Skanda Purana · Chapter 7.99

// īśvara uvāca // //
tato gacchenmahādevi yatra cakradharaḥ sthitaḥ //
daṃḍapāṇiśca deveśi yatraikasthānasaṃsthitaḥ

caṃdreśātpūrvadigbhāge / someśāduttaresthitaḥ) //
dhanuṣāṃ paṃcasaṃsthāne gaṃdharveśātsamīpataḥ

umāyā nairṛte bhāge brahmadevarṣisaṃsthitaḥ //
tasyotpattiṃ pravakṣyāmi sarvapātakanāśinīm

pauṃḍrako vāsudevastu vārāṇasyāṃ purā'bhavat//
tena śrutaṃ purāṇaṃ tu paṭhyamānaṃ dvijātibhiḥ

kalpādau dvāparāṃte tu kṣatriyāṇāṃ niveśane //
avatāraṃ mahābāhuvāsudevaḥ kariṣyati

sa tu mūḍhamatirmene ahaṃ viṣṇuriti priye //
cihnāni dhārayāmāsa cakrādīni varānane

sa dūtaṃ preṣayāmāsa dvārakāyāṃ mahodaram //
sa gatvā prāha viṣṇuṃ vai cakrādīni parityaja

ityāha pauṃḍrako rājā nacedvadhamavā psyasi //
tataśca bhagavānviṣṇuḥ prāhāsya ruciraṃ vacaḥ

vācyaḥ sa pauṃḍrako rājā tvayā haṃta vaco mama //
gṛhītacakra evāhaṃ kāśīmāgamya te purīm

saṃtyakṣyāmi tataścakraṃ gadāṃ cemāmasaṃśayam //
tadgrāhyaṃ bhavatā cakramanyadvā yattavepsitam

ityukte'tha gate dūte saṃsmṛtyā'bhyā gataṃ hariḥ //
garutmantaṃ samāruhya tvaritastatpuraṃ yayau

mitrasnehāttatastasya kāśirājaḥ sahānugaḥ //
sarvasainyaparīvārastataḥ pauṃḍramupāyayau

tato balena mahatā kāśirājabalena ca //
pauṃḍrako vāsudevo'sau keśavābhimukho yayau

taṃ dadarśa harirdūrāddurvāre syaṃdane sthitam //
cakrahastaṃ gadāśārṅgasaṃyutaṃ garuḍadhvajam

taṃ dṛṣṭvā bhāvagaṃbhīraṃ jahāsa garuḍadhvajaḥ //
uvāca pauṃḍrakaṃ mūḍhamātmacihnopalakṣitam

pauṃḍrakoktaṃ tvayā yattu dūtavaktreṇa māṃ prati //
samutsṛjeti cihnāni tacca sarvaṃ tyajāmyaham

cakrametatsamutsṛṣṭaṃ gadeyaṃ ca visa rjitā //
garutmāneṣa te gatvā samārohatu vai dhvajam

ityuccārya vimuktena cakreṇāsau nipātitaḥ //
rathaśca gadayā bhagno gajāścā śvāśca cūrṇitāḥ

tato hāhākṛte loke kāśinātho mahābalī //
yuyudhe vāsudevena mitraduḥkhena duḥkhitaḥ

tataḥ śārṅgavinirmuktaiśchittvā tasya śaraiḥ śiraḥ //
kāśīpuryāṃ sa cikṣepa kurvam̐llokasya vismayam

hatvā tu pauṃḍrakaṃ śauriḥ kāśirājaṃ ca sānu gam //
punardvāravatīṃ prāpto mṛgayāyā gato yathā

tataḥ kāśipateḥ putraḥ piturduḥkhena duḥkhitaḥ //
śaṃkaraṃ toṣayāmāsa sa ca tasmai varaṃ dadau

sa vavre bhagavankṛtyā piturhaṃturvadhāya me //
samuttiṣṭhatu kṛṣṇasya tvatprasādātsureśvara

evaṃ bhaviṣyatītyukte dakṣiṇāgnestu madhyataḥ //
mahākṛtyā samuttasthau prasthitā dvārakāṃ prati

