Skanda Purana · Chapter 7.93

// īśvara uvāca // //
tato gacchedvarārohe mahākāleśvaraṃ haram //
aghoreśāduttarataḥ kiṃcidvāyavyasaṃsthitam

dhanuṣāṃ triṃśatā devi śrutaṃ pātakanāśanam //
pūrvaṃ kṛtayuge devi smṛtaṃ citrāṃgadeśvaram

mahākāleśvaraṃ devi kalau nāma prakīrtitam //
kālarūpī mahārudrastasmim̐lliṃge vyavasthitaḥ

carācaraguruḥ sākṣāddevadānavadarpahā //
sūryarūpeṇa yatsarvaṃ brahmāṃḍe grasate priye

sa devaḥ saṃsthito devi tasmim̐lliṃge mahāprabhaḥ //
yastatpūjayate bhaktyā kalye liṃgaṃ mama priyam //
ṣaḍakṣareṇa maṃtreṇa mṛtyuṃ jayati tatkṣaṇāt

kṛṣṇāṣṭamyāṃ viśeṣeṇa guggulaṃ ghṛtasaṃyutam //
yo dahedvidhivattatra pūjāṃ kṛtvā niśāgame

aparādhasahasraṃ tu kṣamate tasya bhairavaḥ //
dhenudānaṃ praśaṃsaṃti tasminsthāne maharṣayaḥ

dhenudastārayennūnaṃ daśa pūrvāndaśāparān //
devasya dakṣiṇe bhāge yo japecchatarudriyam

uddharetpitṛvargaṃ ca mātṛvargaṃ ca mānavaḥ //
bālye vayasi yatpāpaṃ vārddhake yauvane'pi vā //
kṣālayeccaiva tatsarvaṃ dṛṣṭvā kāleśvaraṃ haram

ayane cottare prāpte yaḥ kuryādghṛtakaṃbalam //
na sa bhūyo'tra saṃsāre janma prāpnoti dāruṇam

na duḥkhito daridro vā durbhago vā prajāyate //
saptajanmāntarāṇyeva mahākāleśadarśanāt

dhanadhānyasamāyukte sphīte sañjāyate kule //
bhaktirbhavati bhūyo'pi mahākāleśvarārcane

iti saṃkṣepataḥ proktaṃ mahākāleśvaraṃ priye //
citrāṃgado gaṇo devi tena cārādhitaṃ purā

divyābdānāṃ sahasraṃ tu mahā kāleśvaraṃ hi tat //
citrāṃgadeśvaraṃ nāma tena khyātaṃ dharātale

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsa khaṃḍe prathame prabhāsakṣetramāhātmya ekādaśarudramāhātmye mahākāleśvaramāhātmyavarṇanaṃnāma triṇavatitamo'dhyāyaḥ