Skanda Purana · Verses 7.9-3

// devyuvāca // //
divyaṃ tejo namasyāmi yanme dṛṣṭaṃ purātane //
kālāgnirudramadhyasthaṃ prabhāse śaṃkarodbhavam

yo vedasaṃghairṛṣibhiḥ purāṇairvedoktayogairapi ijyamānaḥ //
taṃ devadevaṃ śaraṇaṃ vrajāmi someśvaraṃ pāpavināśahetum

devadeva jagannātha bhaktānugrahakāraka //
saṃśayo hṛdi me kaścittaṃ bhavāñchettumarhati

// īśvara uvāca // //
kaḥ saṃśayaḥ samutpannastava devi yaśasvini //
tanme kathaya kalyāṇi tatsarvaṃ kathayāmyaham

// devyuvāca // //
yadi tvaṃ ca mahādevo muṇḍamālā kathaṃ kṛtā //
anādi nidhano dhātā sṛṣṭisaṃhārakārakaḥ

tato vihasya deveśaḥ śaṃkaro vākyamabravīt //
anekamuṇḍakoṭībhiryā me mālā virājate

nārāyaṇa sahasrāṇāṃ brahmaṇāmayutasya ca // kṛtā śiraḥkaroṭībhiranādinidhanā tataḥ

anyo viṣṇuśca bhavati anyo brahmā bhavatyapi //
kalpe kalpe mayā sṛṣṭaḥ kalpe viṣṇuḥ prajāpatiḥ

ahamevaṃvidho devi kṣetre prābhāsike sthitaḥ //
kālāgniliṃgamūle tu muṃḍamālāvibhūṣitaḥ

akṣasūtradharaḥ śānta ādimadhyāṃtavarjitaḥ //
padmāsanastho varado himakundendusannibhaḥ

mama vāme sthito viṣṇurdakṣiṇe ca pitāmahaḥ //
jaṭhare caturo vedāḥ hṛdaye brahma śāśvatam

agniḥ somaśca sūryaśca locaneṣu vyavasthitāḥ

evaṃvidho mahādevi prabhāse saṃvyavasthitaḥ //
āpyatattvātsamānīte mā te bhūtsaṃśayaḥ kvacit

evamuktā tadā devī harṣagadgadayā girā //
tuṣṭāva devadeveśaṃ bhaktyā paramayā yutā

//
devyuvāca // // jaya deva mahādeva sarvabhāvana īśvara //
namaste'stu sureśāya parameśāya vai namaḥ

anādisṛṣṭikartre ca namaḥ sarvagatāya ca //
sarvasthāya namastubhyaṃ dhāmnāṃ dhāmne namo'stu te

ṣaḍaṃtāya namastubhyaṃ dvādaśāntāya te namaḥ //
haṃsabheda namastubhyaṃ namastubhyaṃ ca mokṣada

iti stutastadā devyā pracalaccandraśekharaḥ //
tatastuṣṭastu bhagavānidaṃ vacanamabravīt

//
īśvara uvāca // //
sādhusādhu mahāprājñe tuṣṭo'haṃ vriyatāṃ varaḥ

// devyuvāca // //
yadi tuṣṭo'si deveśa varārhā yadi vāpyaham//
prabhāsa kṣetramāhātmyaṃ punarvistarato vada

bhūteśa bhagavānviṣṇurdaityānāmantakāgraṇīḥ //
sa kasmāddvārakāṃ hitvā prabhāsakṣetramāśritaḥ

ṣaṣṭi tīrthasahasrāṇi ṣaṣṭikoṭiśatāni ca //
dvārakāmadhyasaṃsthāni kathaṃ nyakkṛtavānhariḥ

amarairāvṛtāṃ puṇyāṃ puṇyakṛdbhirniṣevitām //
evaṃ tāṃ dvārakāṃ tyaktvā prabhāsaṃ kathamāgataḥ

devamānuṣayornetā dyobhuvoḥ prabhavo hariḥ //
kimarthaṃ dvārakāṃ tyaktvā prabhāse nidhanaṃ gataḥ

yaścakraṃ varttayatyeko mānuṣāṇāṃ manomayam //
prabhāse sa kathaṃ kālaṃ cakre cakrabhṛtāṃ varaḥ

gopāyanaṃ yaḥ kurute jagataḥ sārvalaukikam //
sa kathaṃ bhagavānviṣṇuḥ prabhāsakṣetramāśritaḥ

yoṃtakāle jalaṃ pītvā kṛtvā toyamayaṃ vapuḥ //
lokamekārṇavaṃ cakre dṛṣṭyā dṛṣṭena cātmanā

sa kathaṃ pañcatāṃ prāpa prabhāse pārvatīpate //
yaḥ purāṇe purāṇātmā vārāhaṃ vapurāsthitaḥ

uddadhāra mahīṃ kṛtsnāṃ saśailavanakānanām//
sa kathaṃ tyaktavāngātraṃ prabhāse pāpanāśane

yena siṃhaṃ vapuḥ kṛtvā hiraṇyakaśipurhataḥ //
sa kathaṃ devadeveśaḥ prabhāsaṃ kṣetramāśritaḥ

sahasracaraṇaṃ devaṃ sahasrākṣaṃ mahāprabham//
sahasraśirasaṃ vedā yamāhurvai yugeyuge

tatyāja sa kathaṃ devaḥ prabhāse svaṃ kalevaram//
nābhyaraṇyāṃ samudbhūtaṃ yasya paitāmahaṃ gṛham

ekārṇavagate loke tatpaṃkajamapaṃkajam //
yenoddhṛtaṃ kṣaṇenaiva prabhāsasthaḥ sa kiṃ hariḥ

