Sumāgadhāvadāna · Verses 261-270

kiṃ manyadhve, bhikṣavaḥ yāsau kāñcanamālā iyam eva sā sumāgadheti.

bhikṣavaḥ saṃśayajātāḥ sarvasaṃśayacchettāraṃ buddhaṃ bhagavantaṃ papracchuḥ: kiṃ bhadanta, kāñcanamālayā karma kṛtaṃ yenāḍhye kule pratyajātā yena kāñcanamālayā śirasi baddhayā jātā iti.

bhagavān āha: kāñcanamālayaiva, bhikṣavaḥ, pūrvam anyāsu jātiṣu karmāṇi kṛtāni upacitāni labdhasaṃbhārāṇi pariṇatapratyayāny oghavat pratyupasthitāny avaśyaṃbhāvīni. kāñcanamālayaiva, bhikṣavaḥ, karmāṇi kṛtāni upacitāni. ko 'nyaḥ pratyanubhaviṣyati. na, bhikṣavaḥ, karmāṇi kṛtāny upacitāni bāhyapṛthivīdhātau vipacyante, nābdhātau, na tejodhātau, na vāyudhātāv, api tūpātteṣu eva skandhadhātvāyataneṣu karmāṇi kṛtāni vipacyante śubhāny aśubhāni ca.

na pranaśyanti karmāṇi kalpakoṭiśatair api /
sāmagrīṃ prāpya kālaṃ ca phalanti khalu dehinām //

bhūtapūrvam, bhikṣavo, 'tīte 'dhvani bārāṇasyāṃ mahānagaryām anyatamā daridrā strī, tayā pratyekabuddhasya caitye nānāvicitrāṃ palālamālāṃ granthayitvā samāropya prasannacittayā praṇidhānaṃ kṛtam.

anenāhaṃ kuśalamūlena cittotpādena deyadharmaparityāgena ca yatrayatropapadye 'haṃ tatratatra kāñcanamālayā śirasi baddhayā jāyeyam iti. kiṃ manyadhve, bhikṣavaḥ. yāsau daridrā strī, iyam asau kāñcanamālā. yad anayā prasannacittayā praṇidhānaṃ kṛtaṃ, tena pañcajanmaśatāni kāñcanamālayā śirasi baddhayā jātā.

paṇadvayaṃ ca tayā paṭāntāvabaddhaṃ vimucyāryasaṃghāya dattaṃ; tenāḍhyesu kulesu jātā praṇidhānavaśāc ceti.

atha bhagavān sumāgadhāpramukhaṃ puṇḍravardhananivāsinaṃ mahājanakāyam abhiprasādya prakrāntaḥ, tathaiva rddhyā sārdhaṃ bhikṣusaṃghena śrāvastīm āgataḥ.

iti hi, bhikṣava, ekāntakṛṣṇānāṃ karmaṇām ekāntakṛṣṇo vipākaḥ, ekāntaśuklānām ekāntaśuklo, vyatimiśrāṇāṃ vyatimiśraḥ. tasmāt tarhi, bhikṣava, ekāntakṛṣṇāni karmāṇy apāsya vyatimiśrāṇi ca, ekāntaśukleṣv eva karmasv ābhogaḥ karaṇīya iti. tasmāt tarhi, bhikṣava, evaṃ śikṣitavyam, yac chāstāraṃ satkariṣyāmo gurukariṣyāmo mānayiṣyāmaḥ pūjayiṣyāma ity evaṃ vo, bhikṣavaḥ, śikṣitavyam.

idam avocad bhagavān āttamanās, te ca bhikṣavo bhagavato bhāṣitam abhyanandann iti. sumāgadhāvadānaṃ samāptam.