Vamana Purana · Chapter 54

iti śrīvāmanapurāṇe tripañcāśo 'dhyāyaḥ
nārada uvāca /
purūravā dvijaśreṣṭha yathā devaṃ śriyaḥ patim /
nakṣatrapuruṣākhyena ārādhayata tad vada

pulastya uvāca /
śrūyatāṃ kathayiṣyāmi nakṣatrapuruṣavratam /
nakṣatrāṅgani devasya yāni yānīha nārada

mūlarkṣaṃ caraṇau viṣṇorjaṅghe dve rohiṇī smṛte /
dve jānunī tathāśvinyau saṃstite rūpadhārimaḥ

āṣāḍhaṃ dve dvayaṃ corvorguhyasthaṃ phālgunīdvayam /
kaṭisthāḥ kṛttikāścaiva vāsudevasya saṃsthitāḥ

prauṣṭhapadyādvayaṃ pārśve kukṣibhyāṃ revatī sthitā /
uraḥsaṃsthā tvanurādhā śraviṣṭhā pṛṣṭhasaṃsthitā

viśākhā bhujayorhastaḥ karadvayamudāhṛtam /
punarvasurathāṅgulyo nakhāḥ sārpaṃ tathocyate

grīvāsthaitā tathā jyeṣṭhā śravaṇaṃ karṇayoḥ sthitam /
mukhasaṃsthastathā puṣyaḥ svātirdantāḥ prakīrtitāḥ

hanū dve vāruṇaścokto nāsā paitra udāhṛtaḥ /
mṛgaśīrṣaṃ nayanayo rūpadhāriṇi tiṣṭhati

citrā caiva lalāṭe tu bharaṇī tu tathā śiraḥ /
śiroruhasthā caivārdrā nakṣatrāṅgamidaṃ hareḥ

vidhānaṃ saṃpravakṣyāmi yathāyogena nārada /
saṃpūjito hariḥ kāmān vidadhāti yathepsitān

caitramāse sitāṣṭamyāṃ yadā mūlagataḥ śaśī /
tadā tu bhagavatpādau pūjayet tu vidhānataḥ /
nakṣatrasannidhau dadyād viprendrāya ca bhojanam

jānunī cāśvinīyoge pūjayedatha bhaktitaḥ /
dohade ca haviṣyānnaṃ pūrvavad dvijabhojanam

āṣāḍhābhyāṃ tathā dvābhyāṃ dvāvūrū pūjayed budhaḥ /
salilaṃ śiśiraṃ tatra dohade ca prakīrtitam

phālgunīdvitaye guhyaṃ pūjanīyaṃ vicakṣaṇaiḥ /
dodahe ca payo gavyaṃ deyaṃ ca dvijabhojanam

kṛttikāsu kaṭiḥ pūjyā sopavāso jitendriyaḥ /
deyañca dohadaṃ viṣṇoḥ sugandhakusumodakam

pārśve bhādrapadāyugme pūjayitvā vidhānataḥ /
guḍaṃ salehakaṃ dadyād dohade devakīrtitam

dve kukṣī revatīyoge dohade mudgamodakāḥ /
anurādhāsu jaṭharaṃ ṣaṣṭhikānnaṃ ca dohade

śraviṣṭhāyāṃ tathā pṛṣṭhaṃ sālibhaktaṃ ca dohade /
bhujayugmaṃ viśākhāsu dohade paramodanam

haste hastau tathā pūjyau yāvakaṃ dohade smṛtam /
punarvasāvaṅgulīśca paṭolastatra dohade

āśleṣāsu nakhān pūjya dohade tittirāmiṣam /
jyeṣṭhāyāṃ pūjayed grīvāṃ dohade tilamodakam

śravaṇe śravaṇau pūjyau dadhibhaktaṃ ca dohade /
puṣye mukhaṃ pūjayeta dohade ghṛtapāyasam

svātiyoge ca daśanā dohade tilaśaṣkulī /
dātavyā keśavaprītyai brahmaṇasya ca bhojanam

hanū śatabhiṣāyoge pūjayecca prayatnataḥ /
priyaṅguraktaśālyannaṃ dohadaṃ madhuvidviṣaḥ

maghāsu nāsikā pūjyā madhu dadyācca dohade /
mṛgottamāṅge nayane mṛgamāṃsaṃ ca dohade

citrāyoge lalāṭaṃ ca dohade cārubhojanam /
bharaṇīṣu śiraḥ pūjyaṃ cāru bhaktaṃ ca dohade

saṃpūjanīyā vidvadbhirārdrāyoge śiroruhāḥ /
viprāṃśca bhojayed bhaktayā dohade ca guḍārdrakam

nakṣetrayogeṣveteṣu sampūjya jagataḥ patim /
pārite dakṣiṇāndadyāt strīpuṃsoścāruvāsasī

chatropānatśvetayugaṃ sapta dhānyāni kāñcanam /
ghṛtapātraṃ ca matiman brāhmaṇāya nivedayet

pratinakṣatrayogena pūjanīyā dvijātayaḥ /
nakṣatramaya evaiṣa puruṣaḥ śāśvato mataḥ

nakṣatrapuruṣākhyaṃ hi vratānāmuttamaṃ vratam /
pūrvaṃ kṛtaṃ hi bhṛguṇā sarvapātakanāśanam

aṅgopāṅgāni devarṣe pūjayitvā jagadguroḥ /
surūpāmyabhijāyante pratyaṅgaṅgāni caiva hi

saptajanmakṛtaṃ pāpaṃ kulasaṃgāgataṃ ca yat /
pitṛmātṛsamutthaṃ ca tatsarvaṃ hanti keśavaḥ

sarvāṇi bhadrāṇyāpnoti śarīrārogyamuttamam /
anantāṃ manasaḥ prītiṃ rūpaṃ cātīva śobhanam

vāṅmādhuryaṃ tathā kānti yaccānyadabhivāñchitam /
dadāti nakṣatrapumān pūjitastu janārdanaḥ

upoṣya samyageteṣu krameṇarkṣeṣu nārada /
arundhatī mahābhāgā khyātimagryāṃ jagāma ha

ādityastanayārthāya nakṣatrāṅgaṃ janārdanam /
saṃpūjayitvā govindaṃ revantaṃ putramāptavān

rambhā rūpamavāpāgryaṃ vāṅmādhuryaṃ ca menakā /
kānti vidhuravāpāgryāṃ rājyaṃ rājā pūrūvāḥ

evaṃ vidhānato brahmannakṣatrāṅgo janārdanaḥ /
pūjito rūpadhārī yaistaiḥ prāptā tu sukāmitā

etat tavoktaṃ paramaṃ pavitraṃ dhanyaṃ yaśasyaṃ śubharūpadāyi /
nakṣatrapuṃsaḥ paramaṃ vidhānaṃ śṛṇuṣva puṇyāmiha tīrthayātrāma