Vamana Purana · Chapter 24

devadeva uvāca /
evaṃ pṛthūdako devāḥ puṇyaḥ pāpabhayāpahaḥ /
taṃ gacchadhvaṃ mahātīrthaṃ yāvat saṃnidhivodhitam

yadā mṛgaśiroṛkṣe śaśisūryau bṛhaspatiḥ /
tiṣṭhanti sā tithiḥ puṇyā tvakṣayā parigīyate

taṃ gacchadhvaṃ suraśreṣṭhā yatra prācī sarasvatī /
pitṝn ārādhayadhvaṃ hi tatra śrāddhena bhaktitataḥ

tato murārivacanaṃ śrutvā devāḥ savāsavāḥ /
samājagmuḥ kurukṣetre puṇyatīrthaṃ pṛthūdakam

tatra snātvā surāḥ sarve bṛhaspatimacodayan /
viśasva bhagavan ṛkṣamimaṃ mṛśiraṃ kuru /
puṇyāṃ tithiṃ pāpaharāṃ tava kālo 'yamāgataḥ

pravartate ravistatra candramāpi viśatyasau /
tvadāyattaṃ guro kāryaṃ surāṇāṃ tat kuruṣva ca

ityevamukto devaistu devācāryo 'bravīdidam /
yadi varṣādhipo 'haṃ syāṃ tato yāsyāmi devatāḥ

āṣāḍhe māsi mārgarkṣe candrakṣayatithirhi yā /
tasyāṃ purandaraḥ prītaḥ piṇḍaṃ pitṛṣu bhaktitaḥ

prādāt tilamadhūnmiśraṃ haviṣyānnaṃ kuruṣvatha /
tataḥ prītāstu pitarastāṃ prāhustanayāṃ nijāma

menāṃ devāśca śailāya himayuktāya vai daduḥ /
tāṃ menāṃ himavāṃllabdhvā prasādād daivateṣvatha /
prītimānabhavaccāsau rarāma ca yathecchayā

tato himādriḥ pitṛkanyayā samaṃ samarpayan vai viṣayān yathaiṣṭam /
ajījanat sā tanayāśca tisro rūpātiyuktāḥ surayoṣitopamāḥ