Taittiriya Aranyaka · Chapter 6

atha kṛṣṇayajurvedīya taittirīyāraṇyake ṣaṣṭhaprapāṭhakasyārambhaḥ
saṃ tvā siñcāmi yajuṣā prajāmāyurdhanaṃ ca //
ॐ śāntiḥ śāntiḥ śāntiḥ ॐ //
6.1 anuvāka १
pare yuvāꣳsaṃ pravato mahīranu bahubhyaḥ panthāmanapaspaśānam / vaivasvataꣳ saṃgamanaṃ janānāṃ yamaꣳ rājānaꣳ haviṣā duvasyata, iti / idaṃ tvā vastraṃ prathamaṃ nvāgan, iti / apaitadūha yadihābibhaḥ purā / iṣṭāpūrtamanusaṃpaśya dakṣiṇāṃ yathā te dattaṃ bahudhā vi bandhuṣu, iti / imau yunajmi te vahnī asunīthāya voḍhave / yābhyāṃ yamasya sādanaꣳ sukṛtāṃ cāpi gacchatāt / pūṣā tvetaścyāvayatu pra vidvānanaṣṭapaśarbhuvanasya gopāḥ / saṃ tvaitebhyaḥ paridadātpitṛbhyo'gnirdevebhyaḥ suvidatrebhyaḥ / pūṣemā āśā anuveda sarvāḥ so asmāꣳ abhayatamena neṣat / svastidā aghṛṇiḥ sarvavīro'prayucchanpura etu pravidvān ( १) / āyurviśvāyuḥ paripāsati tvā pūṣā tvā pātu prapathe purastāt / yatrā''sate sukṛto yatra te yayustatra tvā devaḥ savitā dadhātu / bhuvanasya pata idaꣳ haviḥ, iti / agnaye rayimate svāhā / puruṣasya sayāvaryapedaghāni mṛjmahe / yathā no atra nāparaḥ purā jarasa āyati, iti / puruṣasya sayāvari vi te prāṇamasisrasam / śarīreṇa mahīmihi svadhayehi pitṝnupa prajayā'smānihā''vaha / maivaṃ māꣳstā priye'haṃ devī satī pitṛlokaṃ yadaiṣi / viśvavārā namasā(nabhasā?) saṃvyayantyubhau no lokau payasā'bhyāvavṛtsva ( २) / iyaṃ nārī patilokaṃ vṛṇānā nipadyata upa tvā martya pretam / viśvaṃ purāṇamanupālayantī tasmai prajāṃ draviṇaṃ ceha dhehi / udīrṣva nāryabhi jīvalokamitāsumetamupaśeṣa ehi / hastagrābhasya didhiṣostvametatpatyurjanitvamabhisaṃbabhūva / suvarṇaꣳ hastādādadānā mṛtasya śriyai brahmaṇe tejase balāya / atraiva tvamiha vayaꣳ suśevā viśvā spṛdho abhimātīrjayema /
dhanurhastādādadānā mṛtasya śriyai kṣattrāyaujase balāya / atraiva tvamiha vayaꣳ suśevā viśvā spṛdho abhimātīrjayema / maṇiꣳ hastādādadānā mṛtasya śriyai viśe puṣṭyai balāya / atraiva tvamiha vayaꣳ suśevā viśvā spṛdho abhimātīrjayema ( ३) / imamagne camasaṃ mā vijīhvaraḥ priyo devānāmuta somyānām / eṣa yaścamaso devapānastasmindevā amṛtā mādayantām / agnervarma pari gobhirvyayasva saṃprorṇuṣva medasā pīvasā ca / nettvā dhṛṣṇurharasā jarhṛṣāṇo dadhadvidhakṣyanparyaṅkhayātai / mainamagne vidaho mā'bhiśoco mā'sya tvacaṃ cikṣipo mā śarīram / yadā śṛtaṃ karavo jātavedo'themenaṃ prahiṇutātpitṛbhyaḥ / śṛtaṃ yadā'karasi jātavedo'themenaṃ paridattātpitṛbhyaḥ / yadā gacchātyasunītimetāmathā devānāṃ vaśanīrbhavāti / sūryaṃ te cakṣurgacchatu vātamātmā dyāṃ ca gaccha pṛthivīṃ ca dharmaṇā / apo vā