Skanda Purana · Chapter 7.91

// īśvara uvāca // //
tato gacchenmahādevi tryaṃbakeśvaramavyayam //
tatpaṃcamaṃ samākhyātaṃ rudrāṇāmādidaivatam

śikhaṃḍīśvaramākhyātaṃ pūrvaṃ tretāyuge priye //
taccādyāhaṃ pravakṣyāmi yathā saṃjñāyate naraiḥ

asti sāṃbapuraṃ devi tatrasthaṃ parameśvari //
tasyaivottaradigbhāge sthānaṃ kāpālikaṃ smṛtam

kapāleśvaranāmā ca yatreśo liṃgamūrtimān //
saṃsthitaḥ pāpanāśāya darśanātsparśanānnṛṇām

tasmādīśānadigbhāge dhanuṣāṃ ṣoḍaśāṃtare //
tryaṃbakeśvaranāmā ca tatra rudraḥ sthitaḥ svayam //

sarvānugrahakarttā ca sarvakāmaphalapradaḥ //
purā yatrātapaddevi tapo ghoraṃ suduṣkaram //
gururnāmā ṛṣivaro devadānavaduḥsaham

koṭīnāṃ tritayaṃ yena tryaṃbako maṃtranāyakaḥ //
japto divyena vidhinā trikālaṃ pūjya śaṃkaram

tataḥ prasādya deveśaṃ divyaiśvaryamavāpa saḥ //
cakre nāma svayaṃ tasya tryaṃbakeśvaramavyayam

japtvā tu tryaṃbakaṃ maṃtraṃ yataḥ siddhimavāpa saḥ //
divyāṣṭaguṇamaiśvaryaṃ tenāsau tryaṃbakeśvaraḥ

sarvapātaka vidhvaṃsī darśanātsparśanādapi //
yastryaṃbakaṃ japedviprastryaṃbakeśvarasaṃnidhau //
sa prāpnoti mahāsiddhiṃ pratyakṣaṃ rudra eva saḥ

darśanādapi tasyātha pāpaṃ yāti sahasradhā //
yastaṃ pūjayate bhaktyā vidhinā bhāvamāsthitaḥ //
vāmadevena maṃtreṇa sa muktaḥ pātakairbhavet

caitraśuklacaturdaśyāṃ tatra yo jāgṛyānniśi //
pūjāstutikathābhiśca sa prāpnotīpsitaṃ phalam

dhenustatraiva dātavyā samyagyātrāphalepsubhiḥ

iti te kathitaṃ devi māhātmyaṃ pāpanāśanam //
tryaṃbakeśvararudrasya nṛṇāṃ puṇyaphalapradam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe prathame prabhāsakṣetramāhātmya ekādaśarudramāhātmye tryaṃbakeśvaramāhātmyavarṇanaṃnāmaikonavatitamo'dhyāyaḥ