Skanda Purana · Chapter 7.90

// īśvara uvāca // //
tato gacchenmahādevi caturthaṃ rudramuttamam //
vṛṣabheśvaranāmānaṃ kalpaliṃgaṃ surapriyam

bālarūpī mahādevi yatra brahmā svayaṃ sthitaḥ //
tasyaiva cottare bhāge dhanuṣāṃ tritaye sthitam

ādyaṃ mahāprabhāvaṃ hi nāpuṇyo veda mānavaḥ //
tasyaiva kalpanāmāni sāṃprataṃ prabravīmi te

pūrvakalpe mahādevi brahmeśvara iti smṛtaḥ //
brahmaṇārādhitaḥ pūrvaṃ varṣāṇāmayutaṃ priye

sṛṣṭikāmena devena tatastuṣṭo maheśvaraḥ //
caturvidhāṃ bhūtasṛṣṭiṃ tataścakre pitāmahaḥ

brahmaṇastvīśabhāvena gatastuṣṭiṃ yato haraḥ //
tena brahmeśvaraṃ nāma tasmim̐lliṃge purā'bhavat

tato dvitīyakalpe tu saṃprāpte varavarṇini //
raivateśvaranāmeti prakhyātaṃ dharaṇītale

raivato nāma rājā'bhūdbrahmāṃḍe sacarācare //
jagadyonirjigāyedaṃ talliṃgasya prabhāvataḥ

raivateśvaranāmābhūttena liṃgaṃ mahāprabham //
punastṛtīyakalpe tu saṃprāpte varavarṇini

vṛṣabheśvaranāmābhūttasya liṃgasya bhāmini //
mamaiva vāhanaṃ yo'sau dharmoyaṃ vṛṣarūpadhṛk

tena tatpūjitaṃ liṃgaṃ divyābdānāṃ sahasrakam//
tatastuṣṭena deveśi nītaḥ sāyujyatāṃ vṛṣaḥ

tena talliṃgamabhavadvṛṣabheśeti bhūtale //
tataścaturthe saṃprāpte vārāhekalpa saṃjñite

aṣṭāviṃśatime tatra tretāyugamukhe tadā //
ikṣvākurnāma rājā'bhūtsūryavaṃśavibhūṣaṇaḥ

sa liṃgaṃ pūjayāmāsa trikālaṃ bhaktibhāvitaḥ //
ekāhāro jitāhāro bhūbhiśāyī jiteṃdriyaḥ

evaṃ kāle bahuvidhe tatastuṣṭo maheśvaraḥ //
dadau rājyaṃ mahodagraṃ saṃtatiṃ putra pautrikīm

ikṣvākvīśvaranāmābhūttenedaṃ liṃgamuttamam //
yastaṃ pūjayate bhaktyā devaṃ vṛṣabhavāhanam // .१६ //
saptajanmakṛtaiḥ pāpairmucyate nātra saṃśayaḥ //
triṃśaddhanuṣpramāṇena tasya kṣetracaturddiśam

snānaṃ jāpyaṃ baliṃ homaṃ pūjāṃ stotramudīraṇam //
tasmiṃstīrthe tu yaḥ kuryāttatsarvaṃ cākṣayaṃ bhavet

catuṣkoṇāṃtarā kṣetramevaṃ mātrāpramāṇataḥ //
ekarātroṣito bhūtvā tasya liṃgasya sannidhau

brahmacaryeṇa jāgartti sa pāpaiḥ saṃpramucyate //
homajāpyasamādhistho nṛtyagītādivādanaiḥ

goghno vā brahmahā pāpī mucyate duṣkṛtairnaraḥ //
yaḥ saṃprīṇayate viprāṃstatra bhojyaiḥ pṛthagvidhaiḥ

ekasminbhojite vipre koṭirbhavati bhojitā //
bhairavaṃ caiva kedāraṃ puṣkaraṃ drutijaṃgamam

vārāṇasī kurukṣetraṃ mahā kālaṃ ca naimiṣam //
etattīrthāṣṭakaṃ devi tasmim̐lliṃge vyavasthitam

māghe kṛṣṇacaturddaśyāṃ tatra yo jāgṛyānniśi //
saṃpūjya vidhinā devaṃ sa tīrthāṣṭaphalaṃ labhet

dadāti tatra yaḥ piṇḍaṃ naṣṭendau śivasaṃnidhau //
tṛpyanti pitarastasya yāvadbrahmadināntakam

dadhikṣīra ghṛtenaiva paṃcagavyakuśodakaiḥ //
kuṃkumāgarukarpūraistalligaṃ pūjayenniśi

saṃmaṃtryāghoramaṃtreṇa dhyātvā devaṃ sadāśivam //
evaṃ kṛtvā mahādevi mucyate paṃcapātakaiḥ

aṣṭamyāṃ ca caturddaśyāṃ dadhnā saṃsnāpayedyadi //
sa brāhmaṇaścaturvedo jāyate nātra saṃśayaḥ

kṣīreṇa snāpayeddevi yadi taṃ vṛṣabheśvaram //
saptadhenusahasrāṇāṃ sa phalaṃ viṃdate mahat

janmāṃtareṇa yatpāpaṃ sāṃprataṃ yatkṛtaṃ priye //
tatsarvaṃ nāśamāyāti ghṛtasnānena bhāmini

paṃcagavyena yo devi snāpayedvṛṣabheśvaram //
sa dahetsarvapāpāni sarvayajñaphalaṃ labhet

taddṛṣṭvā brahmahā goghnaḥ steyī ca gurutalpagaḥ //
śaraṇāgataghātī ca mitraviśraṃbhaghātakaḥ

duṣṭapāpasamācāro mātṛhā pitṛhā tathā //
mucyate sarvapāpaistu talliṃgārādhanodyataḥ

kārtikaṃ sakalaṃ yastu pūjayedbrahmaṇā saha //
brahmeśvaraṃ mahāliṃgaṃ sa muktaḥ pātakairbhavet

tena dattaṃ bhavetsarvaṃ guravastena toṣitāḥ //
śrāddhaṃ kṛtaṃ gayātīrthe tena taptaṃ mahattapaḥ //
yena devādhidevo'saupūjito vṛṣabheśvaraḥ

iti te kathitaṃ devi māhātmyaṃ devapūjitam //
vṛṣabheśvaradevasya kalpaliṃgasya bhāmini

yaḥ śṛṇoti mahādevi māhātmyaṃ daivadevatam //
mūrkho vā paṃḍito vā'pi sa yāti paramāṃ gatim

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmya ekādaśarudramāhātmye vṛṣavāhaneśvaramāhāmyavarṇanaṃnāma navatitamo'dhyāyaḥ