gaccha yadi tatra te hitamoṣadhīṣu pratitiṣṭhā śarīraiḥ / ajo'bhāgastapasā taṃ tapasva taṃ te śocistapatu taṃ te arciḥ / yāste śivāstanuvo jātavedastābhirvahemaꣳ sukṛtāṃ yatra lokāḥ / ayaṃ vai tvamasmādadhi tvametadayaṃ vai tadasya yonirasi / vaiśvānaraḥ putraḥ pitre lokakṛjjātavedo vahemaꣳ sukṛtāṃ yatra lokāḥ ( ४) // vidvānabhyāvavṛtsvābhimātīrjayema śarīraiścatvāri ca //
iti kṛṣṇayajurvedīyataittirīyāraṇyake ṣaṣṭhaprapāṭhake prathamo'nuvākaḥ

6.2 anuvāka २
ya etasya patho goptārastebhyaḥ svāhā ya etasya patho rakṣitārastebhyaḥ svāhā ya etasya patho'bhi rakṣitārastebhyaḥ svāhā khyātre svāhā'pākhyātre svāhā'bhilālapate svāhā'palālapate svāhā'gnaye karmakṛte svāhā yamatra nādhīmastasmai svāhā, iti /
yasta idhmaṃ jabharatsiṣvidāno mūrdhānaṃ vā tatapate tvāyā / divo viśvasmātsīmaghāyata uruṣyaḥ, iti / asmāttvamadhi jāto'si tvadayaṃ jāyatāṃ punaḥ / agnaye vaiśvānarāya suvargāya lokāya svāhā ( १), iti / ya etasya tvatpañca //
iti kṛṣṇayajurvedīyataittirīyāraṇyake ṣaṣṭhaprapāṭhake dvitīyo'nuvākaḥ // २ / /
6.3 anuvāka ३
pra ketunā bṛhatā bhātyagnirāvirviśvāni vṛṣabho roravīti / divaścidantādupa māmudānaḍapāmupasye mahiṣo vavardha, iti / idaṃ ta ekaṃ para ū ta ekaṃ tṛtīyena jyotiṣā saṃviśasva / saṃveśanastanuvai cāruredhi priyo devānāṃ parame sadhasthe, iti /
nāke suparṇamupa yatpatantaꣳ hṛdā venanto abhyacakṣata tvā / hiraṇyapakṣaṃ varuṇasya dūtaṃ yamasya yonau śakunaṃ bhuraṇyum, iti / atidrava sārameyau śvānau caturakṣau śabalau sādhunā pathā / athā pitṝntsuvidatrāꣳ apīhi yamena ye sadhamādaṃ madanti, iti / yau te śvānau yama rakṣitārau caturakṣau pathirakṣī nṛcakṣasā / tābhyāꣳ rājanparidehyenaꣳ svasti cāsmā anamīvaṃ ca dhehi ( १), iti / uruṇasāvasutṛpāvuluṃbalau yamasya dūtī carato'vaśāꣳ anu / tāvasmabhyaṃ dṛśaye sūryāya punardattāvasumadyeha bhadram, iti /
soma ekebhyaḥ pavate ghṛtameka upāsate / yebhyo madhu pradhāvati tāꣳścidevāpi gacchatāt, iti / ye yudhyante pradhaneṣu śūrāso ye tanutyajaḥ / ye vā sahasradakṣiṇāstāꣳścidevāpi gacchatāt, iti / tapasā ye anādhṛṣyāstapasā ye suvargatāḥ / tapo ye cakrire mahattāꣳścidevāpi gacchatāt, iti / aśmanvatī revatīḥ saꣳrabhadhvamuttiṣṭhata prataratā sakhāyaḥ / atrā jahāma ye asannaśevāḥ śivānvayamabhi vājānuttarema ( २), iti / yadvai devasya savituḥ pavitraꣳ sahasradhāraṃ vitatamantarikṣe / yenāpunādindramanārtamārtyai tenāhaṃ māꣳ sarvatanuṃ punāmi / yā rāṣṭrātpannādapayanti śākhā abhimṛtā nṛpatimicchamānāḥ / dhātustāḥ sarvāḥ pavanena pūtāḥ prajayā'smānrayyā varcasā saꣳsṛjātha / udvayaṃ tamasasparipaśyanto jyotiruttaram / devaṃ devatrā sūryamaganma jyotiruttamam, iti / dhātā punātu savitā punātu / agnestejasā sūryasya varcasā ( ३) // dhehyuttaremāṣṭau ca //
