સ્કંદ પુરાણ · અધ્યાય 7.94

॥ ઈશ્વર ઉવાચ ॥ ॥
તતો ગચ્છેન્મહાદેવિ ભૈરવેશ્વરમુત્તમમ્ ॥
તસ્યૈવ વહ્નિકોણસ્થં ધનુષાંદશકે સ્થિતમ્

સર્વકામપ્રદં દેવિ દારિદ્ર્યૌઘવિનાશનમ્ ॥
પૂર્વં ચણ્ડેશ્વરંનામ ખ્યાતં કૃતયુગે પ્રિયે

ચણ્ડોનામ ગણો દેવિ તેન ચારાધિતં પુરા ॥
દિવ્યાબ્દાનાં સહસ્રં તુ તેન ચણ્ડેશ્વરં સ્મૃતમ્

તં દૃષ્ટ્વા દેવદેવેશં સ્પૃષ્ટ્વા ચ સુસમાહિતઃ ॥
મુચ્યતે સકલાત્પાપાદાજન્મમરણાંતિકાત્

તત્ર કૃષ્ણચતુર્દશ્યાં માસે ભાદ્રપદે પ્રિયે ॥
ઉપવાસ પરો ભૂત્વા યઃ કરોતિ પ્રજાગરમ્ ॥
સ યાતિ પરમં સ્થાનં યત્ર દેવો મહેશ્વરઃ

વાચિકં માનસં પાપં કર્મણા યદુપાર્જિતમ્ ॥
તત્સર્વં નાશમાયાતિ તસ્ય લિંગસ્ય દર્શનાત્

તિલા હિરણ્યં વસ્ત્રાણિ તત્ર દેયં મનીષિણે ॥
સર્વકિલ્વિષનાશાર્થં સમ્યગ્યાત્રાફલેપ્સુના

ભૈરવાકારમાસ્થાય કલ્પાન્તે સ હરેદ્યતઃ ॥
વિશ્વં સમગ્રં દેવેશિ તેનાસૌ ભૈરવઃ સ્મૃતઃ

અસ્મિન્કલ્પે મહાદેવિ પ્રભાસક્ષેત્રમાસ્થિતઃ ॥
બભૂવ ભૈરવો રુદ્રઃ કલ્પાન્તે લિંગમૂર્તિમાન્

એવં સંક્ષેપતઃ પ્રોક્તં માહાત્મ્યં ભૈરવેશ્વરમ્ ॥
યચ્છ્રુત્વા મુચ્યતે જન્તુઃ પાતકાદતિભૈરવાત્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે પ્રથમે પ્રભાસક્ષેત્રમાહાત્મ્ય એકાદશરુદ્રમાહાત્મ્યે ભૈરવેશ્વરમાહાત્મ્ય વર્ણનંનામ ચતુર્ણવતિતમોઽધ્યાયઃ