સ્કંદ પુરાણ · અધ્યાય 7.98

॥ ઈશ્વર ઉવાચ ॥ ॥
તતો ગચ્છેન્મહાદેવિ ચંડેશ્વરમિતિ શ્રુતમ્॥
સોમેશાદ્વાયવે ભાગે ધનુષાં ષષ્ટિભિઃ સ્થિતમ્

દિવ્યં લિંગં મહાદેવિ સર્વપાતકનાશનમ્ ॥
તત્પૂર્વે તુ યુગે ખ્યાતં મનોઃ સ્વાયંભુવાંતરે

ત્રેતાયુગમુખે દેવિ પૃથિવ્યા સંપ્રતિષ્ઠિતમ્॥
પૂર્વમન્વંતરે ચાસ્મિઁલ્લિઙ્ગં પૃથ્વીશ્વરં પ્રિયે

પુનશ્ચંદ્રેણ તત્પ્રાપ્તં લિંગં ચંદ્રેશ્વરં પ્રિયે ॥
બ્રહ્મહત્યાદિપાપાનાં નાશનં પુણ્યવર્દ્ધનમ્

તં દૃષ્ટ્વા માનવો દેવિ સપ્તજન્મસમુદ્ભવૈઃ ॥
મુચ્યતે કલ્મષૈઃ સર્વૈઃ કૃતકૃત્યસ્તુ જાયતે

॥ દેવ્યુવાચ ॥ ॥
કથં પૃથ્વીશ્વરં ખ્યાતં તલ્લિંગં પાપ નાશનમ્ ॥
કથં પુનઃ સમાખ્યાતં ચન્દ્રેશ્વરમિતિ પ્રભો ॥
એતદ્વિસ્તરતો બ્રૂહિ શ્રોતુકામાહમાદરાત્

॥ ઈશ્વર ઉવાચ ॥ ॥
શૃણુ દેવિ પ્રવક્ષ્યામિ કથા પાપપ્રણાશિનીમ્ ॥
યાં શ્રુત્વા મુચ્યતે જંતુસ્ત્રિવિધૈઃ કર્મબન્ધનૈઃ

આસીત્પૂર્વં મહાદેવિ દૈત્યભારાર્દ્દિતા મહી ॥ સાઽધો વ્રજંતી સહસા ગોરૂપા સંબભૂવ હ

ઇતસ્તતો ધાવમાના ન લેભે નિર્વૃતિં ક્વચિત્ ॥
તતો વર્ષશતે પૂર્ણે ભ્રમમાણા ક્વચિત્ક્વચિત્

આસસાદ મહાક્ષેત્રં પ્રભાસમિતિ વિશ્રુતમ્ ॥
દેવદાનવગંધર્વૈઃ સેવિતં પાપનાશનમ્

તત્ર સ્થિત્વા મહાક્ષેત્રે કૃત્વા મનસિ નિશ્ચયમ્ ॥
લિંગં પ્રતિષ્ઠયામાસ ભક્ત્યા પરમયા યુતા

વર્ષાણાં ચ શતં સાગ્રં કૃતે તપસિ દુશ્ચરે ॥
તુતોષ ભગવાન્રુદ્રો ધરિત્રીં વાક્યમબ્રવીત્

દેવિ વિશ્વંભરે સર્વં તપઃ સુચરિતં ત્વયા ॥
મા શોકં કુરુ કલ્યાણિ ભવિષ્યતિ તવેપ્સિતમ્

દૈત્યા નાશં ગમિષ્યંતિ વિષ્ણુના નિહતા ભુવિ ॥
ભવિત્રી ત્વં મહાદેવિ દૈત્યભારવિવર્જિતા

ઇદં ત્વયા સ્થાપિતં યલ્લિંગં પરમશોભનમ્ ॥
ધરિત્રીનામ્ના વિખ્યાતં લોકે ખ્યાતિં ગમિષ્યતિ ॥

