Surya Siddhanta · Chapter 10

udayāstavidhiH prāgvat kartavyaH śītagor api/
bhāgair dvādaśabhiH paścād dṛśyaH prāg yāty adṛśyatām//

ravīndvoH ṣaḍbhayutayoH prāgval lagnāntarāsavaH/
ekarāśau ravīndvoś ca kāryā vivaraliptikāH//

tannāḍikāhate bhuktī ravīndvoH ṣaṣṭibhājite/
tatphalānvitayor bhūyaH kartavyā vivarāsavaH//

evaṃ yāvat sthirībhūtā ravīndvor antarāsavaH/
taiH prāṇair astametīnduH śukle +arkāstamayāt param//

bhagaṇārdhaṃ raver dattvā kāryās tadvivarāsavaH/
taiH prāṇaiH kṛṣṇapakṣe tu śītāṃśur udayaṃ vrajet//

arkendvoH krāntiviśleṣo dikṣāmye yutir anyathā/
tajjyendur arkād yatrāsau vijñeyā dakṣiṇottarā//

madhyāhnenduprabhākarṇasaṅguṇā yadi sottarā/
tadārkaghnākṣajīvāyāṃ śodhyā yojyā ca dakṣiṇā//

śeṣaṃ lambajyayā bhaktaṃ labdho bāhuH svadiṅmukhaH/
koṭiH śaṅkus tayor vargayuter mūlaṃ śrutir bhavet//

sūryonaśītagor liptāH śuklaṃ navaśatoddhṛtāH/
candrabimbāṅgulābhyastaṃ hṛtaṃ dvādaśabhiH sphuṭam//

dattvārkasaṃjñitaṃ binduṃ tato bāhuṃ svadiṅmukham/
tataH paścān mukhī koṭiṃ karṇaṃ koṭyagramadhyagam//

koṭikarṇayutād bindor bimbaṃ tātkālikaṃ likhet/
karṇasūtreṇa dikṣiddhiṃ prathamaṃ parikalpayet//

śuklaṃ karṇena tadbimbayogād antarmukhaṃ nayet/
śuklāgrayāmyottarayor madhye matsyau prasādhayet//

tanmadkhyasūtrasaṃyogād bindutrispṛg likhed dhanuH//
prāgbimbaṃ yādṛg eva syāt tādṛk tatra dine śaśī//

koṭyā dik sādhanāt tiryakṣūtrānte śṛṅgam unnatam/
darśayed unnatāṃ koṭiṃ kṛtvā candrasya sākṛtiH//

kṛṣṇe ṣaḍbhayutaṃ sūryaṃ viśodhyendos tathāsitam/
dadyād vāmaṃ bhujaṃ tatra paścimaṃ maṇḍalaṃ vidhoH//
[pāta]