Scripture Library

Sushruta Samhita · Chapter 6.2

6.2.1

athātaḥ sandhigatarogavijñānīyamadhyāyaṃ vyākhyāsyāmaḥ//

6.2.2

yathovāca bhagavān dhanvantariḥ//

6.2.3

pūyālasaḥ sopanāhaḥ srāvāḥ parvaṇikālajī/
krimigranthiśca vijñeyā rogāḥ sandhigatā nava//

6.2.4

pakvaḥ śophaḥ sandhijaḥ saṃsravedyaḥ sāndraṃ pūyaṃ pūti pūyālasaḥ saḥ/
granthirnālpo dṛṣṭisandhāvapākaḥ kaṇḍūprāyo nīrujastūpanāhaḥ//

6.2.5

gatvā sandhīnaśrumārgeṇa doṣāḥ kuryuḥ srāvān rugvihīnān kanīnāt/
tān vai srāvān netranāḍīmathaike tasyā liṅgaṃ kīrtayiṣye caturdhā//

6.2.6

pākaḥ sandhau saṃsravedyaśca pūyaṃ pūyāsrāvo naikarūpaḥ pradiṣṭaḥ/
śvetaṃ sāndraṃ picchilaṃ saṃsravedyaḥ śleṣmāsrāvo nīrujaḥ sa pradiṣṭaḥ//

6.2.7

raktāsrāvaḥ śoṇitotthaḥ saraktamuṣṇaṃ nālpaṃ saṃsravennātisāndram/
pītābhāsaṃ nīlamuṣṇaṃ jalābhaṃ pittāsrāvaḥ saṃsravet sandhimadhyāt//

6.2.8

tāmrā tanvī dāhaśūlopapannā raktājjñeyā parvaṇī vṛttaśophā/
jātā sandhau kṛṣṇaśukle'lajī syāttasminneva khyāpitā pūrvaliṅgaiḥ//

6.2.9

krimigranthirvartmanaḥ pakṣmaṇaśca kaṇḍūṃ kuryuḥ krimayaḥ sandhijātāḥ/
nānārūpā vartmaśuklasya sandhau caranto'ntarnayanaṃ dūṣayanti//

Original text: Suśrutasaṃhitā · Edition: ed. Yādavaśarman Trivikrama Ācārya (Nirnaya Sagar Press); e-text by SARIT · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0