સ્કંદ પુરાણ · અધ્યાય 7.91

॥ ઈશ્વર ઉવાચ ॥ ॥
તતો ગચ્છેન્મહાદેવિ ત્ર્યંબકેશ્વરમવ્યયમ્ ॥
તત્પંચમં સમાખ્યાતં રુદ્રાણામાદિદૈવતમ્

શિખંડીશ્વરમાખ્યાતં પૂર્વં ત્રેતાયુગે પ્રિયે ॥
તચ્ચાદ્યાહં પ્રવક્ષ્યામિ યથા સંજ્ઞાયતે નરૈઃ

અસ્તિ સાંબપુરં દેવિ તત્રસ્થં પરમેશ્વરિ ॥
તસ્યૈવોત્તરદિગ્ભાગે સ્થાનં કાપાલિકં સ્મૃતમ્

કપાલેશ્વરનામા ચ યત્રેશો લિંગમૂર્તિમાન્ ॥
સંસ્થિતઃ પાપનાશાય દર્શનાત્સ્પર્શનાન્નૃણામ્

તસ્માદીશાનદિગ્ભાગે ધનુષાં ષોડશાંતરે ॥
ત્ર્યંબકેશ્વરનામા ચ તત્ર રુદ્રઃ સ્થિતઃ સ્વયમ્ ॥

સર્વાનુગ્રહકર્ત્તા ચ સર્વકામફલપ્રદઃ ॥
પુરા યત્રાતપદ્દેવિ તપો ઘોરં સુદુષ્કરમ્ ॥
ગુરુર્નામા ઋષિવરો દેવદાનવદુઃસહમ્

કોટીનાં ત્રિતયં યેન ત્ર્યંબકો મંત્રનાયકઃ ॥
જપ્તો દિવ્યેન વિધિના ત્રિકાલં પૂજ્ય શંકરમ્

તતઃ પ્રસાદ્ય દેવેશં દિવ્યૈશ્વર્યમવાપ સઃ ॥
ચક્રે નામ સ્વયં તસ્ય ત્ર્યંબકેશ્વરમવ્યયમ્

જપ્ત્વા તુ ત્ર્યંબકં મંત્રં યતઃ સિદ્ધિમવાપ સઃ ॥
દિવ્યાષ્ટગુણમૈશ્વર્યં તેનાસૌ ત્ર્યંબકેશ્વરઃ

સર્વપાતક વિધ્વંસી દર્શનાત્સ્પર્શનાદપિ ॥
યસ્ત્ર્યંબકં જપેદ્વિપ્રસ્ત્ર્યંબકેશ્વરસંનિધૌ ॥
સ પ્રાપ્નોતિ મહાસિદ્ધિં પ્રત્યક્ષં રુદ્ર એવ સઃ

દર્શનાદપિ તસ્યાથ પાપં યાતિ સહસ્રધા ॥
યસ્તં પૂજયતે ભક્ત્યા વિધિના ભાવમાસ્થિતઃ ॥
વામદેવેન મંત્રેણ સ મુક્તઃ પાતકૈર્ભવેત્

ચૈત્રશુક્લચતુર્દશ્યાં તત્ર યો જાગૃયાન્નિશિ ॥
પૂજાસ્તુતિકથાભિશ્ચ સ પ્રાપ્નોતીપ્સિતં ફલમ્

ધેનુસ્તત્રૈવ દાતવ્યા સમ્યગ્યાત્રાફલેપ્સુભિઃ

ઇતિ તે કથિતં દેવિ માહાત્મ્યં પાપનાશનમ્ ॥
ત્ર્યંબકેશ્વરરુદ્રસ્ય નૃણાં પુણ્યફલપ્રદમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસ ખણ્ડે પ્રથમે પ્રભાસક્ષેત્રમાહાત્મ્ય એકાદશરુદ્રમાહાત્મ્યે ત્ર્યંબકેશ્વરમાહાત્મ્યવર્ણનંનામૈકોનવતિતમોઽધ્યાયઃ