uttarāṃśe samudrasya kṣīrodasyā mṛtodadheḥ //
yaḥ śete śāśvataṃ yogamāsthāya paravīrahā //
sa kathaṃ tyaktavāndehaṃ prabhāse parameśvaraḥ

havyādānyaḥ surāṃścakre kavyādāṃśca pitṝ napi //
sa kathaṃ devadeveśaḥ prabhāsaṃ kṣetramāśritaḥ

yugānurūpaṃ yaḥ kṛtvā rūpaṃ lokahitāya vai //
dharmamuddharate devaḥ sa kathaṃ kṣetramāśritaḥ

trayo varṇāstrayo lokāstraividyaṃ pāṭhakāstrayaḥ//
traikālyaṃ trīṇi karmāṇi trayo devāstrayo guṇāḥ//
sṛṣṭaṃ yena purā devaḥ sa kathaṃ kṣetramāśritaḥ

yā gatirddharmayuktānāmagatiḥ pāpakarmiṇām//
cāturvarṇyasya prabhavaścāturvarṇyasya rakṣitā

cāturvidyasya yo vettā cāturāśramyasaṃsthitaḥ//
kasmātsa dvārakāṃ hitvā prabhāse paṃcatāṃ gataḥ

digaṃtaraṃ nabhobhūmirāpo vāyurvibhāvasuḥ//
caṃdrasūryadvayaṃ jyotiryugeśaḥ kṣaṇadātanuḥ

/
yaḥ paraṃ śrūyate jyotiryaḥ paraṃ śrūyate tapaḥ//
yaḥ paraṃ parataḥ proktaḥ paraṃ yaḥ paramātmavān

ādityādiśca yo divyo yaśca daityāṃtako vibhuḥ//
sa kathaṃ devakīsūnuḥ prabhāse siddhimīyivān

yugāṃte cāṃtako yaśca yaśca lokāṃtakāṃtakaḥ //
seturyo lokasattānāṃ medhyo yo medhyakarmaṇām

vettā yo vedaviduṣāṃ prabhuryaḥ prabhavātmanām//
somabhūtastu bhūtānāmagnibhūto'gnivartmanām

manuṣyāṇāṃ manobhūtastapobhūtastapasvinām //
vinayo nayabhūtānāṃ tejastejasvināmapi

vigraho vigrahāṇāṃ yo gatirgatimatāmapi //
sa kathaṃ dvārakāṃ hitvā prabhāsakṣetramāśritaḥ

ākāśaprabhavo vāyurvāyuprāṇo hutāśanaḥ//
devā hutāśanaprāṇāḥ prāṇo'gnermadhusūdanaḥ //
sakathaṃ padmajaprāṇaḥ prabhāsaṃ kṣetramāśritaḥ

// sūta uvāca // //
iti proktastadā devyā śaṃkaro lokaśaṃkaraḥ //
uvāca prahasanvākyaṃ pārvatīṃ dvijasattamāḥ

// īśvara uvāca // //
śṛṇu devi pravakṣyāmi prabhāsakṣetravistaram //
rahasyaṃ sarvapāpaghnaṃ devānāmapi durllabham

devi kṣetrāṇyanekāni pṛthivyāṃ saṃti bhāmini //
tīrthāni koṭisaṃkhyāni prabhāvasteṣu saṃkhyayā

asaṃkhyeya prabhāvaṃ hi prabhāsaṃ parikīrtitam //
brahmatattvaṃ viṣṇutattvaṃ raudratattvaṃ tathaiva ca

tatra bhūyaḥ samāyogo durllabho'nyeṣu pārvati//
prabhāse devadeveśi tattvānāṃ tritayaṃ sthitam

caturviṃśatitattvaiśca brahmā lokapitāmahaḥ //
bālarūpī ca nāmnāṃ ca tatra sthāne sthitaḥ svayam

paṃcaviśatitattvānāma dhipo devatāgraṇīḥ //
tasminsthāne sthitaḥ sākṣāddaityānāmaṃtakaḥ śubhe

ahaṃ devi tvayā sārddhaṃ ṣaṭtriṃśattattvasaṃyutaḥ //
nivasāmi mahābhāge prabhāse pāpanāśane

evaṃ tattvamayaṃ kṣetraṃ sarvatīrthamayaṃ śubham //
prabhāsameva jānīhi mā kārṣīḥ saṃśayaṃ kvacit

api kīṭapataṃgā ye mriyaṃte tatra ye narāḥ //
te'pi yāṃti paraṃ sthānaṃ nātra kāryā vicāraṇā

striyo mlecchāśca śūdrāśca paśavaḥ pakṣiṇo mṛgāḥ//
prabhāse tu mṛtā devi śivalokaṃ vrajaṃti te

kāmakrodhena ye baddhā lobhena ca vaśīkṛtāḥ //
ajñānatimirākrāṃtā māyātattve ca saṃsthitāḥ

kālapāśena ye baddhāstṛṣṇājālena mohitāḥ //
adharmaniratā ye ca ye ca tiṣṭhaṃti pāpinaḥ

brahmaghnāśca kṛtaghnāśca ye cānye gurutalpagāḥ //
mahāpātakinaścāpi te yānti paramāṃ gatim

mātṛhaṃtā naro yastu pitṛhaṃtā tathaiva ca //
te sarve muktimāyāṃti kiṃ punaḥ śubhakāriṇaḥ

iti jñātvā mahādevi daityānāmaṃtako hariḥ//
prabhāsakṣetramāsādya tyaktavānsvaṃ kalevaram//
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye prabhāsakṣetre śrīharisthitipraśnavarṇanaṃ nāma navamo'dhyāyaḥ