Suvarṇaprabhāsasūtra · Chapter 4

atha khalu ruciraketurbodhisattvasteṣāṃ buddhānāṃ bhagavatāṃ tayośca dvayoḥ satpuruṣayorantikādbhagavataḥ śākyamunerāyuḥpramāṇanirdeśaṃ śrutvā tuṣṭa udagra āttamanāḥ pramuditaḥ prītisaumanasyajātaścodāreṇa prītiprāmodyena sphuṭo 'bhūt / asmiṃstathāgatāyuḥpramāṇanirdeśe nirdiśyamāne 'prameyāṇāmasaṃkhyeyānāṃ sattvānāmanuttarāyāṃ samyaksaṃbodhau cittamutpāditam / te ca tathāgatā antaritā iti /
iti śrīsuvarṇaprabhāsoottamasūtrendrarāje tathāgatāyuḥpramāṇa nirdeśaparivarto nāma dvitīyaḥ //
// Svapnaparivartaḥ //
atha khalu ruciraketurnāma bodhisattvaḥ svuptaḥ svapnāntaragataḥ suvarṇāṃ suvarṇamayīṃ bherīmadrākṣīt / samantādavabhāsamānāṃ tadyathāpi nāma sūryamaṇḍalaṃ sarvāsu dikṣvaprameyānasaṃkhyeyānbuddhānadrākṣīdratnavṛkṣamūle siṃhāsane vaiḍūryamaye pratiniṣaṇṇānanekaśatasahasrikāyāṃ pariṣadāyāṃ parivṛtāyāṃ puraskṛtāyāṃ dharmadeśayamānān / tatra ca brāhmaṇarūpeṇa puruṣamadrākṣīt tāṃ bherīṃ parāhantam / tatra bherīśabdādimāmevaṃrūpāṃ gāthāṃ niścaramāṇāmaśrauṣīt /
atha khalu ruciraketurbodhisattvaḥ prativibuddhaḥ samanantaraṃ tāṃ dharmadeśanāgāthāmanusmarati sma / anusmaramāṇastasyā rātryā atyayena rājagṛhānmahānagarānniṣkramyānekaiḥ prāṇisahasraiḥ sārdhaṃ yena gṛdhrakūṭaḥ parvatarājo yena bhagavāṃstenopasaṃkrānta upasaṃkramya bhagavataḥ pādau śirasā vanditvā bhagavantaṃ tripradakṣiṇīkṛtyaikānte nyaṣīdat /
atha khalu ruciraketurbodhisattvo yena bhagavāṃstenāñjaliṃ praṇamya yāścaiva tāḥ svapnāntare dundubhiśabdena deśanāgāthāḥ śrutāstā uvāca /
iti śrīsuvarṇaprabhāsottamasūtrendrarāje svapnaparivarto nāma tṛtīyaḥ //
// Deśanāparivartaḥ //
ekarātramatandreṇa svapnāntaragataṃ mayā /
dundubhī rucirā dṛṣṭā samantakanakaprabhā

jvalamānaṃ yathā sūryaṃ samantena virocitam /
prabhāsitā daśa diśo dṛṣṭā buddhāḥ samantataḥ

niṣaṇṇā ratnavṛkṣeṣu vaiḍūrye ca prabhāsvare /
anekaśatasāhasryā pariṣadā prabhāskṛtāḥ

dṛṣṭā brāhmaṇarūpeṇa parāhanyantī dundubhī /
tenāsyāstāḍyamānāyā ime ślokā abhiśrutāḥ

suvarṇaprabhāsottamadundubhena śāmyantu duḥkhā trisahasraloke /
apāyaduḥkhā yamalokaduḥkhā dāridraduḥkhāni tathaiva loke

anena co dundubhiśabdanādinā śāmyantu sarvavyasanāni loke /
samantasattvā hṛdayāhatā tathā tathābhayā śāntabhayā munīndra

yathaiva sarvāryaguṇopapannaḥ saṃsārasarvajñamahāmunīndraḥ /
tathaiva bhontu guṇasāgarāḥ prajāḥ samādhibodhyaṅgaguṇairupetāḥ

anena co dundubhighoṣanādinā bhavantu brahmasvara sarvasattvāḥ /
spṛśantu buddhatvavarāṅgabodhiṃ pravartayantū śubhadharmacakram

tiṣṭhantu kalpāni acintiyāni deśentu dharmaṃ jagato hitāya /
hanantu kleśānvidhamantu duḥkhāṃ śamentu rāgaṃ tatha doṣamoham

