સ્કંદ પુરાણ · અધ્યાય 7.93

॥ ઈશ્વર ઉવાચ ॥ ॥
તતો ગચ્છેદ્વરારોહે મહાકાલેશ્વરં હરમ્ ॥
અઘોરેશાદુત્તરતઃ કિંચિદ્વાયવ્યસંસ્થિતમ્

ધનુષાં ત્રિંશતા દેવિ શ્રુતં પાતકનાશનમ્ ॥
પૂર્વં કૃતયુગે દેવિ સ્મૃતં ચિત્રાંગદેશ્વરમ્

મહાકાલેશ્વરં દેવિ કલૌ નામ પ્રકીર્તિતમ્ ॥
કાલરૂપી મહારુદ્રસ્તસ્મિઁલ્લિંગે વ્યવસ્થિતઃ

ચરાચરગુરુઃ સાક્ષાદ્દેવદાનવદર્પહા ॥
સૂર્યરૂપેણ યત્સર્વં બ્રહ્માંડે ગ્રસતે પ્રિયે

સ દેવઃ સંસ્થિતો દેવિ તસ્મિઁલ્લિંગે મહાપ્રભઃ ॥
યસ્તત્પૂજયતે ભક્ત્યા કલ્યે લિંગં મમ પ્રિયમ્ ॥
ષડક્ષરેણ મંત્રેણ મૃત્યું જયતિ તત્ક્ષણાત્

કૃષ્ણાષ્ટમ્યાં વિશેષેણ ગુગ્ગુલં ઘૃતસંયુતમ્ ॥
યો દહેદ્વિધિવત્તત્ર પૂજાં કૃત્વા નિશાગમે

અપરાધસહસ્રં તુ ક્ષમતે તસ્ય ભૈરવઃ ॥
ધેનુદાનં પ્રશંસંતિ તસ્મિન્સ્થાને મહર્ષયઃ

ધેનુદસ્તારયેન્નૂનં દશ પૂર્વાન્દશાપરાન્ ॥
દેવસ્ય દક્ષિણે ભાગે યો જપેચ્છતરુદ્રિયમ્

ઉદ્ધરેત્પિતૃવર્ગં ચ માતૃવર્ગં ચ માનવઃ ॥
બાલ્યે વયસિ યત્પાપં વાર્દ્ધકે યૌવનેઽપિ વા ॥
ક્ષાલયેચ્ચૈવ તત્સર્વં દૃષ્ટ્વા કાલેશ્વરં હરમ્

અયને ચોત્તરે પ્રાપ્તે યઃ કુર્યાદ્ઘૃતકંબલમ્ ॥
ન સ ભૂયોઽત્ર સંસારે જન્મ પ્રાપ્નોતિ દારુણમ્

ન દુઃખિતો દરિદ્રો વા દુર્ભગો વા પ્રજાયતે ॥
સપ્તજન્માન્તરાણ્યેવ મહાકાલેશદર્શનાત્

ધનધાન્યસમાયુક્તે સ્ફીતે સઞ્જાયતે કુલે ॥
ભક્તિર્ભવતિ ભૂયોઽપિ મહાકાલેશ્વરાર્ચને

ઇતિ સંક્ષેપતઃ પ્રોક્તં મહાકાલેશ્વરં પ્રિયે ॥
ચિત્રાંગદો ગણો દેવિ તેન ચારાધિતં પુરા

દિવ્યાબ્દાનાં સહસ્રં તુ મહા કાલેશ્વરં હિ તત્ ॥
ચિત્રાંગદેશ્વરં નામ તેન ખ્યાતં ધરાતલે

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસ ખંડે પ્રથમે પ્રભાસક્ષેત્રમાહાત્મ્ય એકાદશરુદ્રમાહાત્મ્યે મહાકાલેશ્વરમાહાત્મ્યવર્ણનંનામ ત્રિણવતિતમોઽધ્યાયઃ