Vamana Purana · Chapter 43

iti śrīvāmanapurāṇe dvicatvāriṃśo 'dhyāyaḥ
pulastya uvāca /
tataḥ svaisainyamālakṣya nihataṃ pramathairatha /
andhako 'bhyetya śukraṃ tu idaṃ vacanamabravīt

bhagavaṃstvāṃ māśritya vayaṃ bādhāma devatāḥ /
athānyānapi viprarṣe gandharvasurakinnarān

tadiyaṃ paśya bhagavan mayā guptā varūthinī /
anāthena yathā nārī pramathairapi kālyate

kujambhādyāśca nihatā bhrātaro mama bhārgava /
akṣayāḥ pramathāścāmī kurukṣetraphalaṃ yathā

tasmāt kuruṣva śreyo no na jīyema yathā paraiḥ /
jayema ca parān yuddhe tathā tvaṃ kurtumarhasi

śukro 'ndhakavacaḥ śrutvā sāntvayan paramādbhutam /
vacanaṃ prāha devarṣe brahmarṣirdānaveśvaram /
tvaddhitārtha yatiṣyāmi kariṣyāmi tava priyam

ityevamuktvā vacanaṃ vidyāṃ saṃjīvanīṃ kaviḥ /
ārvatayāmāsa tadā vidhānena śucivrataḥ

tasyāmāvartyamānāyāṃ vidyāyāmasureśvarāḥ /
ye hatāḥ prathamaṃ yuddhe dānavāste samutthitāḥ

kujambhādiṣu daityeṣu nandī śaṅkaramabravīt /
yuddhāyābhyāgateṣveva nandī śaṅkaramabravīt

mahādeva vaco mahyaṃ śṛṇu tvaṃ paramādbhutam /
avicintyamasahyaṃ ca mṛtānāṃ jīvanaṃ punaḥ

ye hatāḥ pramathairdaityā yathāśaktyā raṇājire /
te samujjīvitā bhūyo bhārgāveṇātha vidyāyā

tadidaṃ tairmahādeva mahatkarma kṛtaṃ raṇe /
saṃjātaṃ svalpameveśa śukravidyābalākṣayam

ityevamukte vacane nandinā kulanandinā /
pratyuvāca prabhuḥ prītya svārthasādhanamuttamam

gaccha sukraṃ gaṇapate mamāntikamupānaya /
ahaṃ taṃ saṃyamiṣyāmi yathāyogaṃ sametya hi

ityevamukto rudreṇa nandī gaṇapatistataḥ /
samājagāma daityānāṃ camuṃ śukrajighṛkṣayā

taṃ dadarśāsuraśreṣṭho balavān hayakandharaḥ /
saṃrurodha tadā mārgaṃ sihasyeva paśurvane

samupetyāhanannandī vajreṇa śataparvaṇā /
sa papātātha niḥsaṃjño yayau nandī tatastvaran

tataḥ kujambho jambhaśca balo vṛtrastvayaḥśirāḥ /
pañca dānavaśārdulā nandinaṃ samupādravan

tathānye dānavaśreṣṭha mayahlādapurogamāḥ /
nānāpraharaṇā yuddhe gaṇanāthamabhidravan

tato gaṇānāmadhipaṃ kuṭyamānaṃ mahābalaiḥ /
samapaśyanta devāstaṃ pitāmahapurogamāḥ

taṃ dṛṣṭvā bhagavān brahma prāha śakrapurogamān /
sāhāyyaṃ kriyatāṃ śaṃbhoretadantaramuttamam

pitāmahoktaṃ vacanaṃ śrutvā devāḥ savāsavāḥ /
samāpatanta vegena śivasainyamathāmbarāt

teṣāmāpatatāṃ vegaḥ pramathānāṃ bale babhau /
āpagānāṃ mahāvegaṃ patantīnāṃ mahārṇave

tato halahalāśabdaḥ samajāyata cobhayoḥ /
balayorghorasaṃkāśo surapramathayoratha

tamantaramupāgamya nandī saṃgṛhya vegavān /
rathād bhārgavamākrāmat siṃhaḥ kṣudramṛgaṃ yathā

tamādāya harābhyāśamāgamad gaṇanāyakaḥ /
nipātya rakṣiṇaḥ sarvānatha śukraṃ nyavedayat

tamānītaṃ kaviṃ śarvaḥ prākṣipad vadane prabhuḥ /
bhārgavaṃ tvāvṛtatanuṃ jaṭhare sa nyaveśayat

sa śaṃbhunā kaviśrṣṭho grasto jaṭharamāsthitaḥ /
tuṣṭāva bhagavāntaṃ taṃ munirvāgbhirathādarāt