iti kṛṣṇayajurvedīyataittirīyāraṇyake ṣaṣṭhaprapāṭhake tṛtīyo'nuvākaḥ

6.4 anuvāka ४
yaṃ te agnimamanthāma vṛṣabhāyeva paktave / imaṃ taꣳ śamayāmasi kṣīreṇa codakena ca, iti / yaṃ tvamagne samadahastvamu nirvāpayā punaḥ / kyāmbūratra jāyatāṃ pākadūrvāvyalkaśā, iti / śītike śītikāvati hrāduke hrādukāvati / maṇḍūkyāsu saṃgamayemaꣳ svagniꣳ śamaya, iti / śaṃ te dhanvanyā āpaḥ śamu te santvanūkyāḥ / śaṃ te samudriyā āpaḥ śamu te santu varṣyāḥ, iti / śaṃ te sravantīstanuve śamu te santu kūpyāḥ / śaṃ te nīhāro varṣatu śamu pṛṣvā'vaśīyatām (१), iti / avasṛja punaragne pitṛbhyo yasta āhutaścarati svadhābhiḥ / āyurvasāna upayātu śeṣaꣳ saṃgacchatāṃ tanuvā jātavedaḥ, iti / saṃgacchasva pitṛbhiḥ saꣳ svadhābhiḥ samiṣṭāpūrtena parame vyoman / yatra bhūmyai vṛṇase tatra gaccha tatra tvā devaḥ savitā dadhātu, iti / yatte kṛṣṇaḥ śakuna ātutoda pipīlaḥ sarpa uta vā śvāpadaḥ / agniṣṭadviśvādanṛṇaṃ kṛṇotu somaśca yo brāhmaṇamāviveśa, iti / uttiṣṭhātastanuvaꣳ saṃbharasva meha gātramavahā mā śarīram / yatra bhūmyai vṛṇase tatra gaccha tatra tvā devaḥ savitā dadhātu / idaṃ ta ekaṃ para ū ta ekaṃ tṛtīyena jyotiṣā saṃviśasva / saṃveśanastunavai cāruredhi priyo devānāṃ parame sadhasthe, iti / uttiṣṭha prehi pradravaukaḥ kṛṇuṣva parame vyoman / yamena tvaṃ yamyā saṃvidānottamaṃ nākamadhirohemam / aśmanvatī revatīryadvai devasya savituḥ pavitraṃ yā rāṣṭrātpannādudvayaṃ tamasaspari dhātā punātu, iti/ asmāttvamadhijāto'syayaṃ tvadadhijāyatām / agnaye vaiśvānarāya suvargāya lokāya svāhā (२), iti // avaśīyatāꣳ sadhasthe pañca ca //
iti kṛṣṇayajurvedīyataittirīyāraṇyake ṣaṣṭaprapāṭhake caturtho'nuvākaḥ

6.5 anuvāka ५
āyātu devaḥ sumanābhirūtibhiryamo ha veha prayatābhiraktā / āsīdatāꣳ suprayate ha barhiṣyūrjāya jātyai mama śatruhatyai / yame iva yatamāne yadaitaṃ pra vāṃ bharanmānuṣā devayantaḥ / āsīdataꣳ svamu lokaṃ vidāne svāsasthe bhavatamindave naḥ, iti /
yamāya somaꣳ sunuta yamāya juhutā haviḥ / yamaꣳ ha yajño gacchatyagnidūto araṃkṛtaḥ / yamāya ghṛtavaddhavirjuhota pra ca tiṣṭhata / sa no deveṣvāyamaddīrghamāyuḥ prajīvase / yamāya madhumattamaꣳ rājñe havyaṃ juhotana / idaṃ nama ṛṣibhyaḥ pūrvajebhyaḥ pūrvebhyaḥ pathikṛdbhyaḥ (१) / yo'sya kauṣṭhya jagataḥ pārthivasyaika idvaśī / yamaṃ bhaṅgyaśravo gāya yo rājā'naparodhyaḥ, iti / yamaṃ gāya bhaṅgyaśravo yo rājā'naparodhyaḥ / yenā''po nadyo