Skanda Purana · Chapter 7.96

// īśvara uvāca // //
tatogacchenmahādevi kāmeśvaramiti smṛtam //
tasyaivottaradigbhāge dhanuṣāṃ tritaye sthitam //
ratīśvaramiti khyātaṃ tretāyāṃ tatsure śvari

yasmindṛṣṭe manuṣyāṇāṃ pūjite tu varānane //
naśyecca saptajanmāghaṃ gṛhabhaṃgaśca no bhavet

// devyuvāca // //
kenāyaṃ sthāpito deva kasmātprokto ratīśvaraḥ //
darśanenāsya kiṃ śreyaḥ sarvaṃ vistarato vada

// īśvara uvāca // //
śṛṇu devi pravakṣyāmi kathāṃ pāpapraṇāśinīm //
ratirnāmābhavatsādhvī kāmapatnī yaśasvinī

dagdhe manasije pūrvaṃ devena tripurāriṇā//
tadarthāya tapastepe tasmindeśe ratiḥ kila

aṃguṣṭhāgreṇa tiṣṭhantyā yāvadyugacatuṣṭayam //
ārādhito mahādevaḥ śāṃtena manasā priye

kasmiṃścidatha kāle tu nirbhidya dharaṇītalam //
tadagrataḥ samuttasthau ligaṃ māheśvaraṃ priye

etasminneva kāle tu vāguvācāśarīriṇī //
āhlādayaṃtī sahasā tasyāścittaṃ varānane

yasmānmāheśvaraṃ liṃgaṃ tvadbhaktyā sahasotthitam //
pūjayestanmahābhāge tataḥ kāṃtamavāpsyasi

etacchutvā tu sā sādhvī devadūtasya bhāṣitam//
talliṃgaṃ pūjayāmāsa sa bhaktyā paramayā yutā

tataḥ kāmaḥ samuttasthau suptotthita iva priye //
tataḥ prabhṛti talliṃgaṃ kāmeśvaramiti śrutam

tataḥ sā kāmadayitā vākyametaduvāca ha //
prahṛṣṭā kāmadevāptyā purataḥ puṣpadhanvanaḥ

pūjayiṣyaṃti ye cānye liṃgametatsamāhitāḥ //
evaṃ te vāṃchitāṃ siddhiṃ bhūyo yāsyaṃti sadgatim

mano'bhīṣṭaṃ tathā sarvaṃ yadyapi syātsadurllabham //
tatprāpsyaṃti na saṃdeho liṃgasyāsya prasādataḥ //

evamuktvā gatā sādhvī ratiḥ kāmena saṃyutā //
svasthāne pūrṇakāmā sā prahṛṣṭenāṃtarātmanā

enaṃ caitratrayodaśyāṃ śuklāyāṃ yaḥ samarcati //
sakāmavadbhavennṛṇāṃ śrutaṃ saubhāgyadāyakam

hṛti śrīskāṃdemahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmya ekādaśarudramāhātmye kāmeśvaramāhātmyavarṇanaṃnāma ṣaṇṇavatitamo'dhyāyaḥ