahīdhraśṛṅgopari viṣṇuśambhū cañcūryamāṇaṃ svaripuṃ ca dṛṣṭvā /
vegādubhau duduvatuḥ saśastrau viṣṇustriśūlī giriśaśca cakrī

tābhyāṃ sa dṛṣṭastridaśottamābhyāṃ cakreṇa śūlena ca binnadehaḥ /
papāta śailāt tapanīyavarṇo yathāntarikṣād vimalā ca tārā

evaṃ triśulaṃ ca dadhāra viṣṇuścakraṃ trinetro 'pyarisūdanārtham /
yatrāghahantrī hyabhavad vitastā harāṅghripātācchiśirācalāttu

tatprāpya tīrthaṃ tridaśādhipābhyāṃ pūjāṃ ca kṛtvā hariśaṅkarābhyām /
upoṣya bhaktyā himavantamāgād draṣṭuṃ girīśaṃ śivaviṣṇuguptam

taṃ samabhyarcca vidhivad dattvā dānaṃ dvijātiṣu /
vistute himavatpāde bhṛgutuṅgaṃ jagāma saḥ

yatreśvaro devavarasya viṣṇoḥ prādādrathāṅgapravarāyudhaṃ vai /
yena praciccheda tridhaiva śaṅkaraṃ jijñāsamāno 'strabalaṃ mahātmā