Vamana Purana · Chapter 41

iti śrīvāmanapurāṇe catvāriśo 'dhyāyaḥ
pulāstya uvāca /
haro 'pi śambare yāte samāhūyātha nandinam /
prāhāmantraya śailāde ye sthitāstava śāsane

tato maheśavacanānnandī tūrṇataraṃ gataḥ /
upaspṛśya jalaṃ śrīmān sasmāra gaṇanāyakān

nandinā saṃsmṛtāḥ sarve gaṇanāthāḥ sahasraśaḥ /
samutpatya tvarāyuktāḥ praṇatāstridaseśvaram

āgatāṃśca gaṇānnandī kṛtāñjalipuṭo 'vyayaḥ /
sarvān nivedayāmāsa śaṅkarāya mahātmane

nandyuvāca /
yānetān paśyase śaṃbho trinetrāñjaṭilāñśucīn /
ete rudrā iti khyātāḥ koṭya ekādaśaiva tu

vānarāsyān paśyase yān śārdūlasamavikramān /
eteṣāṃ dvārapālāste mannamāno yaśodhanāḥ

ṣaṇmukhān paśyase yāṃśca śaktipāṇīñśikhidhvajān /
ṣaṭ ca ṣaṣṭistathā koṭyaḥ skandanāmnaḥ kumārakān

etāvatyastathā koṭya śākhā nāma ṣaḍānanāḥ /
viśākhāstāvadevoktā naigameyāśca śaṅkara

saptakoṭiśataṃ śaṃbho amī vai pramathottamāḥ /
ekaikaṃ prati deveśa tāvatyo hyapi mātaraḥ

bhasmāruṇitadehāśca trinetrāḥ śūlapāṇayaḥ /
ete śaivā iti proktāstava bhaktā gaṇeśvarāḥ

tathā pāśupatāścānye bhasmaprahāraṇā vibho /
ete gaṇāstvasaṃkhyātāḥ sahāyārthaṃ samāgatāḥ

pinākadhāriṇo raudrā gaṇāḥ kālamukhāpare /
tava bhaktāḥ samāyātā jaṭāmaṇḍalinodbhutāḥ

khaṭvāṅgayodhino vīrā raktacarmasamāvṛtāḥ /
ime prāptā gaṇā yoddhuṃ mahāvratina uttamāḥ

digvāsaso mauninaśca ghaṇṭāpraharaṇāstathā /
nirāśrayā nāma gaṇāḥ samāyātā jagadguro

sārdhadvinetrāḥ padmākṣāḥ śrīvatsāṅkitavakṣasaḥ /
samāyātāḥ khagārūḍhā vṛṣabhadhvajino 'vyayāḥ

mahāpāśupatā nāma cakraśūladharāstathā /
bhairavo viṣṇunā sārddhamabhedenārcito hi yai

ime mṛgondravadanāḥ śūlabāṇadhanurdharāḥ /
gaṇāstvadromasaṃbhūtā vīrabhadrapurogamāḥ

ete cānye ca bahavaḥ śataśo 'tha sahasraśaḥ /
sahāyārthaṃ tavāyātā yathāprītyādiśasva tān

tato 'bhyetya gaṇāḥ sarve praṇemurvṛṣabhadhvajam /
tān kareṇaiva bhagavān samāśvāsyopaveśayat

mahāpāśupatān dṛṣṭvā samutthāya maheśvaraḥ /
saṃpariṣvajatādhyakṣāṃste praṇemurmaheśvaram

tatastadadbhutatamaṃ dṛṣṭvā sarve gaṇeśvarāḥ suciraṃ vismitākṣāśca vailakṣyamagamat param

vismitākṣān gaṇān dṛṣṭvā sailadiryogināṃ varaḥ /
prāha prahasya deveśaṃ śūlapāṇiṃ gaṇādhipam

vismitāmī gaṇā deva sarva eva maheśvara /
mahāpāśupatānāṃ hi yat tvayāliṅganaṃ kṛtam

tadeteṣāṃ mahādeva sphuṭaṃ trailokyavindakam /
rūpaṃ jñānaṃ vivekaṃ ca vadasva svecchayā vibho

pramathādhipatervākyaṃ viditvā bhūtabhāvanaḥ /
babhāṣe tān gaṇān sarvān bhāvābhāvavicāriṇaḥ

rudra uvāca/ /
bhavdbhirbhaktisaṃyuktairharo bhāvena pūjitaḥ /
ahaṅkāravimūḍhaiśca nindadbhirvaiṣṇavaṃ padam

tenājñānena bhavatonādṛtyānuvirodhitāḥ /
yo 'haṃ sa bhagavān viṣṇurviṣṇuryaḥ so 'hamavyayaḥ

nāvayorvai viśeṣo 'sti ekā mūrtirdvidhā sthitā /
tadamībhirnaravyāghrairbhaktibhāvayutairgaṇaiḥ

yathāhaṃ vai parijñāto na bhavadbhistathā dhruvam /
yenāhaṃ nindito nityaṃ bhavadbhirmūḍhabuddhibhiḥ

tena jñānaṃ hi vai naṣṭaṃ nātastvāliṅgitā mayā /
ityevamukte vacane gaṇāḥ procurmaheśvaram

kathaṃ bhavān yathaikyena saṃsthito 'sti janārdanaḥ /
bhavān hi nirmalaḥ suddhaḥ śāntaḥ suklo nirañjanaḥ