ye sattva tiṣṭhinti apāyabhūmau ādīptasaṃprajvalitāgnigātrāḥ /
śṛṇvantu te dundubhisaṃpravāditāṃ namo 'stu buddhāya vaco labhantu

jātismarāḥ sattva bhavantu sarve jātīśatā jātisahasrakoṭyaḥ /
anusmarantaḥ satataṃ munīndraṃ śṛṇvantu teṣāṃ vacanaṃ hyudāram

anena co dundibhi ghoṣanādinā labhantu buddhehi sadā samāgamam /
vivarjayantū khalu pāpakarma carantu kuśalāni śubhakriyāṇi

narāsurāṇāmapi sarvaprāṇīnāṃ yācantu tāṃ deśanaprārthanāya /
anena co dundubhighoṣanādinā tatsarvi teṣāṃ paripūrayeyam

ye ghoranarake upapannasattvā ādīptasaṃprajvalitāgnigātrāḥ /
nistīrṇaśokāśca paribhramanti nirvāpaṇaṃ bheṣyati teṣu cāmunā

ye duḥkhasattvāḥ sudāruṇārśca ghorā narakeṣu preteṣu manuṣyaloke /
anena ca dundubhighoṣanādinā sarve ca teṣāṃ praśamantu duḥkhāḥ

nisrāṇamaparitrāṇamaśaraṇyaṃ kṛtāni ca /
trātā teṣāṃ bhaveyaṃ ca śaraṇyaḥ śaraṇottamaḥ

samanvāharantu māṃ buddhāṃ kṛpākāruṇyacetasaḥ /
atyayaṃ pratigṛhṇantu daśadikṣu vyavasthitāḥ

yacca me pāpakaṃ karma kṛtapūrvaṃ sudāruṇam /
tatsarvaṃ deśayiṣyāmi sthito daśabalāgrataḥ

mātāpitṝnavajānantā buddhānāmaprajānatā /
kuśalaṃ cāprajānantā yattu pāpaṃ kṛtaṃ mayā

eścaryamadamattena kularūpamadena ca /
tāruṇyamadamattena yattu pāpaṃ kṛtaṃ mayā

duścintitaṃ daruktaṃ ca duṣkṛtenāpi karmaṇā /
anādīnavadṛṣṭena yattu pāpaṃ kṛtaṃ mayā

bālabuddhipracāreṇa ajñānāvṛtacetasā /
pāpamitravaśāccaiva kleśavyākulacetasā

krīḍāratiśāccaiva śokarogavaśena ca /
atṛptadhanadoṣeṇa yattu pāpaṃ kṛtaṃ mayā

anāryajanasaṃsargādīrṣyāmātsaryahetunā /
śāṭhyadāridradoṣeṇa yattu pāpaṃ kṛtaṃ mayā

vyasanāgamakāle 'sminkāmānāṃ bhayahetunā /
anaiśvaryagatenāpi yattu pāpaṃ kṛtaṃ mayā

calacittavaśenaiva kāmakrodhavaśena vā /
kṣuptipāsārditenāpi yattu pāpaṃ kṛtaṃ mayā

pānarthāṃ bhojanārthaṃ ca vastrārthaṃ strīpsuhetunā /
vividhakleśasaṃtāpairyattu pāpaṃ kṛtaṃ mayā

kāyavāṅbhānasaṃ pāpaṃ tridhātucaritaṃ ca tat /
yatkṛtmīdṛśaiḥ rūpaistatsarvaṃ deśayāmyaham

yattadbuddheṣu dharmeṣu śrāvakeṣu tathaiva ca /
agauravaṃ kṛtaṃ syāddhi tatsarvaṃ deśayāmyaham

yattatpratyekabuddheṣu bodhisattveṣu vā punaḥ /
agauravaṃ kṛtaṃ syāddhi tatsarvaṃ deśayāmyaham

saddharmaḥ pratikṣiptaḥ syādajānantena me sadā /
mātāpitṛṣvagauravaṃ tatsarvaṃ deśayāmyaham

mūrkhatvenāpi bālatvānmānadarpāvṛtena ca /
rāgadveṣeṇa mohena tatsarvaṃ deśayāmyaham

pūjayitvā daśadiśi loke daśabalāñjinān /
uddhariṣyāmyahaṃ sattvānsarvaduḥkhāddaśaddiśi

sthāpayiṣye daśabhuvi sarvasattvānacintiyān /
daśabhūmau hi sthitvā ca sarve bhontu tathāgatāḥ

ekaikasya hi sattvasya careyaṃ kalpakoṭayaḥ /
yāvacchakyaṃ hi tatsarvaṃ mokṣituṃ duḥkhasāgarāt