śukra uvāca /
varadāya namastubhyaṃ harāya guṇaśāline /
śaṅkarāya maheśāya tryambakāya namo namaḥ

jīvanāya namastubhyaṃ lokanātha vṛṣākape /
madanāgne kālaśatro vāmadevāya te namaḥ

sthāṇave viśvarūpāya vāmanāya sadāgate /
mahādevāya śarvāya īśvarāya namo namaḥ

trinayana hara bhava śaṅkara umāpate jīmūtaketo śuhāgṛha śmaśānanirata bhūtivilepana sūlapāṇe paśupate gopate tatpuruṣasattma namo namaste |
itthaṃ stutaḥ kavivarema haro 'tha bhaktyā prīto varaṃ varaya dadmi tavetyuvāca /
sa prāha devavara dehi varaṃ mamādya yadvai tavaiva jaṭharāt pratinirgamo 'stu

tato haro 'kṣīṇi tadā nirudhya prāha dvijendrādya vinirgamasva /
ityuktamātro vibhunā cacāra devodare bhārgavapuṅgavastu

paribhraman dadarśātha śaṃbhorevodare kaviḥ /
bhuvanārṇavapātālān vṛtān sthāvarajaṅmaiḥ

ādityān vasavo rudrān viśvedevān gaṇāṃstathā /
yakṣān kiṃpuruṣādyādīn gandharvāpsarasāṃ gaṇān

munīn manujasādhyāṃśca paśukīṭapipīlikān /
vṛkṣagulmān girīn vallyaḥ phalamūlauṣadhāni ca

sthālasthāṃśca jalasthāṃścānimiṣānnimiṣānapi /
catuṣpadān sadvipadān sthāvarān jaṅgamānapi

avyaktāṃścaiva vyaktāṃśca saguṇānnirguṇānapi /
sa dṛṣṭvā kautukāviṣṭaḥ paribabhrāma bhārgavaḥ /
tatrāsato bhārgavasya divyaḥ saṃvatsaro gataḥ

na cānamalabhad brahmaṃstataḥ śrānto 'bhavat kaviḥ /
sa śrantaṃ vīkṣya cātmānaṃ nālabhannirgamaṃ vaśī /
bhiktinamro mahādevaṃ śaraṇaṃ samupāgam

śukra uvāca/ /
viśvarūpa mahārūpa viśvarūpākṣasūtradhṛk /
sahasrākṣa mahādeva tvāmahaṃ śaraṇaṃ gataḥ

namo 'stu te śaṅkara śarva śaṃbho sahasranetrāṅghribhujaṅgabhūṣaṇa /
dṛṣṭvaiva sarvān bhuvanāṃstavodare śrānto bhavantaṃ śaraṇaṃ prapannaḥ

ityevamukte vacane mahātmā śaṃbhurvacaḥ prāha tato vihasya /
nirgaccha putro 'si mamādhunā tvaṃ śiśnena bho bhārgavavaṃśacandra

nāmnā tu śukreti carācarāstvāṃ stoṣyanti naivātra vicāramanyat /
ityevamuktvā bhagavān mumoca śiśnena śukraṃ sa ca nirjagāma

vinirgato bhārgāvavaṃśacandraḥ śukratvamāpadya mahānubhāvaḥ /
praṇamya śaṃbhuṃ sa jagāma tūrṇa mahāsurāṇāṃ balamuttamaujāḥ

bhārgave punarāyāte dānavā muditābhavan /
punaryuddhāya vidadhurmatiṃ saha gaṇeśvaraiḥ

