Vamana Purana · Chapter 50

iti śrīvāmanapurāṇe ekonapañcāśo 'dhyāyaḥ
pulastya uvāca /
gate trailokyarājye tu dānaveṣu purandaraḥ /
jagāma brahmasadanaṃ saha devaiḥ śacīpatiḥ

tatrāpaśyat sa deveśaṃ brahmāṇaṃ kamalodbhavam /
ṛṣibhiḥ sārdhamāsīnaṃ pitaraṃ svaṃ ca kaśyapam

tato nanāma śirasā śakraḥ suragaṇaiḥ saha /
brahmāṇaṃ kaśyapaṃ caiva tāṃśca sarvāstapodhanān

provācendraḥ suraiḥ sārdha devanāthaṃ pitāmaham /
pitāmaha hṛtaṃ rājyaṃ balinā balinā mama

brahmā provāca śakraitad bhujyate svakṛtaṃ phalam /
śakraḥ papraccha bho brūhi kiṃ mayā duṣkṛtaṃ kṛtam

kaśyapo 'pyāha deveśaṃ bhrūṇahatyā kṛtā tvayā /
dityudarāt tvayā garbhaḥ kṛtto vai bahudhā balāt

pitaraṃ prāha devendraḥ sa māturdeṣato vibho /
kṛntanaṃ prāptavān garbho yadaśaucā hi sā bhavat

tato 'bravīt kaśyapastu māturdeṣaḥ sa dāsatām /
gatastato vinihato dāso 'pi kuliśena bho

tacchrutvā kaśyapavacaḥ prāha śakraḥ pitāmaham /
vināśaṃ pāpmano brūhi prāyaścittaṃ vibho mama

brahmā provāca deveśaṃ vaśiṣṭhaḥ kaśyapastathā /
hitaṃ sarvasya jagataḥ śakrasyāpi viśeṣataḥ

śaṅkhacakragadāpāṇirmādhavaḥ puruṣottamaḥ /
taṃ prapadyasva śaraṇaṃ sa te śreyo vidhāsyati

sahasrākṣo 'pi vacanaṃ gurūṇāṃ sa niśamya vai /
provāca svalpakālena kasmin prāpyo bahūdayaḥ /
tamūcurdevatā martye svalpakāle mahodayaḥ

ityevamuktaḥ surarāḍ viriñcinā marīciputreṇa ca kaśyapena /
tathaiva mitrāvaruṇātmajena vegānmahīpṛṣṭhamavāpya tasthau

kāliñjarasyottarataḥ supuṇyastathā himādrerapi dakṣiṇasthaḥ /
suśasthalāt pūrvata eva viśruto vasoḥ purāt piścimato 'vatasthe

pūrvaṃ gayena nṛvarema yatra yaṣṭo 'śvamedhaḥ śatakṛtsadakṣiṇaḥ /
manuṣyemedhaḥ śatakṛtsahasrakṛnnarendrasūyaśca sahasrakṛd vai

tathā purā duryajanaḥ surāsuraiḥ khyāto mahāmedha iti prasiddhaḥ /
yatrāsya cakre bhagavān murāriḥ vāstavyamavyaktatanuḥ khamūrtimat /
khyātiṃ jagāmātha gadādhareti mahāghavṛkṣasya śitaḥ kuṭhāraḥ

yasmin dvijendrāḥ śrutiśāstravarjitāḥ samatvamāyānti pitāmahena /
sakṛt pitṛn yatra ca saṃprapūjya bhaktyā tvananyena hi cetasaiva /
phalaṃ mahāmedhamakhasya mānavā labhantyanantyaṃ bhagavatprasādāt

mahānadī yatra surarṣikanyā jalāpadeśāddhimaśailametya /
cakre jagatpāpavinaṣṭimagryāṃ saṃdarśanaprāśanamañjanena

tatra śakraḥ samabhyetya mahānadyāstaṭe 'dbhute /
ārādhanāya devasya kṛtvāśramamavasthitaḥ

prātaḥsnāyī tvadhaḥśāyī ekabhaktastvayācitaḥ /
tapastepe sahasrākṣaḥ stuvan devaṃ gadādharam

tasyaivaṃ tapyataḥ smayagjitasarvendriyasya hi /
kāmakrodhavihīnasya sāgraḥ saṃvatsaro gataḥ

tato gadādharaḥ prīto vāsavaṃ prāha nārada /
gaccha prīto 'smi bhavato muktapāpo 'si sāmpratam

nijaṃ rājyaṃ ca deveśa prāpsyase na cirādiva /
yatiṣyāmi tathā śakra bhāvi śreyo yatā tava

ityevamukto 'tha gadādhareṇa visarjitaḥ snāpya manoharāyām /
snātasya devasya tadainaso narāstaṃ procurasmānanusāsayasva

