સુશ્રુતસંહિતા · અધ્યાય 6.34

અથાતઃ શીતપૂતનાપ્રતિષેધં વ્યાખ્યાસ્યામઃ॥

યથોવાચ ભગવાન્ ધન્વન્તરિઃ॥

કપિત્થં સુવહાં બિમ્બીં તથા બિલ્વં પ્રચીબલમ્।
નન્દીં ભલ્લાતકં ચાપિ પરિષેકે પ્રયોજયેત્॥

બસ્તમૂત્રં ગવાં મૂત્રં મુસ્તં ચ સુરદારુ ચ।
કુષ્ઠં ચ સર્વગન્ધાંશ્ચ તૈલાર્થમવચારયેત્॥

રોહિણીસર્જખદિરપલાશકકુભત્વચઃ।
નિષ્ક્વાથ્ય તસ્મિન્નિષ્ક્વાથે સક્ષીરં વિપચેદ્ઘૃતમ્॥

ગૃધ્રોલૂકપુરીષાણિ બસ્તગન્ધામહેસ્ત્વચઃ।
નિમ્બપત્રાણિ મધુકં ધૂપનાર્થં પ્રયોજયેત્॥

ધારયેદપિ લમ્બાં ચ ગુઞ્જાં કાકાદનીં તથા।
નદ્યાં મુદ્ગકૃતૈશ્ચાન્નૈસ્તર્પયેચ્છીતપૂતનામ્॥

દેવ્યૈ દેયશ્ચોપહારો વારુણી રુધિરં તથા।
જલાશયાન્તે બાલસ્ય સ્નપનં ચોપદિશ્યતે॥

મુદ્ગૌદનાશના દેવી સુરાશોણિતપાયિની।
જલાશયાલયા દેવી પાતુ ત્વાં શીતપૂતના॥