સ્કંદ પુરાણ · શ્લોક 7.9-2

॥ પ્રહ્લાદ ઉવાચ ॥ ॥
તતો ગચ્છેદ્દ્વિજશ્રેષ્ઠાઃ સપ્તકુણ્ડાન્સુવિશ્રુતાન્ ॥
સર્વપાપપ્રશમનાનૃદ્ધિબુદ્ધિવિવર્દ્ધનાન્

આરાધિતઃ સ ચ યદા હરિરાવિર્બભૂવ હ ॥
સંસ્તૂયમાનો મુનિભિર્લક્ષ્મ્યા સહ જગત્પતિઃ

અર્હણં ચ તદા ચક્રુર્હરયે સુરગઙ્ગયા ॥
વામપાર્શ્વે સ્થિતાં પદ્મામભિષેક્તું સમુદ્યતામ્

સનકાદ્યા બ્રહ્મસુતાઃ સપ્તૈતે મનસા દ્વિજાઃ ॥
પૃથક્પૃથગ્ઘ્રદાન્કૃત્વા સિષિચુઃ સાગરોદ્ભવામ્

તતો લક્ષ્મીહ્રદાઃ પ્રોક્તા દેવ્યા નાત્રૈવ સંજ્ઞિતાઃ ॥
પ્રાપ્તે તુ દ્વાપરસ્યાંતે રુક્મિણીસંશ્રયેણ તુ

રુક્મિણીહ્રદમિત્યેવં કલૌ ખ્યાતિં ગતાઃ પુનઃ ॥
ભૃગુણા સેવિતં યસ્માદ્ભૃગુતીર્થમિતિ સ્મૃતમ્

તસ્મિન્ગત્વા મહાભાગાઃ પ્રક્ષાલ્ય ચરણૌ મૃદા ॥
આચમ્ય ચ કુશાન્ગૃહ્ય પ્રાઙ્મુખો નિયતઃ શુચિઃ

સંપૂર્ણં ચાર્ઘ્યમાદાય ફલપુષ્પાક્ષતાદિભિઃ ॥
રજતં ચ શિરે કૃત્વા મન્ત્રમેતમુદીરયેત્

ભક્ત્યા ચાર્ઘ્યં પ્રદાસ્યામિ હ્રદે રુક્મિણિસંજ્ઞિતે ॥
સર્વપાપવિનાશાય રુક્મિણ્યાઃ પ્રીણનાય ચ

સ્નાનં કુર્ય્યાત્તતો વિપ્રાઃ કૃત્વા શિરસિ તારકમ્ ॥
દેવાન્મનુપ્યાન્સન્તર્પ્ય પિતૄનથ વિશેષતઃ

શ્રાદ્ધં તતઃ પ્રકુર્વીત વિપ્રાનાહૂય ભક્તિતઃ ॥
દક્ષિણાં ચ તતો દદ્યાદ્રજતં રુક્મમેવ ચ

વિશેષતઃ પ્રદેયાનિ ફલાનિ રસવન્તિ ચ ॥
દમ્પત્યોર્ભોજનં દદ્યાન્મિષ્ટાન્નેન દ્વિજોત્તમાઃ

વિપ્રપત્ન્યસ્તુ સંપૂજ્યાઃ સ્ત્રિયશ્ચાન્યાઃ સ્વશક્તિતઃ ॥
કઞ્ચુકૈ રક્તવસ્ત્રૈશ્ચ રુક્મિણી પ્રીયતામિતિ

એવં કૃતે દ્વિજશ્રેષ્ઠાઃ કૃતકૃત્યો ભવેન્નરઃ ॥
સર્વાન્કામાનવાપ્નોતિ વિષ્ણુલોકં સ ગચ્છતિ

વસતે ચ સદા ગેહે લક્ષ્મીસ્તસ્ય ન સંશયઃ ॥
આરોગ્યં મનસસ્તુષ્ટિર્ન ચોદ્વેગઃ કદાચન

પિતૄણામક્ષયા તૃપ્તિઃ પ્રજા ભવતિ નિશ્ચલા ॥
હીનસત્ત્વો નૈવ ભવેદ્દીર્ઘાયુશ્ચ ભવેન્નરઃ

આઢ્યો ભવતિ સર્વત્ર યઃ સ્નાતો રુક્મિણી હ્રદે ॥
ન લક્ષ્મ્યા મુચ્યતે વિપ્રા નાલક્ષ્મ્યા વ્રિયતે નરઃ

ન વૈરં કલહસ્તસ્ય યઃ સ્નાતો રુક્મિણીહ્રદે ॥
ગમનાગમનં ન સ્યાત્સંસારભ્રમણં તથા

દુઃખશોકૌ કુતસ્તસ્ય યઃ સ્નાતો રુક્મિણીહ્રદે ॥
સર્વપાપવિનિર્મુક્તો મહાભયવિવર્જિતઃ

સર્વાન્કામાનિહ પ્રાપ્ય યાતિ વિષ્ણુપદં નરઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે ચતુર્થે દ્વારકા માહાત્મ્યે રુક્મિણીહ્રદમાહાત્મ્યવર્ણનંનામ નવમોઽધ્યાયઃ