gaṇeśvarāstānasurān sahāmarāgaṇairatha /
yuyudhuḥ saṃkulaṃ yuddhaṃ sarva eva jayepsavaḥ

tato 'suragaṇānāṃ ca devatānāṃ ca yudhyatām /
dvandvayuddhūṃ samabhavad ghorarūpaṃ tapodhana

andhako nandinaṃ yuddhaṃ śaṅkukarṇaṃ tvayaḥśirāḥ /
kumbhadhvajaṃ balirdhīmān nandiṣeṇaṃ virocanaḥ

aśvagrīvo viśākhaṃ ca śākho vṛtramayodhayat /
vāṇastathā naigameyaṃ balaṃ rākṣasapuṅgavaḥ

vināyako māhāvīrya paraśvadhadharo raṇe /
saṃkruddho rākṣasaśreṣṭhaṃ tuhuṇḍaṃ samayodhayat /
duryodhanaśca balinaṃ ghaṇṭākarṇamayodhayat

hastī ca kuṇḍajaṭharaṃ hlādo vīraṃ ghaṭodaram /
ete hi balināṃ śreṣṭhā dānavāḥ pramathāstathā /
saṃyodhayanti devarṣe divyābdānāṃ śatani ṣaṭ

śatakratumathāyāntaṃ vajrapāṇimabhisthitam /
vārayāmāsa balavān jambho nāma mahāsuraḥ

sambhunāmāsurapatiḥ sa brahmaṇamayodhayat /
mahaujasaṃ kujambhaśca viṣṇuṃ daityāntakāriṇam

vivasvantaṃ raṇe śālvo varuṇaṃ triśirāstathā /
dvimūrdhā pavanaṃ somaṃ rāhurmitraṃ virūpadhṛk

aṣṭau ye vasavaḥ khyātā dharādyāste mahāsurān /
aṣṭāveva maheṣvāsān vārayāmāsurāhave

sarabhaḥ śalakṣaḥ pākaḥ puro 'tha vipṛthuḥpṛthuḥ /
vātāpi celvalaścaiva nānāśastrāstrayodhinaḥ

viśvedevagaṇān sarvān viṣvaksenapurogamān /
eka eva raṇe raudraḥ kālanemirmahāsuraḥ

ekādaśaiva ye rudrāstāneko 'pi raṇotkaṭaḥ /
yodhayāmāsa tejasvī vidyunmālī mahāsuraḥ

dvāvaśvinau ca narako bhāskarāneva śambaraḥ /
sādhyān marudgaṇāṃścaiva nivātakavacādayaḥ

evaṃ dvandravasahasrāṇi pramathāmaradānavaiḥ /
kṛtāni ca surābdānāṃ daśatīḥ ṣaṭ mahāmune

yadā na śakitā yoddhuṃ daivatairamarārayaḥ /
tadā māyaṃ samāśritya grasantaḥ kramaśo 'vyayān

tato 'bhavacchailapṛṣṭhaṃ prāvṛḍabhrasamaprabhaiḥ /
āvṛtaṃ varjitaṃ sarvaiḥ pramathairamarairapi

dṛṣṭvā śūnyaṃ giriprasthaṃ grastāṃś ca pramathāmarān /
krodhādutpādayāmāsa rudro jṛmbhāyikāṃ vaśī

tayā spṛṣṭā danusutā alasā mandabhāṣiṇaḥ /
vadanaṃ vikṛtaṃ kṛtvā muktaśastraṃ vijṛmbhire

jṛmbhamāṇeṣu ca tadāca dānaveṣu gaṇeśvarāḥ /
surāśca niryayustūrṇaṃ daityadehebhya ākulā

meghaprabhebhyo daityebhyo nirgacchanto 'marottamāḥ /
śobhante padmapatrākṣā meghebhya iva vidyutaḥ

gaṇāmareṣu ca samaṃ nirgateṣu tapodhana /
ayudhyanta mahātmāno bhūya evātikopitāḥ

tatastu devaiḥ sagaṇaiḥ dānavāḥ śarvapālitaiḥ /
parājīyanta saṃgrāme bhūyo bhūyastvaharniśam

