સુમાગધાવદાન · શ્લોક 261-270

કિં મન્યધ્વે, ભિક્ષવઃ યાસૌ કાઞ્ચનમાલા ઇયમ્ એવ સા સુમાગધેતિ.

ભિક્ષવઃ સંશયજાતાઃ સર્વસંશયચ્છેત્તારં બુદ્ધં ભગવન્તં પપ્રચ્છુઃ: કિં ભદન્ત, કાઞ્ચનમાલયા કર્મ કૃતં યેનાઢ્યે કુલે પ્રત્યજાતા યેન કાઞ્ચનમાલયા શિરસિ બદ્ધયા જાતા ઇતિ.

ભગવાન્ આહ: કાઞ્ચનમાલયૈવ, ભિક્ષવઃ, પૂર્વમ્ અન્યાસુ જાતિષુ કર્માણિ કૃતાનિ ઉપચિતાનિ લબ્ધસંભારાણિ પરિણતપ્રત્યયાન્ય્ ઓઘવત્ પ્રત્યુપસ્થિતાન્ય્ અવશ્યંભાવીનિ. કાઞ્ચનમાલયૈવ, ભિક્ષવઃ, કર્માણિ કૃતાનિ ઉપચિતાનિ. કો ઽન્યઃ પ્રત્યનુભવિષ્યતિ. ન, ભિક્ષવઃ, કર્માણિ કૃતાન્ય્ ઉપચિતાનિ બાહ્યપૃથિવીધાતૌ વિપચ્યન્તે, નાબ્ધાતૌ, ન તેજોધાતૌ, ન વાયુધાતાવ્, અપિ તૂપાત્તેષુ એવ સ્કન્ધધાત્વાયતનેષુ કર્માણિ કૃતાનિ વિપચ્યન્તે શુભાન્ય્ અશુભાનિ ચ.

ન પ્રનશ્યન્તિ કર્માણિ કલ્પકોટિશતૈર્ અપિ ।
સામગ્રીં પ્રાપ્ય કાલં ચ ફલન્તિ ખલુ દેહિનામ્ ॥

ભૂતપૂર્વમ્, ભિક્ષવો, ઽતીતે ઽધ્વનિ બારાણસ્યાં મહાનગર્યામ્ અન્યતમા દરિદ્રા સ્ત્રી, તયા પ્રત્યેકબુદ્ધસ્ય ચૈત્યે નાનાવિચિત્રાં પલાલમાલાં ગ્રન્થયિત્વા સમારોપ્ય પ્રસન્નચિત્તયા પ્રણિધાનં કૃતમ્.

અનેનાહં કુશલમૂલેન ચિત્તોત્પાદેન દેયધર્મપરિત્યાગેન ચ યત્રયત્રોપપદ્યે ઽહં તત્રતત્ર કાઞ્ચનમાલયા શિરસિ બદ્ધયા જાયેયમ્ ઇતિ. કિં મન્યધ્વે, ભિક્ષવઃ. યાસૌ દરિદ્રા સ્ત્રી, ઇયમ્ અસૌ કાઞ્ચનમાલા. યદ્ અનયા પ્રસન્નચિત્તયા પ્રણિધાનં કૃતં, તેન પઞ્ચજન્મશતાનિ કાઞ્ચનમાલયા શિરસિ બદ્ધયા જાતા.

પણદ્વયં ચ તયા પટાન્તાવબદ્ધં વિમુચ્યાર્યસંઘાય દત્તં; તેનાઢ્યેસુ કુલેસુ જાતા પ્રણિધાનવશાચ્ ચેતિ.

અથ ભગવાન્ સુમાગધાપ્રમુખં પુણ્ડ્રવર્ધનનિવાસિનં મહાજનકાયમ્ અભિપ્રસાદ્ય પ્રક્રાન્તઃ, તથૈવ ર્દ્ધ્યા સાર્ધં ભિક્ષુસંઘેન શ્રાવસ્તીમ્ આગતઃ.

ઇતિ હિ, ભિક્ષવ, એકાન્તકૃષ્ણાનાં કર્મણામ્ એકાન્તકૃષ્ણો વિપાકઃ, એકાન્તશુક્લાનામ્ એકાન્તશુક્લો, વ્યતિમિશ્રાણાં વ્યતિમિશ્રઃ. તસ્માત્ તર્હિ, ભિક્ષવ, એકાન્તકૃષ્ણાનિ કર્માણ્ય્ અપાસ્ય વ્યતિમિશ્રાણિ ચ, એકાન્તશુક્લેષ્વ્ એવ કર્મસ્વ્ આભોગઃ કરણીય ઇતિ. તસ્માત્ તર્હિ, ભિક્ષવ, એવં શિક્ષિતવ્યમ્, યચ્ છાસ્તારં સત્કરિષ્યામો ગુરુકરિષ્યામો માનયિષ્યામઃ પૂજયિષ્યામ ઇત્ય્ એવં વો, ભિક્ષવઃ, શિક્ષિતવ્યમ્.

ઇદમ્ અવોચદ્ ભગવાન્ આત્તમનાસ્, તે ચ ભિક્ષવો ભગવતો ભાષિતમ્ અભ્યનન્દન્ન્ ઇતિ. સુમાગધાવદાનં સમાપ્તમ્.