Skanda Purana · Chapter 7.94

// īśvara uvāca // //
tato gacchenmahādevi bhairaveśvaramuttamam //
tasyaiva vahnikoṇasthaṃ dhanuṣāṃdaśake sthitam

sarvakāmapradaṃ devi dāridryaughavināśanam //
pūrvaṃ caṇḍeśvaraṃnāma khyātaṃ kṛtayuge priye

caṇḍonāma gaṇo devi tena cārādhitaṃ purā //
divyābdānāṃ sahasraṃ tu tena caṇḍeśvaraṃ smṛtam

taṃ dṛṣṭvā devadeveśaṃ spṛṣṭvā ca susamāhitaḥ //
mucyate sakalātpāpādājanmamaraṇāṃtikāt

tatra kṛṣṇacaturdaśyāṃ māse bhādrapade priye //
upavāsa paro bhūtvā yaḥ karoti prajāgaram //
sa yāti paramaṃ sthānaṃ yatra devo maheśvaraḥ

vācikaṃ mānasaṃ pāpaṃ karmaṇā yadupārjitam //
tatsarvaṃ nāśamāyāti tasya liṃgasya darśanāt

tilā hiraṇyaṃ vastrāṇi tatra deyaṃ manīṣiṇe //
sarvakilviṣanāśārthaṃ samyagyātrāphalepsunā

bhairavākāramāsthāya kalpānte sa haredyataḥ //
viśvaṃ samagraṃ deveśi tenāsau bhairavaḥ smṛtaḥ

asminkalpe mahādevi prabhāsakṣetramāsthitaḥ //
babhūva bhairavo rudraḥ kalpānte liṃgamūrtimān

evaṃ saṃkṣepataḥ proktaṃ māhātmyaṃ bhairaveśvaram //
yacchrutvā mucyate jantuḥ pātakādatibhairavāt

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmya ekādaśarudramāhātmye bhairaveśvaramāhātmya varṇanaṃnāma caturṇavatitamo'dhyāyaḥ