Subhāṣitaratnakośa · Chapter 43

anaṅga palitaṃ mūrdhni paśyaitad vijaya-dhvajam
idānīṃ jitam asmābhis tavākiṃcit-karāḥ śarāḥ //

anucitam idam akramaś ca puṃsāṃ yad iha jarāsv api mānmathā vikārāḥ
yad api ca na kṛtaṃ nitambinīnāṃ stana-patanāvadhi jīvitaṃ rataṃ vā //

prāyaścittaṃ na gṛhṇītaḥ kāntāyāḥ patitau stanau
ata eva tayoḥ sparśe loko 'yaṃ śithilādaraḥ //

dhig vṛddhatāṃ viṣalatām iva dhik tathāpi vāma-bhruvām upari sa-spṛhatām atanvīm
ko 'trāparādhyati vidhiś ca śaṭhaḥ kuṭhāra yogyaḥ kaṭhora-hṛdayaḥ kusumāyudhaś ca //

svasti sukhebhyaḥ saṃprati salilāñjalir eṣa manmatha-kathāyāḥ /
tā api mām ativayasaṃ tarala-dṛśaḥ saralam īkṣante //

kṣaṇāt prabodham āyāti laṅghyate tamasā punaḥ
nirvāsyataḥ pradīpasya śikheva jaratāṃ matiḥ //

paliteṣv api dṛṣṭeṣu puṃsaḥ kā nāma kāmitā
bhaiṣajyam iva manyante yad anyamanasaḥ striyaḥ //

eka-garbhoṣitāḥ snigdhā mūrdhnā sat-kṛtya dhāritāḥ
keśā api virajyante jarayā kim utāṅganāḥ //

gātrair girā ca vikalaś caṭum īśvarāṇāṃ kurvann ayaṃ prahasanasya naṭaḥ kṛto 'smi
no vedmi māṃ palita-varṇaka-bhājam etaṃ nāṭyena kena naṭayiṣyati dīrgham āyuḥ //

aviviktāv atistabdhau stanav āḍhyāv ivādṛtau
viviktav ānatav eva daridrāv iva garhitau //