dhanvāni yena dyauḥ pṛthivī dṛḍhā, iti / hiraṇyakakṣyāntsudhurānhiraṇyākṣānayaḥśaphān / aśvānanaśyato dānaṃ yamo rājā'bhitiṣṭhati, iti / yamo dādhāra pṛthivīṃ yamo viśvamidaṃ jagat / yamāya sarvamitrasthe yatprāṇadvāyurakṣitam, iti / yathā pañca yathā ṣaḍyathā pañcadaśarṣayaḥ / yamaṃ yo vidyātsa brūyādyathaika ṛṣirvijānate (२), iti / trikadrukebhiḥ patati ṣaḍurvīrekamidbṛhat / gāyatrī triṣṭupchandāꣳsi sarvā tā yama āhitā, iti / aharaharnayamāno gāmaśvaṃ puruṣaṃ jagat / vaivasvato na tṛpyati pañcabhirmānavairyamaḥ, iti / vaivasvate vivicyante yame rājani te janāḥ / ye ceha satyenecchante ya u cānṛtavādinaḥ, iti / te rājanniha vivicyante'thā yanti tvāmupa / devāꣳśca ye namasyanti brāhmaṇāꣳścāpacityati, iti / yasminvṛkṣe supalāśe devaiḥ saṃpibate yamaḥ / atrā no viśpatiḥ pitā purāṇā anuvenati (३), iti // pathikṛdbhyo vijānate'nuvenati //
iti kṛṣṇayajurvedīyataittirīyāraṇyake ṣaṣṭhaprapāṭhake pañcamo'nuvākaḥ

6.6 anuvāka ६
vaiśvānare haviridaṃ juhomi sāhasramutsaꣳ śatadhārametam / tasminneṣa pitaraṃ pitāmahaṃ prapitāmahaṃ bibharatpinvamāne, iti / drapsaścaskanda pṛthivīmanu dyāmimaṃ ca yonimanu yaśca pūrvaḥ / tṛtīyaṃ yonimanu saṃcarantaṃ drapsaṃ juhomyanu sapta hotrāḥ, iti / imaꣳ samudraꣳ śatadhāramutsaṃ vyacyamānaṃ bhuvanasya madhye / ghṛtaṃ duhānāmaditiṃ janāyāgne mā hiꣳsīḥ parame vyoman, iti / apeta vīta vi ca sarpatāto ye'tra stha purāṇā ye ca nūtanāḥ / ahobhiradbhiraktubhirvyaktaṃ yamo dadātvavasānamasmai, iti / savitaitāni śarīrāṇi pṛthivyai māturupastha ādadhe / tebhiryujyantāmaghniyāḥ ( १ ), iti / śunaṃ vāhāḥ śunaṃ nārāḥ śunaṃ kṛṣatu lāṅgalam / śunaṃ varatrā badhyaꣳntāꣳ śunamaṣṭrāmudiṅgaya śunāsīrā śunamasmāsu dhattam, iti / śunāsīrāvimāṃ vācaṃ yaddivi cakrathuḥ payaḥ / tenemāmupasiñcatam, iti / sīte vandāmahe tvā'rvācī subhage bhava / yayā naḥ subhagā sasi yathā naḥ suphalā sasi, iti / savitaitāni śarīrāṇi pṛthivyai māturupastha ādadhe / tebhiradite śaṃ bhava, iti / vimucyadhvamaghniyā devayānā atāriṣma tamasaspāꣳramasya / jyotirāpāma suvaraganma ( २), iti / pra vātā vānti patayanti vidyuta udoṣadhīrjiꣳhate pinvate suvaḥ / irā viśvasmai bhuvanāya jāyate yatparjanyaḥ pṛthivīꣳ retasā'vati, iti / yathā yamāya hārmyamavapanpañca mānavāḥ / evaṃ vapāmi hārmyaṃ yathā'sāma jīvaloke bhūrayaḥ, iti / citaḥ stha paricita ūrdhvacitaḥ śrayadhvaṃ pitaro devatā / prajāpatirvaḥ sādayatu tayā devatayā, iti/ āpyāyasva, saṃ te ( ३), iti //
aghniyā aganma sapta ca //
iti kṛṣṇayajurvedīyataittirīyāraṇyake ṣaṣṭhaprapāṭhake ṣaṣṭho'nuvākaḥ