teṣāṃ sattvānāṃ deśeyaṃ gambhīrāṃ deśanāmimām /
svarṇaprabhottamāṃ nāma sarvakarmakṣayaṃkarīṃ

yena kalpasahasreṣu kṛtaṃ pāpaṃ sudāruṇam /
ekavelaṃ prakāśantu sarve vrajantu saṃkṣayam

deśayiṣye imāṃ dharmāṃ svarṇaprabhāmanuttarām /
ye śṛṇvanti śubhāṃ teṣāṃ saṃyāntu pāpasaṃkṣayam

sthāsyāmi daśabhūmau tāndaśaratnākare vare /
ābhāsayanbuddhaguṇaistareyaṃ bhavasāgarāt

yacca buddhasamudaughaṃ gambhīraṃ guṇasāgaram /
acintiyabudhaguṇaiḥ sarvajñatvaṃ prapūraye

samādhiśatasāhasrairdhāraṇībhiracintitaiḥ /
indriyabalabodhyaṅgairbhave daśabalottamaḥ

vyavalokaya māṃ buddha samanvāhṛtacetasā /
atyayaṃ pratigṛhṇātu vimocayatu māṃ bhayāt

yattu pāpaṃ kṛtaṃ pūrvaṃ mayā kalpaśateṣu ca /
tasyārthe śokacitto 'haṃ kṛpaṇastṛṣṇayārditaḥ

vibhemi pāpakarmo 'haṃ satataṃ hīnamānasaḥ /
yatra yatra cariṣyāmi na cāsti maṅgalaṃ kvacit

sarve kāruṇikā buddhāḥ sattvabhayaharāḥ jināḥ /
atyayaṃ pratigṛhṇantu mocayantu ca māṃ bhayāt

kleśakarmaphalaṃ mahyaṃ pravāhantu tathāgatāḥ /
snāpayantu ca māṃ buddhāḥ kāruṇyavimalodakaiḥ

sarvapāpaṃ deśayāmi yattu pūrvaṃ kṛtaṃ mayā /
yacca hyetarhi me pāpaṃ tatsarvaṃ deśayāmyaham

āyatyā sarvamāpadyansarvaduṣkṛtakarmaṇā /
na cchādayāmi tatpāpaṃ yadbhavenmama duṣkṛtam

trividhaṃ kāyikaṃ karma vācikaṃ tu caturvidham /
mānasaṃ triprakāraṃ ca tatsarvaṃ deśayāmyaham

kāyakṛtaṃ ca vākkṛtaṃ manasā ca vicintitam /
kṛtaṃ daśavidhaṃ karma tatsarvaṃ deśayāmyaham

daśākuśala varjitvā sevitvā kuśalāndaśa /
sthāsyāmi daśabhūmau ca paśye daśabalottamam

yacca me pāpakaṃ karma aniṣṭaphalavāhakam /
tatsarvaṃ deśayiṣyāmi buddhānāṃ purataḥ sthitaḥ

ye cāpi jambudvīpe 'sminye cānyalokadhātuṣu /
kurvanti kuśalaṃ karma tatsarvamanumodaye

yacca puṇyārjitaṃ mahyaṃ kāyavāṅbhanasāpi ca /
tena kuśalamūlena spṛśeyaṃ bodhimuktamām

bhavagatisaṃkaṭabālabuddhinā pāpaṃ hyapi yacca kṛtaṃ sudāruṇam /
daśabalasaṃmukhamagrataḥ sthitastatsarvapāpaṃ pratideśayāmi ca

tatpāpaṃ samuccitaṃ janmasaṃkaṭe vividhakāmapracārasaṃkaṭe /
lokasaṃkaṭe bhavasaṃkaṭe ca sarvamūrkhakṛtakleśasaṃkaṭe

cāpalyamadanacittasaṃkaṭe pāpamitrāgamasaṃkaṭairapi /
saṃsārasaṃkaṭarāgasaṃkaṭe dveṣamohatamasaṃkaṭairapi

akṣayasaṃkaṭakālasaṃkaṭe puṇyamapārjanasaṃkaṭairapi /
atuliyajinasaṃmukhasthitaḥ tatsarvapāpaṃ pratideśayāmi ca

vandāmi buddhān guṇasāgaropamān suvarṇavarṇānavabhāsitadigantān /
teṣāṃ jinānāṃ śaraṇaṃ vrajāmi mūrdhrā ca tānsarvajinānnamāmi

