સુશ્રુતસંહિતા · અધ્યાય 6.35

અથાતો મુખમણ્ડિકાપ્રતિષેધં વ્યાખ્યાસ્યામઃ॥

યથોવાચ ભગવાન્ ધન્વન્તરિઃ॥

કપિત્થબિલ્વતર્કારીવાંશીગન્ધર્વહસ્તકાઃ।
કુબેરાક્ષી ચ યોજ્યાઃ સ્યુર્બાલાનાં પરિષેચને॥

સ્વરસૈર્ભૃઙ્ગવૃક્ષાણાં તથાજહરિગન્ધયોઃ।
તૈલં વસાં ચ સંયોજ્ય પચેદભ્યઞ્જને શિશોઃ॥

મધૂલિકાયાં પયસિ તુગાક્ષીર્યાં ગણે તથા।
મધુરે પઞ્ચમૂલે ચ કનીયસિ ઘૃતં પચેત્॥

વચા સર્જરસઃ કુષ્ઠં સર્પિશ્ચોદ્ધૂપનં હિતમ્।
ધારયેદપિ જિહ્વાશ્ચ ચાષચીરલ્લિસર્પજાઃ॥

વર્ણકં ચૂર્ણકં માલ્યમઞ્જનં પારદં તથા।
મનઃશિલાં ચોપહરેદ્ગોષ્ઠમધ્યે બલિં તથા॥

પાયસં સપુરોડાશં બલ્યર્થમુપસંહરેત્।
મન્ત્રપૂતાભિરદ્ભિશ્ચ તત્રૈવ સ્નપનં હિતમ્॥

અલઙ્કૃતા રૂપવતી સુભગા કામરૂપિણી।
ગોષ્ઠમધ્યાલયરતા પાતુ ત્વાં મુખમણ્ડિકા॥