Vaisheshika Sutras · Chapter 10

ātmasamavāyaḥ sukhaduḥkhayoḥ pañcabhyo 'rthāntaratve hetus tadāśrayibhyaś ca guṇebhyaḥ

iṣṭāniṣṭakāraṇaviśeṣād virodhāc ca mithaḥ sukhaduḥkhayor arthāntarabhāvaḥ

saṃśayanirṇayayor arthāntarabhāvaś ca jñānāntaratve hetuḥ

tayor niṣpattiḥ pratyakṣalaiṅgikābhyāṃ jñānāntaratve hetuḥ

bhūtam iti pratyakṣaṃ vyākhyātam

bhaviṣyatīti kāryāntare dṛṣṭatvāt

tathā bhavatīti sāpekṣebhyo 'napekṣebhyaś ca

abhūd ity abhūtāt

sati ca kāryāsamavāyāt

ekārthasamavāyiṣu kāraṇāntareṣu darśanād ekadeśa ity ekasmin

śiraḥ pṛṣṭham udaraṃ pāṇir iti tadviśeṣebhyaḥ

kāraṇam iti dravye kāryasamavāyāt

saṃyogāt vā

kāraṇasamavāyāt karmaṇi

tathā rūpe kāraṇakāraṇasamavāyāc ca

kāraṇasamavāyāt saṃyoge

tathā kāraṇākāraṇasamavāyāc ca

saṃyuktasamavāyād agner vaiśeṣikam

laiṅgikaṃ pramāṇaṃ vyākhyātam

dṛṣṭānāṃ dṛṣṭaprayojanānāṃ dṛṣṭābhāve prayogo 'bhyudayāya (S omits dṛṣṭaprayojanānāṃ)

tadvacanād āmnāyaprāmāṇyam iti (U,S āmnāyasya prāmāṇyam)