Surya Siddhanta · Chapter 14

brāhmaṃ divyaṃ tathā pitryaṃ prājāpatyaṃ guros tathā/
sauraṃ ca sāvanaṃ cāndram ārkṣaṃ mānāni vai nava//

caturbhir vyavahāro +atra sauracāndrārkṣasāvanaiH/
bārhaspatyena ṣaṣṭyabdaṃ jñeyaṃ nānyais tu nityaśaH//

saureṇa dyuniśor mānaṃ ṣaḍaśītimukhāni ca/
ayanaṃ viṣuvaccaiva saṃkrānteH puṇyakālatā//

tulādi ṣaḍaśītyahnāṃ ṣaḍaśītimukhaṃ kramāt/
taccatuṣṭayam eva syād dvisvabhāveṣu rāśiṣu//

ṣaḍviṃśe dhanuṣo bhāge dvāviṃśe nimiṣasya ca/
mithunāṣṭādaśe bhāge kanyāyās tu caturdaśa//

tataH śeṣāṇi kanyāyā yāny ahāni tu ṣoḍaśa/
kratubhis tāni tulyāni pitṝṇāṃ dattam akṣayam//

bhacakranābhau viṣuvaddvitayaṃ samasūtragam/
ayanadvitayaṃ caiva catasraH prathitās tu tāH//

tadantareṣu saṃkrāntidvitayaṃ dvitayaṃ punaH/
nairantaryāt tu saṃkrānter jñeyaṃ viṣṇupadīdvayam//

bhānor makarasaṅkrānteH ṣaṇmāsā uttarāyaṇam/
karkyādes tu tathaiva syāt ṣaṇmāsā dakṣiṇāyanam//

dvirāśinātha ṛtavas tato +api śiśirādayaH/
meṣādayo dvādaśaite māsās tair eva vatsaraH//

arkamānakalāH ṣaṣṭyā guṇitā bhuktibhājitāH/
tadardhanāḍyaH saṅkrānter arvāk puṇyaṃ tathā pare//

arkād viniHsṛtaH prācīṃ yad yāty aharahaH śaśī/
tac cāndramānam aṃśais tu jñeyā dvādaśabhis tithiH//

tithiH karaṇam udvāhaH kṣauraṃ sarvakriyās tathā/
vratopavāsayātrāṇāṃ kriyā cāndreṇa gṛhyate//

triṃśatā tithibhir māsaś cāndraH pitryam ahaH smṛtam/
niśā ca māsapakṣāntau tayor madhye vibhāgataH//

bhacakrabhramaṇaṃ nityaṃ nākṣatraṃ dinam ucyate/
nakṣatranāmnā māsās tu jñeyāH parvāntayogataH//

kārtikyādiṣu saṃyoge kṛttikādi dvayaṃ dvayam/
antyopāntyau pañcamaś ca tridhā māsatrayaṃ smṛtam//

vaiśākhādiṣu kṛṣṇe ca yogaH pañcadaśe tithau/
kārttikādīni varṣāṇi guror astodayāt tathā//

udayād udayaṃ bhānoH sāvanaṃ tat prakīrtitam/
sāvanāni syur *etena yajñakālavidhis tu taiH//(ḍ etana)

sūtakādiparicchedo dinamāsābdapās tathā/
madhyamā grahabhuktis tu sāvanenaiva gṛhyate//

surāsurāṇām anyonyam ahorātraṃ viparyayāt/
yatproktaṃ tad bhaved divyaṃ bhānor bhagaṇapūraṇāt//

manvantaravyavasthā ca prājāpatyam udāhṛtam/
na tatra dyuniśor bhedo brāhmaṃ kalpaH prakīrtitam//

etat te paramākhyātaṃ rahasyaṃ paramādbhutam/
brahmaitat paramaṃ puṇyaṃ sarvapāpapraṇāśanam//

divyaṃ cārkṣaṃ grahāṇāṃ ca darśitaṃ jñānam uttamam/
vijñāyārkādilokeṣu sthānaṃ prāpnoti śāsvatam//

ity uktvā mayam āmantrya samyak tenābhipūjitaH/
divam ācakrame +arkāṃśaH praviveśa svamaṇḍalam//

mayo +atha divyaṃ tajñānaṃ jñātvā sākṣād vivasvataH/
kṛtakṛtyam ivātmānaṃ mene nirdhūtakalmaṣam//

jñātvā tam ṛṣayaś cātha sūryalabdhavaraṃ mayam/
paribabrur upetyātho jñānaṃ papracchur ādarāt//

sa tebhyaH pradadau prīto grahāṇāṃ caritaṃ mahat/
atyadbhutatamaṃ loke rahasyaṃ brahmasammitam//