suvarṇavarṇaṃ ---- kanakācalābham vaiḍūryanirmalaviśuddhasulocanāṅgam /
śrītejakīrtijvalanākarabuddhasūryaṃ karuṇāprabhaṃ vidhamakaṃ tamasāndhakānām

sunirmalaṃ suruciraṃ suvirājitāṅgaṃ saṃbuddhasūryakanakāmalaniḥsṛtāṅgam /
kleśāgnitaptamanasāṃ jvalanāgnikalpaṃ prahlādanaṃ muniniśākararaśmijālam

dvātriṃśalakṣaṇadharaṃ lalitendriyāṅgam anuvyañjanaḥ suruciraṃ suvirājitāṅgam / śrīpuṇyatejajvalanākularaśmijālaṃ saṃtiṣṭhase tamasi sūrya iva triloke

vaiḍūryanirmalaviśālavicitravarṇastāmrāruṇai rajatasphaṭikalohitāṅgam /
nānāvicitrasamalaṅkṛtaraśmijālaṃ tvaṃ saṃvirocasi mahāmuni sūryakalpaḥ

saṃsāranadyapatitavyasanaughamadhye śokākule maraṇatoyajarātaraṅge /
duḥkhārṇave paramakampitacaṇḍavege saṃtāraya sugatabhāskararaśmijālaiḥ

vandāmi buddhān kanakojvalāṅgān suvarṇavarṇavyavabhāsitāṅgān /
jñānākarān sarvatrilokasārān vicitrarūpān śubhalakṣaṇāṅgān

yathā samudre jalamaprameyaṃ yathā mahī cāṇurajairanantā /
yathopalairmeruranantatulyo yathaiva cākāśamanantapāram

tathaiva buddhasya guṇā anantāḥ na śakya jñātuṃ khalu sarvasattvaiḥ /
anekakalpāni tu cintayante na śakya paryantaguṇāni jñātum

mahī saśailā sagiriḥ sasāgarā gaṇaṃ tu kalpairapi śakya jānitum /
jalaṃ ca vālāgramapi pramāṇaṃ na śakya buddhasya guṇāgrapāram

etādṛśī sattva bhavantu sarve guṇena varṇena yaśena koṭyā /
gātreṇa te śobhitalakṣaṇena aśītyanuvyañjanamaṇḍitena

anena cāhaṃ kuśalena karmaṇā bhaveya buddho na cireṇa loke /
deśeya dharmaṃ jagato hitāya moceya sattvānbahuduḥkhapīḍitān

jayeya māraṃ sabalaṃ sasainyaṃ pravartayeyaṃ śubhadharmacakram /
tiṣṭheya kalpāni acintiyāni tarpeya sattvānamṛtena pāṇinā

pūreya ṣaṭpāramitā anuttarā yathaiva pūrvaṃ jinapūrvakānām /
haneya kleśānvidhameya duḥkhān śameya rāgāṃstatha dveṣamohān

jātismaro nitya bhaveya cāhaṃ jātiśatā jātisahasrakoṭyaḥ /
anusmareyaṃ satataṃ munīndraṃ śṛṇvīya teṣāṃ vacanaṃ hyudāram

anena cāhaṃ kuśalena karmaṇā labheya buddhehi sadā samāgamam /
vivarjayeyaṃ khalu pāpakarma careya puṇyāni śubhākarāṇi

sarvatra kṣetreṣu ca sarvaprāṇināṃ sarve ca pāpāḥ praśamantu loke /
ye sattvā vikalendriya aṅgahīnāḥ te sarvi kuśalendriya bhontu sāṃpratam

ye vyādhinā durbalakṣīṇagātrā niśrāṇabhūtāśca daśodiśāsu /
te sarvi mucyantu ca vyādhito laghu labhantu cārogyabalendriyāni

kurājacaurasamārjitabadhyaprāptā nānāvidhairmayaśatairvyasanopapannāḥ /
te sarvi sattvā vyasanāgataduḥkhitā hi mucyantu te bhayaśataiḥ paramaiḥ sughoraiḥ

ye pīḍitā bandhanabaddhapīḍitā vividheṣu vyasaneṣu saṃsthitā hi /
anekaāyāsasahasravyākulā vicitrabhayadāruṇaśokaprāptāḥ

te sarve mucyantu ca bandhanebhyaḥ saṃtāḍitā mucyantu ca tāḍanebhyaḥ /
vadhyāśca mucyantu jīvitebhyo vyasanāgatā nirbhayā bhontu sarve

ye sattva kṣuttarṣanipīḍitāśca labhantu te bhojanapānacitram /
andhāśca paśyantu vicitrarūpān vadhirāśca śṛṇvantu manojñaghoṣān