sa cāpyañjanasaṃkāśaḥ kathaṃ teneha yujyate /
teṣāṃ vacanamarthāḍhyaṃ śrutvā jīmūtavāhanaḥ

vihasya meghagambhīraṃ gaṇānidamuvāca ha /
śrūyatāṃ sarvamākhyāsye svayaśovarddhanaṃ vacaḥ

na tveva yogyā yūyaṃ hi mahājñānasya karhicit /
apavādabhayād guhyaṃ bhavatāṃ hi prakāśaye

priyadhvamapi caitena yanmaccittāstu nityaśaḥ /
ekarūpātmakaṃ dehaṃ kurudhyaṃ yatnamāsthitāḥ

payasā haviṣādyaiśca snāpanena prayatnataḥ /
candanādibhirekāgrairna me prītiḥ prajāyate

yatnāt krakacamādāya chindadhvaṃ mama vigraham /
narakārhā bhavadbhaktā rakṣāmi svayaśor'thataḥ

māyaṃ vadiṣyate loko mahāntamapavādinam /
yathā patanti narake harabhaktāstapasvinaḥ

vrajanti narakaṃ ghoraṃ ityevaṃ parivādinaḥ /
ator'thaṃ na kṣipāmyadya bhavato narake 'dbhute

yannindadhvaṃ jagannāthaṃ puṣkarākṣaṃ ca manmayam /
sa caiva sadṛśo loke vidyate sacarācare /
śvetamūrtiḥ sa gavān pīto rakto 'ñjanaprabhaḥ

na tasya sadṛśo loke vidyate sacarācare /
śvetamūrtiḥ sa bhagavān pīto rakto 'ñjanaprabhaḥ

tasmāt parataraṃ loke nānyad dharma hi vidyate /
sāttvikaṃ rājasaṃ caiva tāmasaṃ miśrakaṃ tathā /
sa eva dhatte bhagavān sarvapūjyaḥ sadāśivaḥ

śaṅkarasya vacaḥ śrutvā śaivādyā pramathottamāḥ /
pratyūcurbhagavan brūhi sadāśivaviśeṇam

teṣāṃ tad bhāṣitaṃ śrutvā pramathānāmatheśvaraḥ /
darśayāmāsa tadrūpaṃ sadāśaivaṃ nirañjanam

tataḥ paśyanti hi gaṇāḥ tamīsaṃ vai śahasraśaḥ /
sahasravaktracaraṇaṃ sahastrabhujamīśvaram

daṇḍapāṇiṃ sudurdṛśyaṃ lokairvyāptaṃ samantataḥ /
daṇḍasaṃsthāsya dṛśyante devapraharaṇāstathā

tata ekamukhaṃ bhūyo dadṛśuḥ śaṅkaraṃ gaṇāḥ /
raudraiśca vaiṣṇavaiścaiva vṛtaṃ cihnaiḥ sahasraśaḥ

arddhena vaiṣṇavavapurddhena haravigrahaḥ /
khagadhvajaṃ vṛṣārūḍhaṃ vṛṣadhvajam

yathā yathā trinayano rūpaṃ dhatte guṇāgraṇīḥ /
tathā tathā tvajāyanta mahāpāśupatā gaṇāḥ

tato 'bhavaccaikarūpī śaṅkaro bahurūpavān /
dvirūpaścābhavad yogī ekarūpo 'pyarūpavān /
kṣaṇācchvetaḥ kṣaṇād raktaḥ pīto nīlaḥ kṣaṇādapi

miśrako varṇahīnaśca mahāpāśupatastathā /
kṣaṇād bhavati rudrendraḥ kṣaṇācchaṃbhuḥ prabhākaraḥ

kṣaṇārddhācchaṅkaro viṣṇuḥ kṣaṇāccharvaḥ pitāmahaḥ /
tatastadadbhutatamaṃ dṛṣṭvā śaivādayo gaṇāḥ

ajānanta tadaikyena brahmaviṣṇvīśabhāskarān /
yadābhinnamamanyanta devedevaṃ sadāśivam

tadā nirdhūtapāpāste samajāyanta pārṣadāḥ /
teṣvevaṃ dhūtapāpeṣu abhinneṣu harīśvaraḥ

prītātmā vibabho śaṃśuḥ prītīyukto 'bravīd vacaḥ /
parituṣṭo 'smi vaḥ sarve jñānenānena suvratāḥ

vṛṇudhvaṃ varamānantyaṃ dāsye vo manasepsitam /
ūcuste dehi bhagavan varamasmākamīśvara /
bhinnadṛṣṭyudbhavaṃ pāpaṃ yattad bhraṃśaṃ prayātu naḥ

pulastya uvāca /
bāḍhamityabravīccharvaścakre nirdhūtakalpaṣān /
saṃpariṣvajatāvyaktastān sarvān gaṇayūthapān

iti vibhunā praṇatārtihareṇa gaṇapatayo vṛṣamegharathena /
śrutigaditānugameneva mandaraṃ girimavatatya samadhyavasantam

ācchādito girivaraḥ pramathairghanābhai rābhāti śuklatanurīśvarapādajuṣṭaḥ /
nīlājinātatatanuḥ śaradabhravarṇo yadvad vibhāti balavān vṛṣabho harasya