Scripture Library

Sushruta Samhita · Chapter 6.35

6.35.1

athāto mukhamaṇḍikāpratiṣedhaṃ vyākhyāsyāmaḥ//

6.35.2

yathovāca bhagavān dhanvantariḥ//

6.35.3

kapitthabilvatarkārīvāṃśīgandharvahastakāḥ/
kuberākṣī ca yojyāḥ syurbālānāṃ pariṣecane//

6.35.4

svarasairbhṛṅgavṛkṣāṇāṃ tathājaharigandhayoḥ/
tailaṃ vasāṃ ca saṃyojya pacedabhyañjane śiśoḥ//

6.35.5

madhūlikāyāṃ payasi tugākṣīryāṃ gaṇe tathā/
madhure pañcamūle ca kanīyasi ghṛtaṃ pacet//

6.35.6

vacā sarjarasaḥ kuṣṭhaṃ sarpiścoddhūpanaṃ hitam/
dhārayedapi jihvāśca cāṣacīrallisarpajāḥ//

6.35.7

varṇakaṃ cūrṇakaṃ mālyamañjanaṃ pāradaṃ tathā/
manaḥśilāṃ copaharedgoṣṭhamadhye baliṃ tathā//

6.35.8

pāyasaṃ sapuroḍāśaṃ balyarthamupasaṃharet/
mantrapūtābhiradbhiśca tatraiva snapanaṃ hitam//

6.35.9

alaṅkṛtā rūpavatī subhagā kāmarūpiṇī/
goṣṭhamadhyālayaratā pātu tvāṃ mukhamaṇḍikā//

Original text: Suśrutasaṃhitā · Edition: ed. Yādavaśarman Trivikrama Ācārya (Nirnaya Sagar Press); e-text by SARIT · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0