6.7 anuvāka ७
utte tabhnomi pṛthivīṃ tvatparīmaṃ lokaṃ nidadhanmo ahaꣳ riṣam / etāꣳ sthūṇāṃ pitaro dhāraꣳyantu te'trā yamaḥ sādanātte minotu, iti / upasarpa mātaraṃ bhūmimetāmuruvyacasaṃ pṛthivīꣳ suśevām / ūrṇamradā yuvatirdakṣiṇāvatyeṣā tvā pātu nirṛtyā upasthe, iti / ucchmañcasva pṛthivi mā vibādhithāḥ sūpāyanā'smai bhava sūpavañcanā / mātā putraṃ yathā sicā'bhyenaṃ bhūmi vṛṇu. iti / ucchramañcamānā pṛthivī hi tiṣṭhasi sahasraṃ mita upa hi śrayantām / te gṛhāso madhuścuto viśvāhā'smai śaraṇāḥ santvatra, iti / eṇīrdhānā hariṇīrarjunīḥ santu dhenavaḥ / tilavatsā ūrjamasmai duhānā viśvāhā santvanapasphurantīḥ ( १), iti / eṣā te yamasādane svadhā nidhīyate gṛhe / akṣitirnāma te asau, iti / idaṃ pitṛbhyaḥ prabharema barhirdevebhyo jīvanta uttaraṃ bharema / tattvamārohāso medhyo bhavaṃ(bhava?) yamena tvaṃ yamyā saṃvidānaḥ, iti / mā tvā vṛkṣau saṃbādhiṣṭāṃ mā mātā pṛthivi tvam / pitṝnhyatra gacchāsyedhāṃsaṃ yamarājye, iti / mā tvā vṛkṣau saṃbādhethāṃ mā mātā pṛthivī mahī / vaivasvataꣳ hi gacchāsi yamarājye virājasi, iti / naḻaṃ plavamārohaitaṃ naḻena patho'nvihi / sa tvaṃ naḻaplavo bhūtvā saṃtara pratarottara ( २), iti / savitaitāni śarīrāṇi pṛthivyai māturupastha ādadhe / tebhyaḥ pṛthivi śaṃ bhava, iti / ṣaḍḍhotā sūryaṃ te cakṣurgacchatu vātamātmā dyāṃ ca gaccha pṛthivīṃ ca dharmaṇā / apo vā gaccha yadi tatra te hitamoṣadhīṣu pratitiṣṭhā śarīraiḥ, iti / paraṃ mṛtyo anuparehi panthāṃ yaste sva itaro devayānāt / cakṣuṣmate śṛṇvate te bravīmi mā naḥ prajāꣳ rīriṣo mota vīrān, iti / śaṃ vātaḥ śaꣳ hi te ghṛṇiḥ śamu te santvoṣadhīḥ / kalpantāṃ me diśaḥ śagmāḥ, iti / pṛthivyāstvā loke sādayāmyamuṣya śarmāsi pitaro devatā / prajāpatistvā sādayatu tayā devatayā, iti / antarikṣasya tvā divastvā diśāṃ tvā nākasya tvā pṛṣṭhe bradhnasya tvā viṣṭape sādayāmyamuṣya śarmāsi pitaro devatā / prajāpatistvā sādayatu tayā devatayā ( ३), iti //
anapasphurantīruttara devatayā dve ca //
iti kṛṣṇayajurvedīyataittirīyāraṇyake ṣaṣṭhaprapāṭhake saptamo'nuvākaḥ

6.8 anuvāka ८
apūpavānghṛtavāꣳścarureha sīdatūttabhnuvanpṛthivīṃ dyāmutopari / yonikṛtaḥ pathikṛtaḥ saparyata ye devānāṃ ghṛtabhāgā iha stha / eṣā te yamasādane svadhā nidhīyate gṛhe'sau / daśākṣarā tāꣳ rakṣasva tāṃ gopāyasva tāṃ te paridadāmi tasyāṃ tvā mā dabhanpitaro devatā / prajāpatistvā sādayatu tayā devatayā, iti / apūpavāñśṛtavānkṣīravāndadhivānmadhumāꣳścarureha sīdatūttabhnuvanpṛthivīṃ dyāmutopari/ yoni kṛtaḥ pathikṛtaḥ saparyata ye devānāꣳ śṛtabhāgāḥ kṣaḥi(?)bhāgā dadhibhāgā (?)bhāgā iha stha/ eṣa te yamusādane svadhā nidhīyate gṛhe'sau / śatākṣarā sahasrākṣarā'yutākṣarā'cyutākṣarā tāꣳ rakṣasva tāṃ gopāyasva tāṃ te paridadāmi tasyāṃ tvāmādabhanpitaro devatā / prajāpatistvā sādayatu tayā devatayā ( १), iti //
