Skanda Purana · Chapter 7.100

// īśvara uvāca // //
tato gacchenmahādevi tayoruttarasaṃsthitam //
tathā vāyavyadigbhāge brahmaṇo bālarūpiṇaḥ

sāṃbādityaṃ suraśreṣṭhe yaḥ sāṃbena pratiṣṭhitaḥ //
sthānāni trīṇi devasya dvīpe'sminbhāskarasya tu

pūrvaṃ mitravanaṃ nāma tathā muṇḍīramucyate //
prabhāsakṣetramāsthāya sāṃbādityastṛtīyakaḥ

tasminkṣetre mahādevi puraṃ yatsāṃbasaṃjñakam //
dvitīyaṃ śāśvataṃ sthānaṃ tatra sūryasya nityaśaḥ

prītyā sāṃba sya tatrārko janasyānugrahāya ca //
tatra dvādaśabhāgena mitro maitreṇa cakṣuṣā

avalokayañjagatsarvaṃ śreyorthaṃ tiṣṭhate sadā //
prayuktāṃ vidhivatpūjāṃ gṛhṇāti bhagavānsvayam

// devyuvāca // //
ko'yaṃ sāṃbaḥ sutaḥ kasya yasya nāmnā raveḥ puram //
yasya vā'yaṃ sahasrāṃśurvaradaḥ puṇyakarmaṇaḥ

// // īśvara uvāca // //
ya ete dvādaśādityā virājante mahābalāḥ //
teṣāṃ yo viṣṇusaṃjñastu sarvalokeṣu viśrutaḥ

ihāsau vāsudevatvamavāpa bhagavānvibhuḥ

tasya sāṃbaḥ suto jajñe jāṃbavatyāṃ mahābalaḥ //
sa tu pitrā bhṛśaṃ śaptaḥ kuṣṭharogamavāptavān //
tena saṃsthāpitaḥ sūryo nijanāmnā puraṃ kṛtam

// devyuvāca // //
śaptaḥ kasminnimitte'sau pitrā putraḥ svayaṃ punaḥ //
nālpaṃ syātkāraṇaṃ deva yenāsau śaptavānsutam

// īśvara uvāca // //
śṛṇuṣvāvahitā bhūtvā tasya yacchāpakāraṇam //
durvāsānāma bhagavānmamaivāṃśasamudbhavaḥ

aṭamānaḥ sa bhagavāṃstrīṃllokānpracacāra ha //
atha prāpto dvāravatīṃ lokāḥ saṃjajñire puraḥ

tamāgatamṛṣiṃ dṛṣṭvā sāṃbo rūpeṇa garvitaḥ //
piṃgākṣaṃ jaṭilaṃ rūkṣaṃ visvarūpaṃ kṛśaṃ tathā

avamānaṃ cakārāsau darśanātsparśanāttathā //
dṛṣṭvā tasya mukhaṃ maṃdo vaktraṃ cakre tathātmanaḥ //
cakre yadukulaśreṣṭho garvito yauvanena tu

atha kruddho mahātejā durvāsā ṛṣisattamaḥ //
sāṃbaṃ provāca bhagavānvidhunvanmukhamātma naḥ

yasmādvirūpaṃ māṃ dṛṣṭvā ātmarūpeṇa garvitaḥ //
gamane darśane mahyamahaṃkāraḥ kṛto yataḥ //
tasmāttvaṃ kuṣṭharogeṇa na cireṇa grasiṣyase

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye madhyayātrāyāṃ sāṃbādityamāhātmyopakrame sāṃbāya durvāsasā śāpapradānavarṇanaṃnāma śatatamo'dhyāyaḥ