nagnāśca vastrāṇi labhantu citrā daridrasattvāśca dhanāṃllabhantu /
prabhūtadhanadhānyavicitraratnāḥ sarve ca sattvāḥ sukhino bhavantu

mā kasyaciddhāvatu duḥkhavedanā sudarśanāḥ sattva bhavantu sarve /
abhirūpaprāsādikasaumyarūpā anekasukhasaṃcita nitya bhontu

manaḥśāntapaurāḥ susamṛddhapuṇyāḥ vīṇā mṛdaṅgā paṭahā sughoṣā /
utsāḥ sarāḥ puṣkariṇī taḍāgāḥ suvarṇapadmotpalapadminībhiḥ

sahacittamātreṇa tu teṣa bhontu annaṃ ca pānaṃ ca tathaiva vastram /
dhanaṃ hiraṇyaṃ maṇimuktibhūṣaṇaṃ suvarṇavaiḍūryavicitraratnam

mā duḥkhaśabdāḥ kvaci loki bhontu bhā caikasattvaḥ pratikūladarśī /
sarve ca te bhontu udāravarṇāḥ prabhākarā bhontu paraspareṇa

yā kāci saṃpatti manuṣyaloke sā teṣu bhotū manasopapattiḥ /
sarvābhiprāyā sahacittamātraiḥ puṇyena phalena paripūrayantu

gandhaṃ ca mālyaṃ ca vilepanaṃ ca dhūpaṃ ca cūrṇaṃ kusumaṃ ca pūrṇam /
trikāle vṛkṣehi pravarṣayantu gṛhṇantu te sattva bhavantu tuṣṭāḥ

kurvantu pūjāṃ daśasū diśāsu acintiyāṃ sarvatathāgatānām /
sabodhisattvān saśrāvakāṇāṃ dharmasya bodhipratisaṃsthitasya

nīcāṃ gatiṃ sarvi vivarjayantu tarantu aṣṭāṅgikavīcivṛttāḥ /
āsādayantu jinarājamūrti labhantu buddhehi sadā samāgamam

uccaiḥ kulīnā hi bhavantu nityaṃ prabhūtadhanadhānyasamṛddhakośāḥ /
rūpeṇa śauryeṇa yaśena kīrtyā samalaṅkṛtā bhontu anekakalpān

sarvā striyo nitya narā bhavantu śūrāśca vīrāśca vijñapaṇḍitāśca /
te sarvi bodhāya carantu nityaṃ carantu te pāramitāsu ṣaṭsu

paśyantu buddhān daśasū diśāsu ratnottamavṛkṣasukhopaviṣṭān /
vaiḍūryasiṃhāsani saṃniṣaṇṇān śṛṇvantu dharmāṃśca prakāśyamānān

pāpāni karmāṇi mayā jitāni pūrvārjitā yadbhavasaṃkaṭeṣu /
ye pāpakarmābhiratā vahante te sarvi kṣīyantu ca nirviśeṣāḥ

te sarvasattvā bhavabandhanasthāḥ saṃsārapāśairdṛḍhabandhabaddhāḥ /
prajñākarairbhāsita bhontu bandhanānmucyantu duḥkhairupajā bhavantu

ye cāpi sattvā iha jāmbudvīpe ye cāpi anyaṣu ca lokadhātuṣu /
kurvantu gambhīravicitrapuṇyaṃ tatsarvapuṇyaṃ hyanumodayāmi

tenaiva puṇyābhyanumodanena kāyena vācā manasārjitena /
praṇidhānasiddhiḥ saphalā mayāstu spṛśeya bodhiṃ virajāmanuttarām

yo vandate toṣyati daśabalān sadā ca prasannaśuddhāmalamānasena /
imāya pariṇāmanadeśanāya ṣaṣṭiṃ ca kalpān jahate apāyān

etebhi ślokebhi ca varṇitebhiḥ puruṣāḥ striyo brahmaṇakṣatriyā ca /
yastoṣyate muniṃ sa kṛtāñjalibhiḥ sthihitva sarvatra jātismaru śatajātiṣu

sarvāṅga sarvendriya śobhitāṅgo vicitrapūrṇebhirguṇairupetaḥ /
narendrarājaiśca supūjitaḥ sadā etādṛśo bheṣyati tatra tatra

na tairekasya buddhasya cāntike kuśalaṃ kṛtam /
na dvayorapi trayeṣu na pañcasu na daśasu

tathā buddhasahasrāṇāmāntike kuśalaṃ kṛtam /
yeṣāmidaṃ karṇapuṭe deśanaṃ praviṣyatīti