apūpavānasau daśa //
iti kṛṣṇayajurvedīyataittirīyāraṇyake ṣaṣṭhaprapāṭhake'ṣṭamo'nuvākaḥ

6.9 anuvāka ९
etāste svadhā amṛtāḥ karomi yāste dhānāḥ parikirāmyatra / tāste yamaḥ pitṛbhiḥ saṃvidāno'tra dhenūḥ kāmadughāḥ karotu, iti / tvāmarjunauṣadhīnāṃ payo brahmāṇa idviduḥ / tāsāṃ tvā madhyādādade carubhyo apidhātave, iti / dūrvāṇāꣳ stambamāharaitāṃ priyatamāṃ mama / imāṃ diśaṃ manuṣyāṇāṃ bhūyiṣṭhā'nu virohatu iti / kāśānāꣳ stambamāhara rakṣasāmapahatyai / ya etasyai diśaḥ parābhavannaghāyavo yathā te nābhavānpunaḥ, iti / darbhāṇāꣳ stambamāhara pitṛṇāmoṣadhīṃ priyām / anvasyai mūlaṃ jīvādanu kāṇḍamatho phalam, iti / lokaṃ pṛṇa tā asya sūdadohasaḥ iti / śaṃ vātaḥ śaꣳ hi te ghṛṇiḥ śamu te santvoṣadhīḥ / kalpantāṃ te diśaḥ sarvāḥ, iti / idameva meto'parāmārtimārāma kāṃcana / tathā tadaśvibhyāṃ kṛtaṃ mitreṇa varuṇena ca, iti / varaṇo vārayādidaṃ devo vanaspatiḥ / ārtyai nirṛtyai dveṣācca vanaspatiḥ, iti / vidhṛtirasi vidhārayāsmadaghā dveṣāꣳsi, iti / śami śamayāsmadaghā dveṣāꣳsi, iti / yava yavayāsmadaghā dveṣāꣳsi, iti / pṛthivīṃ gacchāntarikṣaṃ gaccha divaṃ gaccha diśo gaccha suvargaccha suvargaccha diśo gaccha divaṃ gacchāntarikṣaṃ gaccha pṛthivīṃ gacchāpo vā gaccha yadi tatra te hitamoṣadhīṣu pratitiṣṭhā śarīraiḥ, iti / aśmanvatī revatīryadvai devasya savituḥ pavitraṃ yā rāṣṭrātpannādudvayaṃ tamasaspari dhātā punātu(२), iti // atho phalaṃ punātu //
iti kṛṣṇayajurvedīyataittirīyāraṇyake ṣaṣṭhaprapāṭhake navamo'nuvākaḥ

6.10 anuvāka १०
ārohatā''yurjarasaṃ gṛṇānā anupūrvaṃ yatamānā yatiṣṭa / iha tvaṣṭā sujanimā suratno dīrghamāyuḥ karatu jīvase vaḥ, iti / yathā'hānyanupūrvaṃ bhavanti yathartava ṛtubhiryanti klṛptāḥ / yathā na pūrvamaparo jahātyevā dhātarāyūꣳṣi kalpayaiṣām, iti / na hi te agne tanuvai krūraṃ cakāra martyaḥ / kapirbabhasti tejanaṃ punarjarāyu gauriva / apa naḥ śośucadaghamagne śuśudhyā rayim / apa naḥ śośucadaghaṃ mṛtyave svāhā / anaḍvāhamanvārabhāmahe svastaye / sa na indra iva devebhyo vahniḥ saṃpāraṇo bhava ( १), iti / ime jīvā vi mṛtairāvavartinnabhūdbhadrā devahūtiṃ no adya / prāñjo'gāmā nṛtaye hasāya draghīya āyuḥ pratarāṃ dadhānāḥ, iti / mṛtyoḥ padaṃ yopayanto yadaima drāghīya āyuḥ