tatastrinetraḥ svaiṃ saṃdhyāṃ saptābdhaśatike gate /
kāle 'bhyupāsata tadā so 'ṣṭādaśabhujo 'vyayaḥ

saṃspṛśyāpaḥ sarasvatyāṃ snātvā ca vidhinā haraḥ /
kṛtārtho bhaktimān mūrdhnā puṣpāñjalimupākṣipat

tato nanāma śirasā tataścakre pradakṣiṇam /
hiraṇyagarbhetyādityamupatasthe jajāpa ha

tvaṣṭre namo namaste 'stu samyaguccārya śūladhṛk /
nanarta bhāvagambhīraṃ dordaṇḍaṃ bhrāmayan balāt

parinṛtyati deveśe gaṇāścaivāmarāstathā /
nṛtyante bhāvasaṃyuktā harasyānuvilāsinaḥ

sandhyāmupāsya deveśaḥ parinṛtya yathecchayā /
yuddhāya dānavaiḥ sarvaistrinetrabhujapālitaiḥ

tato 'maragaṇāḥ sarvaistrinetrabhujapālitaiḥ /
dānavā nirjitāḥ sarve balibhirbhayavarjitaiḥ

svabalaṃ nirjitaṃ dṛṣṭvā matvājeyaṃ ca śaṅkam /
andhakaḥ sundamāhūya idaṃ vacanamabrīt

sunda bhrātāsi me vīra viśvasyaḥ sarvavastuṣu /
tadvadāmyadya yadvākyaṃ tacchrutvā yatkṣamaṃ kuru

durjayo 'sau raṇapaṭurdharmātmā kāraṇāntaraiḥ /
samāsate hi hṛdaye padmākṣī śailanandinī

taduttiṣṭhasva gacchāmo yatrāste cāruhāsinī /
tatraināṃ mohayiṣyāmi hararūpeṇa dānava

bhavān bhavasyānucaro bhava nandī gaṇeśvaraḥ /
tato gatvātha bhuktvā tāṃ jeṣyāmi pramathān surān

itvevamukte vacane bāḍhaṃ sundo 'mbhayabhāṣata /
samajāyata śailādirandhakaḥ śaṅkaro 'pyabhūt

nandirudrau tato bhūtvā mahāsuracamūpatī /
saṃprāptau mandaragiriṃ prahāraiḥ kṣatavigrahau

hastamālambya sundasya andhako haramandiram /
viveśa nirviśaṅkena cittenāsurasattamaḥ

tato girisutā dūrādāyāntaṃ vīkṣya cāndhakam /
maheśvaravapuśchnnaṃ prahārairjarjaracchavim

sundaṃ śailādirūpasthamavaṣṭamyāviśat tataḥ /
taṃ dṛṣṭvā mālinīṃ prāha suyaśāṃ vijayāṃ jayām

jaye paśyasva devasya madarthe vigrahaṃ kṛtam /
śatrubhirdānavavaraistaduttiṣṭhasva satvaram

ghṛtamānaya paurāṇaṃ bījikāṃ lavaṇaṃ dadhi /
vraṇabhaṅgaṃ kariṣyāmi svayameva pinākinaḥ

kuruṣva śīghraṃ suyaśe svabharturvraṇanāśanam /
ityevamuktvā vacanaṃ samatthāya varāsanāt

abhyudyayau tadā bhaktvā manyamānā vṛṣadhvajam /
śūlapāṇestataḥ sthitvā rūpaṃ cihnāni yatnataḥ

anviyeṣa tato brahmannobhau pārśvasthitau vṛṣau /
sā jñātvā dānavaṃ raudraṃ māyācchāditavigrahm

apayānaṃ tadā cakre girirājasutā mune /
devyāścintitamājñāya sundaṃ tyaktvāndhako 'suraḥ

samādravata vegena harakāntāṃ vibhāvarīm /
samādravata daiteyo yena mārgeṇa sāgamat

apaskārāntaraṃ bhañjan pādaplutibhirākulaḥ /
tamāpatantaṃ dṛṣṭvaiva girijā prādravad bhayāt

