Skanda Purana · Chapter 7.98

// īśvara uvāca // //
tato gacchenmahādevi caṃḍeśvaramiti śrutam//
someśādvāyave bhāge dhanuṣāṃ ṣaṣṭibhiḥ sthitam

divyaṃ liṃgaṃ mahādevi sarvapātakanāśanam //
tatpūrve tu yuge khyātaṃ manoḥ svāyaṃbhuvāṃtare

tretāyugamukhe devi pṛthivyā saṃpratiṣṭhitam//
pūrvamanvaṃtare cāsmim̐lliṅgaṃ pṛthvīśvaraṃ priye

punaścaṃdreṇa tatprāptaṃ liṃgaṃ caṃdreśvaraṃ priye //
brahmahatyādipāpānāṃ nāśanaṃ puṇyavarddhanam

taṃ dṛṣṭvā mānavo devi saptajanmasamudbhavaiḥ //
mucyate kalmaṣaiḥ sarvaiḥ kṛtakṛtyastu jāyate

// devyuvāca // //
kathaṃ pṛthvīśvaraṃ khyātaṃ talliṃgaṃ pāpa nāśanam //
kathaṃ punaḥ samākhyātaṃ candreśvaramiti prabho //
etadvistarato brūhi śrotukāmāhamādarāt

// īśvara uvāca // //
śṛṇu devi pravakṣyāmi kathā pāpapraṇāśinīm //
yāṃ śrutvā mucyate jaṃtustrividhaiḥ karmabandhanaiḥ

āsītpūrvaṃ mahādevi daityabhārārdditā mahī // sā'dho vrajaṃtī sahasā gorūpā saṃbabhūva ha

itastato dhāvamānā na lebhe nirvṛtiṃ kvacit //
tato varṣaśate pūrṇe bhramamāṇā kvacitkvacit

āsasāda mahākṣetraṃ prabhāsamiti viśrutam //
devadānavagaṃdharvaiḥ sevitaṃ pāpanāśanam

tatra sthitvā mahākṣetre kṛtvā manasi niścayam //
liṃgaṃ pratiṣṭhayāmāsa bhaktyā paramayā yutā

varṣāṇāṃ ca śataṃ sāgraṃ kṛte tapasi duścare //
tutoṣa bhagavānrudro dharitrīṃ vākyamabravīt

devi viśvaṃbhare sarvaṃ tapaḥ sucaritaṃ tvayā //
mā śokaṃ kuru kalyāṇi bhaviṣyati tavepsitam

daityā nāśaṃ gamiṣyaṃti viṣṇunā nihatā bhuvi //
bhavitrī tvaṃ mahādevi daityabhāravivarjitā

idaṃ tvayā sthāpitaṃ yalliṃgaṃ paramaśobhanam //
dharitrīnāmnā vikhyātaṃ loke khyātiṃ gamiṣyati //

atrāhaṃ saṃsthito nityaṃ liṃgarūpī mahāprabhuḥ //
sthāsyāmi kalpekalpe vai nṛṇāṃ pāpāpahārakaḥ

mūrtyaṣṭakasamāyukto liṃge 'sminsaṃsthitaḥ sadā //
nṛṇāṃ nāśayitā pāpaṃ pūrvajanmaśatārjitam

bhādre kṛṣṇatṛtīyāyāṃ yaścaitaṃ pūjayiṣyati //
so'śvamedhasahasrasya phalamāpsyatyasaṃśayam

sarvatīrthābhiṣekasya sarveṣāṃ dānakarmaṇām //
bhaviṣyati phalaṃ tasya liṃgasyaivāsya pūjanāt

dhanuṣāṃ ṣoḍaśaṃ yāvatsamaṃtātparimaṃḍalam //
kṣetramasya samākhyātaṃ prāṇināṃ muktidāyakam

tasminmṛtāḥ prāṇino ye kāmato vāpyakāmataḥ //
kṛmi kīṭasamā vāpi te yāṃti paramāṃ gatim

yo dadyātkāñcanaṃ meruṃ kṛtsnāṃ vā'pi vasundharām //
yaḥ pūjayati pṛthvīśaṃ sa tayoradhikaḥ smṛtaḥ

īśvara uvāca // //
iti dattvā varāndevastatraivāṃtaradhīyata //
pṛthivīśvaranāmābhūttatprabhṛtyeva śaṃkaraḥ

punarasminmahākalpe vārāha iti viśrute //
kadāciddakṣaśāpena kṣīṇaścandro babhūva ha

papāta bhūtale devi yakṣmaṇā pīḍitaḥ śaśī //
kṣetraṃ prabhāsamāsādya tanmahodadhisaṃnidhau

dṛṣṭvā pṛthvīśvaraṃ liṃgaṃ saprabhāvaṃ mahāprabham //
tatpūjānirato bhūtvā varṣāṇāṃ tu sahasrakam

atapatsa tapo raudraṃ śīrṇaparṇāṃbubhakṣakaḥ //
yataḥ samabhavaddīptyā sarvāhlādakaraḥ śaśī

talliṃgasyaiva māhātmyāttataścaṃdreśvaro'bhavat //
tasya liṃgasya māhātmyāccaṃdramā gatakalmaṣaḥ

avāpa siddhimatyugrāṃ sparśaliṃgaprakāśinīm //
somanātheti yāṃ prāhuḥ prasiddhāṃ liṃgarūpiṇīm

iti saṃkṣepataḥ proktaṃ māhātmyaṃ candradaivatam //
śrutaṃ harati pāpāni tathā''rogyaṃ prayacchati

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye madhyayātrāyāṃ pṛthvīśvara( caṃdreśvara)māhātmyavarṇanaṃnāmāṣṭanavatitamodhyāyaḥ