pratarāṃ dadhānāḥ / āpyāyamānāḥ prajayā dhanena śuddhāḥ pūtā bhavatha yajñiyāsaḥ, iti / imaṃ jīvebhyaḥ paridhiṃ dadhāmi mā no'nugāda paro ardhametam / śataṃ jīvantu śaradaḥ purūcīstiro mṛtyuṃ dadmahe parvatena, iti / imā nārīravidhavāḥ supatnīrāñjanena sarpiṣā samṛśantām / anaśravo anamīvā suśevā ārohantu janayo yonimagre, iti / yadāñjanaṃ traikakudaṃ jātaꣳ himavataspari / tenāmṛtasya mūlenārātīrjambhayāmasi, iti / yathā tvamudbhinatsyoṣadhe pṛthivyā adhi / evamima udbhindantu kīrtyā yaśasā brahmavarcasena, iti / ajo'syajāsmadaghā dveṣāꣳsi, iti / yavo'si yavayāsmadaghā dveṣāꣳsi ( २), iti //
saṃpāraṇo bhava jambhayāmasi trīṇi ca //
iti kṛṣṇayajurvedīyataittirīyāraṇyake ṣaṣṭhaprapāṭhake daśamo'nuvākaḥ

6.11 anuvāka ११
apa naḥ śośucadaghamagne śuśudhyā rayim / apa naḥ śośucadagham, iti / sukṣetriyā sugātuyā vasūyā ca yajāmahe / apa naḥ śośucadagham, iti / pra yadbhandiṣṭha eṣāṃ prā''smākāsaśca sūrayaḥ / apa naḥ śośucadagham, iti / pra yadagneḥ sahasvato viśvato yanti sūrayaḥ / apa naḥ śośucadagham, iti / pra yatte agne sūrayo jāyemahi pra te vayam / apa naḥ śośucadagham ( १), iti / tvaꣳ hi viśvatomukha viśvataḥ paribhūrasi / apa naḥ śośucadagham, iti / dviṣo no viśvato mukhā'ti nāveva pāraya / apa naḥ śośucadagham, iti / sa naḥ sindhumiva nāvayā'tiparṣā svastaye / apa naḥ śośucadagham, iti / āpaḥ pravaṇādiva yatīrapāsmatsyandatāmagham / apa naḥ śośucadagham, iti / udvanādudakānīvāpāsmatsyandatāmagham / apa naḥ śośucadagham, iti / ānandāya pramodāya punarāgāꣳ svāngṛhān / apa naḥ śośucadagham, iti / na vai tatra pramīyate gauraśvaḥ puruṣaḥ paśuḥ / yatredaṃ brahma kriyate paridhirjīvanāya kamapa naḥ śośucadagham (२),iti //
aghamaghaṃ catvāri ca //
iti kṛṣṇayajurvedīyataittirīyāraṇyake ṣaṣṭhaprapāṭhaka ekādaśo'nuvākaḥ

6.12 anuvāka १२
apaśyāma yuvatimācarantīṃ mṛtāya jīvāṃ pariṇīyamānām / andhena yā tamasā prāvṛtā'si prācīmavācīmavayannariṣṭyai, iti / mayaitāṃ māꣳstāṃ bhriyamāṇā devī satī pitṛlokaṃ yadaiṣi / viśvavārā nabhasā saṃvyayantyubhau no lokau payasā''vṛṇīhi, iti / rayiṣṭhāmagniṃ madhumantamūrmiṇamūrjaḥ santaṃ tvā payasopasaꣳsadema / saꣳ rayyā samu varcasā sacasvā naḥ svastaye, iti / ye jīvā ye ca mṛtā ye jātā ye ca jantyāḥ /
tebhyo ghṛtasya dhārayituṃ madhudhārā vyundatī, iti / mātā rudrāṇāṃ duhitā vasūnāꣳ svasā''dityānāmamṛtasya nābhiḥ / pra ṇu vocaṃ cikituṣe janāya mā gāmanāgāmaditiṃ vadhiṣṭa, iti / pibatūdakaṃ tṛṇānyattu / omutsṛjata ( १) iti //
vadhiṣṭa dve ca //
iti kṛṣṇayajurvedīyataittirīyāraṇyake ṣaṣṭhaprapāṭhake dvādaśo'nuvākaḥ

ॐ śāntiḥ śāntiḥ śāntiḥ /
hariḥ ॐ /
iti kṛṣṇayajurvedīyataittirīyāraṇyake ṣaṣṭhaḥ prapāṭhakaḥ samāptaḥ