gṛhaṃ tyaktvā hayupavanaṃ sakhībhiḥ sahitā tadā /
tatrāpyanujagāmāsau madāndho munipuṅgava

tathāpi na śaśaṣainaṃ tapaso gopanāya tu /
tadbhayādāviśad gaurī śvetārkakusumaṃ śuci

vijaḍayādyā mahāgulme saṃprayātā layaṃ mune /
naṣṭāyāmātha pārvatyāṃ bhūyo hairaṇyalocaniḥ

sundaṃ haste samādāya svasainyaṃ punarāgamat /
andhake purāyāte svabalaṃ munisattama

prāvartata mahāyuddhaṃ pramathāsurayoratha /
tato 'maragaṇaśreṣṭho viṣṇuścakragadādharaḥ

nijaghānāsurabalaṃ śaṅkarapriyakāmyayā /
śārṅgacāpacyutairbāṇaiḥ saṃsyūtā dānavarṣabhāḥ

pañca ṣaṭ sapta cāṣṭau vā vraghnapādairghanā iva /
gadayā kāṃścidavadhīt cakreṇānyān janārdanaḥ

khaṅgena ca cakartānyān dṛṣṭyānyān bhasmāsādvyadhāt /
halenākṛṣya caivānyān mu salena vyacūrṇayat

garuḍaḥ pakṣapātābhyāṃ tuṇḍenāpyurasāhanat /
sa cādipuruṣo dhātā purāṇāḥ prapitāmahaḥ

bhrāmayan vipulaṃ padmamabhyaṣiñcata vāriṇā /
saṃspṛṣṭā brahmatoyena sarvatīrthamayena hi

gaṇāmaragaṇāścāsan navanāgaśatādhikāḥ /
dānavāstena toyena saṃspṛṣṭāścāghahāriṇā

savāhanāḥ kṣayaṃ jagmuḥ kuliśeneva parvatāḥ /
dṛṣṭvā brahmaharī yuddhe ghātayantau mahāsurān

śatakratuśca dudrāva pragṛhya kuliśaṃ balī /
tamāpatantaṃ saṃprekṣya balo dānavasattamaḥ

muktvā devaṃ gadāpāṇiṃ vimānasthaṃ ca padmajam /
śakramevādravad yoddhuṃ muṣṭimudyāmya nārada /
balavān dānavapatirajeyo devadānavai

tamāpatantaṃ tridaśeśvarastu doṣṇāṃ sahasreṇa yatābalena /
vajraṃ paribhrāmya balasya mūrdhni cikṣepa he mūḍha hato 'syudīrya

sa tasya mūrdhni pravaro 'pi vajro jagāma tūrṇaṃ hi sahasradhā mune /
balo 'dravad devapatiśca bhītaḥ parāṅmukho 'bhṛt samarānmaharṣe

taṃ cāpi jambho vimukhaṃ nirīkṣya bhūtvāgrataḥ prāha na yuktametat /
tiṣṭhasva rājāsi carācarasya na rājadharme gaditaṃ palāyanam

sahasrākṣo jambhavākyaṃ nikhamya bhītastūrṇaṃ viṣṇumāgānmaharṣe /
upetyāha śrūyatāṃ vākyamīśa tvaṃ me nātho bhūtabhavyeśa viṣṇo

jambhastarjayate 'tyarthaṃ māṃ nirāyudhamīkṣya hi /
āyudhaṃ dehi bhagavān tvāmahaṃ śaraṇaṃ gataḥ

tamuvāca hariḥ śakraṃ tyaktvā darpa vrajādhunā /
prārthayasvāyudhaṃ vahniṃ sa te dāsyatyasaṃśayam

janārdanavacaḥ śrutvā śakrastvaritavikramaḥ /
śaraṇaṃ pāvakamagādidaṃ covāca nārada

