સ્કંદ પુરાણ · અધ્યાય 7.95

॥ ઈશ્વર ઉવાચ ॥ ॥
તતો ગચ્છેદ્વરારોહે લિંગં મૃત્યુઞ્જયેશ્વરમ્ ॥
તસ્યૈવ વહ્નિ કોણસ્થં ધનુષાં દશકે સ્થિતમ્

પશ્ચિમે સાગરાદિત્યાત્સ્થિતં ધનુશ્ચતુષ્ટયે ॥
પાપઘ્નં સર્વજન્તૂનાં દર્શનાત્સ્પર્શનાદપિ

પૂર્વે યુગે સમાખ્યાતં નામ નન્દીશ્વરેતિ ચ ॥
યત્ર તપ્તં તપો ઘોરં નન્દિનામ્ના ગણેન મે

પ્રતિષ્ઠાપ્ય મહાલિંગં નિત્યં પૂજાપરેણ ચ ॥
તત્ર જપ્તો મહામન્ત્રો મૃત્યુઞ્જય ઇતિ શ્રુતઃ

કોટીનાં નિયુતં દેવિ તતસ્તુષ્ટો મહેશ્વરઃ ॥
દદૌ ગણેશતાં તસ્ય મુક્તિં સામીપ્યગાં તથા

મૃત્યુઞ્જયેન મન્ત્રેણ તસ્ય તુષ્ટો યતો હરઃ ॥
તેન મૃત્યુઞ્જયેશેતિ ખ્યાતં લિંગં ધરાતલે

યસ્તં પૂજયતે ભક્ત્યા પશ્યેદ્વા ભાવિતાત્મવાન્ ॥
નાશયેત્તસ્ય પાપાનિ સપ્તજન્માર્જિતાન્યપિ

સ્નાપયેત્પયસા લિંગં દધ્ના ઘૃતયુતેન ચ ॥
મધુનેક્ષુરસેનૈવ કુંકુમેન વિલેપયેત્

કર્પૂરોશીર મિશ્રેણ મૃગનાભિરસેન ચ ॥
ચન્દનેન સુગન્ધેન પુષ્પૈઃ સંપૂજયેત્તતઃ

દદ્યાદ્ધૂપં પુરો દેવિ તતો દેવસ્ય ચાગુરુમ્ ॥
વસ્ત્રૈઃ સંપૂજ્ય વિવિધૈરાત્મવિત્તાનુસારતઃ

નૈવેદ્યં પરમાન્નં ચ દત્ત્વા દીપસમન્વિતમ્ ॥
અષ્ટાંગં પ્રણિપાતં ચ તતઃ કાર્યં ચ ભક્તિતઃ

હેમદાનં પ્રદાતવ્યં બ્રાહ્મણે વેદપારગે

એવં યાત્રા ભવેત્તસ્ય શાસ્ત્રોક્તા નાત્ર સંશયઃ ॥
એવં કૃત્વા નરો દેવિ લભતે જન્મનઃ ફલમ્

ઇતિ સંક્ષેપતઃ પ્રોક્તં મૃત્યુઞ્જયમહોદયમ્ ॥
પાપઘ્નં સર્વજંતૂનાં સર્વકામફલપ્રદમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસ ખણ્ડે પ્રથમે પ્રભાસક્ષેત્રમાહાત્મ્ય એકાદશરુદ્રમાહાત્મ્યે મૃત્યુઞ્જયમાહાત્મ્યવર્ણનંનામ પઞ્ચનવતિતમોઽધ્યાયઃ