Skanda Purana · Verses 7.9-2

// prahlāda uvāca // //
tato gaccheddvijaśreṣṭhāḥ saptakuṇḍānsuviśrutān //
sarvapāpapraśamanānṛddhibuddhivivarddhanān

ārādhitaḥ sa ca yadā harirāvirbabhūva ha //
saṃstūyamāno munibhirlakṣmyā saha jagatpatiḥ

arhaṇaṃ ca tadā cakrurharaye suragaṅgayā //
vāmapārśve sthitāṃ padmāmabhiṣektuṃ samudyatām

sanakādyā brahmasutāḥ saptaite manasā dvijāḥ //
pṛthakpṛthagghradānkṛtvā siṣicuḥ sāgarodbhavām

tato lakṣmīhradāḥ proktā devyā nātraiva saṃjñitāḥ //
prāpte tu dvāparasyāṃte rukmiṇīsaṃśrayeṇa tu

rukmiṇīhradamityevaṃ kalau khyātiṃ gatāḥ punaḥ //
bhṛguṇā sevitaṃ yasmādbhṛgutīrthamiti smṛtam

tasmingatvā mahābhāgāḥ prakṣālya caraṇau mṛdā //
ācamya ca kuśāngṛhya prāṅmukho niyataḥ śuciḥ

saṃpūrṇaṃ cārghyamādāya phalapuṣpākṣatādibhiḥ //
rajataṃ ca śire kṛtvā mantrametamudīrayet

bhaktyā cārghyaṃ pradāsyāmi hrade rukmiṇisaṃjñite //
sarvapāpavināśāya rukmiṇyāḥ prīṇanāya ca

snānaṃ kuryyāttato viprāḥ kṛtvā śirasi tārakam //
devānmanupyānsantarpya pitṝnatha viśeṣataḥ

śrāddhaṃ tataḥ prakurvīta viprānāhūya bhaktitaḥ //
dakṣiṇāṃ ca tato dadyādrajataṃ rukmameva ca

viśeṣataḥ pradeyāni phalāni rasavanti ca //
dampatyorbhojanaṃ dadyānmiṣṭānnena dvijottamāḥ

viprapatnyastu saṃpūjyāḥ striyaścānyāḥ svaśaktitaḥ //
kañcukai raktavastraiśca rukmiṇī prīyatāmiti

evaṃ kṛte dvijaśreṣṭhāḥ kṛtakṛtyo bhavennaraḥ //
sarvānkāmānavāpnoti viṣṇulokaṃ sa gacchati

vasate ca sadā gehe lakṣmīstasya na saṃśayaḥ //
ārogyaṃ manasastuṣṭirna codvegaḥ kadācana

pitṝṇāmakṣayā tṛptiḥ prajā bhavati niścalā //
hīnasattvo naiva bhaveddīrghāyuśca bhavennaraḥ

āḍhyo bhavati sarvatra yaḥ snāto rukmiṇī hrade //
na lakṣmyā mucyate viprā nālakṣmyā vriyate naraḥ

na vairaṃ kalahastasya yaḥ snāto rukmiṇīhrade //
gamanāgamanaṃ na syātsaṃsārabhramaṇaṃ tathā

duḥkhaśokau kutastasya yaḥ snāto rukmiṇīhrade //
sarvapāpavinirmukto mahābhayavivarjitaḥ

sarvānkāmāniha prāpya yāti viṣṇupadaṃ naraḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe caturthe dvārakā māhātmye rukmiṇīhradamāhātmyavarṇanaṃnāma navamo'dhyāyaḥ