śakra uvāca /
nighnano mebalaṃ vajraṃ kṛśāno śatadhā gatam /
eṣa cāhūyate jambhastasmāddehyāyudhaṃ mama

pulastya uvāca /
tamāha bhagavān vahniḥ prīto 'si tava vāsava /
yattvaṃ darpa parityajya māmeva śaraṇaṃ gataḥ

ityuccārya svaśaktyāstu śaktiṃ niṣkrāmya bhāvataḥ /
prādādindrāya bhagavān rocamāno divaṃ gataḥ

tāmādāya tadā śaktiṃ śataghaṇṭāṃ sudāruṇām /
pratyudyayau tadā jambhaṃ hantukāmo 'rimardanaḥ

tenātiyaśasā daityaḥ sahasaivābhisaṃdrutaḥ /
krodhaṃ cakre tadā jambha nijaghāna gajādhipam

jambhamuṣṭinipātena bhagnakumbhakaṭo gajaḥ /
nipapāta yathā śailaḥ śakravajrahataḥ purā

patamānād dvipendrāt tu śakraścāplutya vegavān /
tyaktvaiva mandaragiriṃ papāta vasudhātale

patamāna hariṃ śiddhāścāraṇāśca tadābruvan /
mā mā śakra patasvādya bhūtale tiṣṭha vāsava

sa teṣāṃ vacanaṃ śrutvā yogī tasthau kṣaṇaṃ tadā /
prāha caitān kathaṃ yotsye apatraḥ śatrubhiḥ sahaḥ

tamūcurdevagandharvā mā viṣādaṃ vrajeśvara /
yudhyasva tvaṃ samāruhyapreṣayiṣyāma yadā ratham

ityevamuktvā vipulaṃ rathaṃ svastikalakṣaṇam /
vānaradhvajasaṃyuktaṃ haribhirharibhiryutam

śuddhajāmbhūnadamayaṃ kiṅkiṇījālamaṇḍitam /
śakrāya preṣayāmāsurviśvāvasupurogamāḥ

tamāgatamudīkṣyātha hīnaṃ sārathinā hariḥ /
prāha yotsye kathaṃ yuddhe saṃyamiṣye kathaṃ hayān

yadi kaściddhi sārathyaṃ kariṣyati mamādhunā /
tato 'haṃ ghātaye śatrūn nānyatheti kathañcana

tato 'bruvaṃste gandharvā nāsmākaṃ sārathirvibho /
vidyate svayamevāśvāṃstvaṃ saṃyantumihārhasi

ityevamukte gavāṃstyaktvā syandanamuttamam /
kṣamātalaṃ nipapātaiva paribhraṣṭasragambaraḥ

calanmaulirmuktakacaḥ paribhraṣṭāyudhāṅgadaḥ /
patamānaṃ sahasrākṣaṃ dṛṣṭvā bhūḥ samakampata

pṛthivyāṃ kampamānāyāṃ śamīkarṣestapasvinī /
bhāryābravīt prabho bālaṃ bahiḥ kuru yathāsukham

sa tu śīlāvacaḥ śrutvā kimarthamiti cāvravīt /
sā cāha śrūyatāṃ nātha daivajñaparibhāṣitam

yadeyaṃ kampate bhūmistadā prakṣipyate bahiḥ /
yadbāhyato muniśreṣṭha tad bhaved dviguṇaṃ mune

etadvākyaṃ tadā śrutvā bālamādāya putrakam /
nirāśaṅko bahiḥ śīghraṃ prākṣipat kṣmātale dvijaḥ

bhūyo goyugalārthāya praviṣṭo bhāryayā dvijaḥ /
nivārito gatā velā arddhūhānirbhaviṣyati

ityevamukte devarṣe bahirnirgamya vegavān /
dadarśa bāladvitayaṃ samarūpamavasthitam

taṃ dṛṣṭvā devatāḥ pūjya bhāryāṃ cādbhutadarśanām /
prāha tattvaṃ na vindāmi yat pṛcchāmi vadasva tat

bālasyāsya dvitīyasya ke bhaviṣyadguṇā vada /
bhāgyāni cāsya yaccoktaṃ karmatat kathayādhunā

sābravīnnādya te vakṣye vadiṣyāmi punaḥ prabho /
so 'bravīd vada me 'dyaiva nocennāśnāmi bhojanam

