Skanda Purana · Chapter 7.97

// īśvara uvāca // //
tato gacchenmahādevi yogeśvaramiti śrutam //
kāmeśādvāyave bhāge dhanuṣāṃ saptake sthitam

liṃgaṃ mahāprabhāvaṃ hi darśanātpāpanāśanam//
pūrve yuge tu saṃkhyātaṃ gaṇeśvaramiti śrutam

purā mama gaṇā devi asaṃkhyātā mahāvalāḥ //
kṣetraṃ māheśvaraṃ jñātvā prabhāsaṃ samupāgaman

tatrasthāśca tapo ghoraṃ tepuste yogamāśritāḥ //
divyābdānāṃ sahasraṃ tu tatastuṣṭo maheśvaraḥ

sālokyāṃ ca dadau muktiṃ teṣāṃ yogabalena ३ //
yasmā tṣaḍaṃgayogena teṣāṃ tuṣṭo vṛṣadhvajaḥ //
tena yogeśvaraṃ nāma liṃgaṃ yogaphalapradam

yastamarcayate bhaktyā samyakpūjāvidhānataḥ //
sa yogasiddhimāpnoti modate divi devavat

yo dadyātkāṃcanaṃ meruṃ kṛtsnāṃ caiva vasundharām //
yogeśaṃ pūjayedyastu sa tayoradhikaḥ smṛtaḥ

vṛṣabhastatra dātavyaḥ saṃpūrṇaphalahetave //
evamekādaśa proktā rudrāḥ prābhāsamāśritāḥ //
nityaṃ pūjyāśca vaṃdyāśca kṣetrasya phalamīpsubhiḥ

ya etāṃ caiva śṛṇuyādrudraikādaśasaṃhitām //
tasya kṣetraphalaṃ sarvaṃ prabhāsāṃtaravāsinaḥ

yaścaitānnaiva jānāti rudrānprābhāsamāśritān //
sa kṣetramadhyasaṃstho'pi nāstyeva sa paśuḥ smṛtaḥ

eteṣāṃ caiva rudrāṇāṃ sarvānvāpyekameva vā //
someśvaraṃ pūjayitvā japedvai śatarudriyam //
sarveṣāṃ labhate puṇyaṃ rudrāṇāṃ nātra saṃśayaḥ

idaṃ rahasyaṃ saṃkhyātaṃ māhātmyaṃ tava bhāmini //
rudrāṇāṃ pāpaśamanaṃ śrutaṃ puṇyavivarddhanam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye yogeśvaramāhātmyavarṇanaṃnāma saptanavatitamo'dhyāyaḥ //