Skanda Purana · Chapter 7.95

// īśvara uvāca // //
tato gacchedvarārohe liṃgaṃ mṛtyuñjayeśvaram //
tasyaiva vahni koṇasthaṃ dhanuṣāṃ daśake sthitam

paścime sāgarādityātsthitaṃ dhanuścatuṣṭaye //
pāpaghnaṃ sarvajantūnāṃ darśanātsparśanādapi

pūrve yuge samākhyātaṃ nāma nandīśvareti ca //
yatra taptaṃ tapo ghoraṃ nandināmnā gaṇena me

pratiṣṭhāpya mahāliṃgaṃ nityaṃ pūjāpareṇa ca //
tatra japto mahāmantro mṛtyuñjaya iti śrutaḥ

koṭīnāṃ niyutaṃ devi tatastuṣṭo maheśvaraḥ //
dadau gaṇeśatāṃ tasya muktiṃ sāmīpyagāṃ tathā

mṛtyuñjayena mantreṇa tasya tuṣṭo yato haraḥ //
tena mṛtyuñjayeśeti khyātaṃ liṃgaṃ dharātale

yastaṃ pūjayate bhaktyā paśyedvā bhāvitātmavān //
nāśayettasya pāpāni saptajanmārjitānyapi

snāpayetpayasā liṃgaṃ dadhnā ghṛtayutena ca //
madhunekṣurasenaiva kuṃkumena vilepayet

karpūrośīra miśreṇa mṛganābhirasena ca //
candanena sugandhena puṣpaiḥ saṃpūjayettataḥ

dadyāddhūpaṃ puro devi tato devasya cāgurum //
vastraiḥ saṃpūjya vividhairātmavittānusārataḥ

naivedyaṃ paramānnaṃ ca dattvā dīpasamanvitam //
aṣṭāṃgaṃ praṇipātaṃ ca tataḥ kāryaṃ ca bhaktitaḥ

hemadānaṃ pradātavyaṃ brāhmaṇe vedapārage

evaṃ yātrā bhavettasya śāstroktā nātra saṃśayaḥ //
evaṃ kṛtvā naro devi labhate janmanaḥ phalam

iti saṃkṣepataḥ proktaṃ mṛtyuñjayamahodayam //
pāpaghnaṃ sarvajaṃtūnāṃ sarvakāmaphalapradam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe prathame prabhāsakṣetramāhātmya ekādaśarudramāhātmye mṛtyuñjayamāhātmyavarṇanaṃnāma pañcanavatitamo'dhyāyaḥ