sā prāha śrūyatāṃ brahman vadiṣye vacanaṃ hitam /
kātareṇādya yatpṛṣṭaṃ bhāvyaḥ kārurayaṃ ki

ityuktāvati vākye tu bāla eva tvecetanaḥ /
jagāma sāhyaṃ śakrasya kartuṃ sautyaviśāradaḥ

taṃ vrajantaṃ hi gandharvā viśvāvasupurogamāḥ /
jñātvendrasyaiva sāhāyye tejasā samavardhayan

gandharvatejasā yuktaḥ śiśuḥ śakraṃ sametya hi /
provācaihyehi deveśa priyo yantā bhavāmi te

tacchratvāsya hariḥ prāha kasya putro 'si bālaka /
saṃyantāsi kathaṃ cāśvān saṃśayaḥ pratibhāti me

so 'bravīdṛṣitejotthaṃ kṣmābhavanaṃ viddhi vāsava /
gandharvatejasā yuktaṃ vājiyānavaniśāradam

tatchravā bhagavāñchakraḥ khaṃ bheje yogināṃ varaḥ /
sa cāpi vipratanayo mātalirnāmaviśrutaḥ

tato 'dhirūḍhastu rathaṃ śakrastridaśapuṅgavaḥ /
raśmīn śamīkatanayo mātaliḥ pragṛhītavān

tato mandaramāgamya viveśa ripuvāhinīm /
praviśan dadṛśe śrīmān patitaṃ kārsukaṃ mahat

saśaraṃ pañcavarṇābhaṃ sitaraktāsitāruṇam /
pāṇḍucchāyaṃ suraśreṣṭhastaṃ jagrāha samārgaṇam

tatas manasā devān rajaḥsattvatamomayān /
namaskṛtya śaraṃ cāpe sādhijye viniyojayat

tato niśceruratyugrāḥ śarā barhiṇavāsasaḥ /
brahmeśathaviṣṇunāmāṅkāḥ sūdayanto 'surān raṇe

ākāśaṃ vidiśaḥ pṛthvīṃ diśaśca sa śarotkaraiḥ /
sahasrākṣo 'tipaṭubhiśchādayāmāsa nārada

gajo viddho hayo bhinnaḥ pṛthivyāṃ patito rathaḥ /
mahāmātro dharāṃ prāptaḥ sadyaḥ sīdañcharāturaḥ

padāti patito bhūmyāṃ śakramārgaṇatāḍitaḥ /
hatapradhānabhūyiṣṭhaṃ balaṃ tadabhavad ripoḥ

taṃ śakrabāṇabhihataṃ durāsadaṃ sainyaṃ samālakṣya tadā kujambhaḥ /
jambhāsuraścāpi sureśamavyayaṃ prajagamaturgṛhya gade sughore

tāvāpatantau bhagavān nirīkṣya sudarśanenārivināśanena /
viṣṇuḥ kujambhaṃ nijaghāna vegāt sa syandanād gāmagamad gatāsuḥ

tasmin hate bhrātari mādhavena jambhastataḥ krodhavaśaṃ jagāma /
krodhānvitaḥ śakramupādravad raṇe siṃhaṃ yataiṇo 'tivipannabuddhiḥ

tamāpatantaṃ prasamīkṣya śakrastyaktvaiva cāpaṃ saśaraṃ mahātmā /
jagrāha śaktiṃ yamadaṇḍakalpāṃ tāmagnidattāṃ ripave sasarja

śaktiṃ saghaṇṭāṃ kṛtaniḥsvanāṃ vai dṛṣṭvā patantīṃ gadayā jaghāna /
gadāṃ ca kṛtvā sahasaiva bhasmasād bibheda jambhaṃ hṛdaye ca tūrṇam

śaktyā sa bhinno hṛdaye surāriḥ papāta bhūmyāṃ vigatāsureva /
taṃ vīkṣya bhūmau patitaṃ visaṃjñaṃ daityāstu bhītā vimukhā babhūvuḥ

jambhe hate daityabale ca bhagne gaṇāstu hṛṣṭā harimarcayantaḥ /
vīryaṃ praśaṃsanti śatakratośca sa gotrabhiccharvamupetya tasthau