અત્રાહં સંસ્થિતો નિત્યં લિંગરૂપી મહાપ્રભુઃ ॥
સ્થાસ્યામિ કલ્પેકલ્પે વૈ નૃણાં પાપાપહારકઃ

મૂર્ત્યષ્ટકસમાયુક્તો લિંગે ઽસ્મિન્સંસ્થિતઃ સદા ॥
નૃણાં નાશયિતા પાપં પૂર્વજન્મશતાર્જિતમ્

ભાદ્રે કૃષ્ણતૃતીયાયાં યશ્ચૈતં પૂજયિષ્યતિ ॥
સોઽશ્વમેધસહસ્રસ્ય ફલમાપ્સ્યત્યસંશયમ્

સર્વતીર્થાભિષેકસ્ય સર્વેષાં દાનકર્મણામ્ ॥
ભવિષ્યતિ ફલં તસ્ય લિંગસ્યૈવાસ્ય પૂજનાત્

ધનુષાં ષોડશં યાવત્સમંતાત્પરિમંડલમ્ ॥
ક્ષેત્રમસ્ય સમાખ્યાતં પ્રાણિનાં મુક્તિદાયકમ્

તસ્મિન્મૃતાઃ પ્રાણિનો યે કામતો વાપ્યકામતઃ ॥
કૃમિ કીટસમા વાપિ તે યાંતિ પરમાં ગતિમ્

યો દદ્યાત્કાઞ્ચનં મેરું કૃત્સ્નાં વાઽપિ વસુન્ધરામ્ ॥
યઃ પૂજયતિ પૃથ્વીશં સ તયોરધિકઃ સ્મૃતઃ

ઈશ્વર ઉવાચ ॥ ॥
ઇતિ દત્ત્વા વરાન્દેવસ્તત્રૈવાંતરધીયત ॥
પૃથિવીશ્વરનામાભૂત્તત્પ્રભૃત્યેવ શંકરઃ

પુનરસ્મિન્મહાકલ્પે વારાહ ઇતિ વિશ્રુતે ॥
કદાચિદ્દક્ષશાપેન ક્ષીણશ્ચન્દ્રો બભૂવ હ

પપાત ભૂતલે દેવિ યક્ષ્મણા પીડિતઃ શશી ॥
ક્ષેત્રં પ્રભાસમાસાદ્ય તન્મહોદધિસંનિધૌ

દૃષ્ટ્વા પૃથ્વીશ્વરં લિંગં સપ્રભાવં મહાપ્રભમ્ ॥
તત્પૂજાનિરતો ભૂત્વા વર્ષાણાં તુ સહસ્રકમ્

અતપત્સ તપો રૌદ્રં શીર્ણપર્ણાંબુભક્ષકઃ ॥
યતઃ સમભવદ્દીપ્ત્યા સર્વાહ્લાદકરઃ શશી

તલ્લિંગસ્યૈવ માહાત્મ્યાત્તતશ્ચંદ્રેશ્વરોઽભવત્ ॥
તસ્ય લિંગસ્ય માહાત્મ્યાચ્ચંદ્રમા ગતકલ્મષઃ

અવાપ સિદ્ધિમત્યુગ્રાં સ્પર્શલિંગપ્રકાશિનીમ્ ॥
સોમનાથેતિ યાં પ્રાહુઃ પ્રસિદ્ધાં લિંગરૂપિણીમ્

ઇતિ સંક્ષેપતઃ પ્રોક્તં માહાત્મ્યં ચન્દ્રદૈવતમ્ ॥
શ્રુતં હરતિ પાપાનિ તથાઽઽરોગ્યં પ્રયચ્છતિ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે મધ્યયાત્રાયાં પૃથ્વીશ્વર( ચંદ્રેશ્વર)માહાત્મ્યવર્ણનંનામાષ્ટનવતિતમોધ્યાયઃ