jvālāmālākarālāṃ tāṃ yādavā bhayavihvalāḥ //
dṛṣṭvā janārddanaṃ sarve śaraṇārthamupāgatāḥ

tataḥ sudarśanaṃ tasyā mumoca garuḍadhvajaḥ //
vadhāya sā tato bhagnā cakratejo'bhipīḍitā

kṛtyāmanujagāmāśu viṣṇoścakraṃ sudarśanam //
kṛtyā vārāṇasīṃ prāptā tasyāścakraṃ tu pṛṣṭhataḥ

tataḥ sā bhayasaṃtrastā śaṃkaraṃ śaraṇaṃ gatā //
somanāthaṃ jagannāthaṃ nānyaḥ śakto hi rakṣitum

tataścakraṃ varairbāṇaistāḍayāmāsa śaṃkaraḥ //
tacca dvāravatīṃ prāptaṃ śivasāyakamiśritam

taddṛṣṭvā śivanāmāṃkaistāḍitaṃ bhagavānhariḥ //
cakraṃ śaraistataḥ kuddho gṛhītvā ca kareṇa tat //
jagāma tatra yatrāste someśaḥ kālabhairavaḥ // 7.1.99.३०
sa gatvā roṣa tāmrākṣaścakrodyatakaraḥ sthitaḥ //
kṛtyāṃ haṃtuṃ matiṃ cakre kālabhairavanirmitām

dṛṣṭo devaistataḥ sarvaidaṃḍapāṇigaṇena ca //
devānāṃ prekṣatāṃ tatra daṇḍapāṇirmahāgaṇaḥ //
cakrodyatakaraṃ dṛṣṭvā viṣṇuṃ prāhābjalocanam

// daṃḍapāṇiruvāca // //
mā krodhaṃ kuru deveśa kṛtyāṃ prati jagatprabho

amoghaṃ yudhi te cakraṃ kṛtyā cāpi ca śāṃkarī //
evaṃ cakra vinirmukte bhavetkodho hare yadi //
bhaviṣyati mahadduḥkhaṃ lokānāṃ saṃkṣayo hi vā

na moktavyamataścakra śṛṇu bhūyo vacaśca naḥ //
atra sthāne niyukto'haṃ śaṃkareṇa purā hare

pāpināṃ rakṣaṇārthaṃ vai vighnārthaṃ duṣṭacetasām//
tasmāttvaṃ mama sāṃnidhye tiṣṭha cakradharo hare

atra cakradharaṃ devaṃ pūjayiṣyaṃti mānavāḥ //
dhūpamālyopahāraiśca naivedyairvivi dhairapi

// viṣṇuruvāca // //
eṣa eva nivṛttohaṃ tava vākyāṃkuśena vai //
atra cakrodyatakaraḥ sthāsye tava samīpataḥ

evaṃ hi sthitodevastatra cakradharaḥ priye //
daṃḍapāṇiśca bhagavānmama rūpī gaṇeśvaraḥ

yastau pūjayate bhaktyā daṃḍapāṇiharī kramāt //
sa pāpa kaṃcukairmukto gacchecchivapuraṃ naraḥ

māghe māsi caturddaśyāṃ kṛṣṇāṣṭamyāṃ viśeṣataḥ //
gaṃdhadhūpopahārairyaḥ pūjayeddaṇḍanāyakam //
tasya kṣetre nivasato na vighnaṃ jāyate kvacit

ekādaśyāṃ jitāhāro yo'rcayeccakrapāṇinam //
sa muktaḥ pātakaiḥ sarvairyāti viṣṇoḥ salokatām

iti saṃkṣepataḥ proktaṃ māhātmyaṃ cakrapāṇinaḥ //
daṇḍapāṇigaṇasyāpi śrutaṃ pāpaughanāśanam

iti śrīskāṃde mahāpurāṇa ekāśīti sāhasryāṃ sahitāyāṃ saptame prabhāsakhaṇḍe prathame prabhāsakṣetramāhātmye madhyayātrāyāṃ daṇḍapāṇicakradharamāhātmyavarṇanaṃnāmekonaśatatamo'dhyāyaḥ