provāca tān bhīṣaṇakarmakārān nāmnā pulindān mama pāpasaṃbhavāḥ /
vasadhvamevāntaramadrisukhyayorhimādrikāliñjarayoḥ pulindāḥ

ityevamuktvā surarāṭ pulindān vimuktapāpo 'marasiddhayakṣaiḥ /
saṃpūjyamāno 'nujagāma camaṃ mātustadā dharmanivāsamīḍyam

dṛṣṭvāditiṃ mūrdhni kṛtāñjalistu vināmramauliḥ samupājagām /
praṇamya pādau kamalodarābhau nivedayāmāsa tapastadātmanaḥ

papraccha sā kāraṇamīśvaraṃ tam āghrāya cāliṅgya sahāśrudṛṣṭyā /
sa cācacakṣe balinā raṇe jayaṃ tadātmano devagaṇaiśca sārdham

śrutvaiva sā śokapariplutāṅgī jñātvā jitaṃ daityasutaiḥ sutaṃ tam /
duḥkhānvitā devamanādyamīḍyaṃ jagāma viṣṇuṃ śaraṇaṃ vareṇyam

nārada uvāca /
kasmin janitrī surasattamānāṃ sthāne hṛṣīkeśamanantamādyam /
carācarasya prabhavaṃ purāṇamārādhayāmāsa śubhe vada tvam

pulastya uvāca /
surāraṇiḥ śakramavekṣya dīnaṃ parājitaṃ dānavanāyakena /
site 'tha pakṣe marārkṣager'ke ghṛtārciṣaḥ syādatha saptame 'hni / /
50.31 dṛṣṭvaive devaṃ tridaśādhipaṃ taṃ mahodaye śakradiśādhirūḍham /
nirāśanā saṃyatavāk sucitā tadopatasthe śaraṇaṃ surendram

aditiruvāca /
jayasva divyāmbujakośacaura jayasva saṃsārataroḥ kuṭhāra /
jayasva pāpendhanajātavedastamaughasaṃrodha namo namaste

namo 'su te bhāskara divyamūrte trailokyalakṣmītilakāya te namaḥ /
tvaṃ kāraṇaṃ sarvacarācarasya nātho 'si māṃ pālaya viśvamūrte

tvayā jagannātha jaganmayena nāthena śakro nijarājyahānim /
avāptāvān śatruparābhavaṃ ca tato bhavantaṃ śaraṇaṃ prapannā

ityevamuktvā surupūjitaṃ sā ālikhya raktena hi candanena /
saṃpūjayitvā karavīrapuṣyaiḥ saṃdhūpya dhūpaiḥ kaṇamarkabhojyam

nivedya caivājyayutaṃ mahārhamannaṃ mahendrasya hitāya devī /
stavena puṇyena ca saṃstuvantī sthitā nirāhāramathopavāsam

tato dvitīye 'hni kṛtapraṇāmā snātvā vidhānena ca pūjayitvā /
dattvā dvijebhyaḥ kaṇakaṃ tilājyaṃ tato 'grataḥ sā prayatā babhūva

tataḥ prīto 'bhavad bhānurghṛtārciḥ sūryamaṇḍalāt /
viniḥsṛtyayāgrataḥ sthitvā idaṃ vacanamabravīt

vratetānena suprītastavāhaṃ dakṣanandini /
prāpsyase durlabhaṃ kāmaṃ matprasādānna saṃśayaḥ

rājyaṃ tvattanayānāṃ vai dāsye devi surāraṇi /
dānavān dhvaṃsayiṣyāmi saṃbhūyaivodare tava

tad vākyaṃ vāsudevasya śrutvā brahman surāraṇiḥ /
provāca jagatāṃ yoniṃ vepamānā punaḥ punaḥ

kathaṃ tvāmudareṇāhaṃ voḍhuṃ śakṣyāmi durdharam /
yasyodare jagatsarvaṃ vasate sthāṇujaṅgamam

kastvāṃ dhārayituṃ nātha śaktastrailokyadhāryasi /
yasya saptārṇavāḥ kukṣau nivasanti sahādribhiḥ

tasmād yathā surapatiḥ śakraḥ syāt surarāḍiha /
yathā ca na mama kleśastathā kuru janārdana

viṣṇuruvāca /
satyametanmahābhāge durdharo 'smi surāsuraiḥ /
tathāpi saṃbhaviṣyāmi ahaṃ devyudare tava

ātmānaṃ bhuvanān śailāṃstvāñca devi sakaśyapām /
dhārayiṣyāmi yogena mā viṣādaṃ kuthāmbike

tavodare 'haṃ dākṣeyi saṃbhaviṣyāmi vai yadā /
tadā nistejaso daityāḥ sabhaviṣyantyasaṃśayam

ityevamuktvā bhagavān viveśa tasyāśca bhūyo 'rigaṇapramardī /
svatejasoṃ'śena viveśa devyāḥ tadodare śakrahitāya vipra