Scripture Library

Sushruta Samhita · Chapter 6.34

6.34.1

athātaḥ śītapūtanāpratiṣedhaṃ vyākhyāsyāmaḥ//

6.34.2

yathovāca bhagavān dhanvantariḥ//

6.34.3

kapitthaṃ suvahāṃ bimbīṃ tathā bilvaṃ pracībalam/
nandīṃ bhallātakaṃ cāpi pariṣeke prayojayet//

6.34.4

bastamūtraṃ gavāṃ mūtraṃ mustaṃ ca suradāru ca/
kuṣṭhaṃ ca sarvagandhāṃśca tailārthamavacārayet//

6.34.5

rohiṇīsarjakhadirapalāśakakubhatvacaḥ/
niṣkvāthya tasminniṣkvāthe sakṣīraṃ vipacedghṛtam//

6.34.6

gṛdhrolūkapurīṣāṇi bastagandhāmahestvacaḥ/
nimbapatrāṇi madhukaṃ dhūpanārthaṃ prayojayet//

6.34.7

dhārayedapi lambāṃ ca guñjāṃ kākādanīṃ tathā/
nadyāṃ mudgakṛtaiścānnaistarpayecchītapūtanām//

6.34.8

devyai deyaścopahāro vāruṇī rudhiraṃ tathā/
jalāśayānte bālasya snapanaṃ copadiśyate//

6.34.9

mudgaudanāśanā devī surāśoṇitapāyinī/
jalāśayālayā devī pātu tvāṃ śītapūtanā//

Original text: Suśrutasaṃhitā · Edition: ed. Yādavaśarman Trivikrama Ācārya (Nirnaya Sagar Press); e-text by SARIT · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0