Vaisheshika Sutras · Chapter 5.2

nodanād abhighātāt saṃyuktasaṃyogāc ca pṛthivyāṃ karma

tad viśeṣeṇādṛṣṭakāritam

apāṃ saṃyogābhāve gurutvāt patanam

tad viśeṣeṇādṛṣṭakāritam

dravatvāt syandanam

nāḍyā vāyusaṃyogād ārohaṇam

nodanāt pīḍanāt saṃyuktasaṃyogāc ca

vṛkṣābhisarpaṇam ity adṛṣṭakāritam

apāṃ saṅghāto vilayanaṃ ca tejasaḥ saṃyogāt

tatrāvasphūrjathur liṅgam

vaidikaṃ ca

apāṃ saṃyogād vibhāgāc ca stanayitnuḥ

pṛthivīkarmaṇā tejaḥkarma vāyukarma ca vyākhyātam

agner ūrdhvajvalanaṃ vāyoś ca tiryagpavanam aṇumanasoś cādyaṃ karmety adṛṣṭakāritāni

hastakarmaṇā manasaḥ karma vyākhyātam

ātmendriyamano'rthasannikarṣāt sukhaduḥkhe tadanārambhaḥ

ātmasthe manasi saśarīrasya sukhaduḥkhābhāvaḥ sa yogaḥ

kāyakarmaṇātmakarma vyākhyātam

apasarpaṇam upasarpaṇam aśitapītasaṃyogaḥ kāryāntarasaṃyogāś cety adṛṣṭakāritāni

tadabhāve saṃyogābhāvo 'prādurbhāvaḥ sa mokṣaḥ

dravyaguṇakarmavaidharmyād bhāvābhāvamātraṃ tamaḥ

tejaso dravyāntareṇāvaraṇāc ca

dikkālāv ākāśaṃ ca kriyāvadbhyo vaidharmyān niṣkriyāṇi

etena karmāṇi guṇāś ca vyākhyātāḥ

niṣkriyāṇāṃ samavāyaḥ karmabhyaḥ pratiṣiddhaḥ

kāraṇaṃ tv asamavāyino guṇāḥ

guṇair dig vyākhyātā

kāraṇena kālaḥ